साढे ४ अर्ब अनियमितताको आरोप लागेका कर फर्छ्योट आयोगका सबै पदाधिकारी धरौटीमा छुटे

साढे ४ अर्ब अनियमितताको आरोप लागेका कर फर्छ्योट आयोगका सबै पदाधिकारी धरौटीमा छुटे

A+ A A-

अर्बौं रुपैयाँ हिनामिनाको आरोप लागेका कर फर्छ्योट आयोग पदाधिकारी धरौटीमा छुटेका छन् । विशेष अदालतले आयोगका अध्यक्ष लुम्बध्वज महत र सदस्य उमेशप्रसाद ढकाललाई हिजो धरौटीमा छोडेको थियो भने आज सदस्यसचिव चुडामणि शर्मालाई छोड्यो ।

थुनछेक बहसपछि तीनै जनालाई जनही ५० लाख धरौटीमा छोड्न आदेश दिएको विशेष अदालतका रजिष्ट्रार अशोककुमार क्षत्रीले बताए । न्यायाधीशहरू अब्दुल अजिज मुसलमान र नित्यानन्द पाण्डेयको इजलासले सबैलाई धरौटीमा छोडेर मुद्दा सुनुवाइ गर्ने आदेश दिएको हो ।

०७१ मा गठन भएको आयोगले राज्यलाई २१ अर्ब रुपैयाँ नोक्सानी पुग्ने गरी कर मिनाहा गरेर अनियमितता गरेको भन्दै महालेखा परीक्षकको कार्यालयले कारबाहीका लागि अख्तियार दुरुपयोग अनुसन्धान आयोगमा पठाएको थियो ।

महालेखा परीक्षकको कार्यालयले कर फर्छ्योट आयोगले विभिन्न व्यापारिक कम्पनीबाट ३० अर्ब ५२ करोड रुपैयाँ राजस्व असुल्नुपर्नेमा ९ अर्ब ५४ करोड रुपैयाँ मात्र उठाएर बाँकी मिनाहा गरेर राज्यकोषमा हानि पुर्‍याएको ठहर्‍याएको थियो ।

तर, अख्तियारले भने आयोगका अध्यक्ष महत, सदस्य ढकाल र सदस्यसचिव शर्माविरुद्ध मुद्दा दायर गर्दा ४ अर्ब ३४ करोडको मात्र विगो दाबी गरेको थियो । अख्तियारले ०७४ साउन र ०७८ असारमा दुईपटक गरी मुद्दा दायर गरेको थियो । पछिल्लोपटक मुद्दा दायर गरेसँगै अख्तियारले आफ्नो अनुसन्धान टुंगिएको समेत बताएको थियो ।

२१ अर्ब रुपैयाँ अनियमितता भएको भनेर संवैधानिक अंग महालेखा परीक्षकको कार्यालयले किटानी गरे पनि अर्को संवैधानिक आयोग अख्तियारले भने निकै कम अभियोग दाबी लिएको थियो । त्यसमा पनि विशेष अदालतले दुई जनालाई धरौटीमा छोडेको छ ।

प्रकाशित मिति: सोमबार, असोज ११, २०७८ १७:११