पैसा कमाउनकै लागि धुर्मुसले रंगशाला बनाउन जरुरी थिएन : कुमार कट्टेल 'जिग्री'

पैसा कमाउनकै लागि धुर्मुसले रंगशाला बनाउन जरुरी थिएन : कुमार कट्टेल 'जिग्री'

A+ A A-

कुमार कट्टेल 'जिग्री'

गौतम बुद्ध अन्तर्राष्ट्रिय क्रिकेट रंगशाला खेलप्रेमी, देश विकास भएको हेर्न चाहने तथा देशमा एउटा अन्तर्राष्‍ट्रियस्तरको स्टेडियम बन्नुपर्छ भन्ने चाहनेको साझा सपना हो । ३५ प्रतिशत निर्माण सकिएर आर्थिक संकटका कारण काम रोकिँदा सबैजना दुःखी नै हुनुहुन्छ होला ।

हामी सबैको चाहाना के हो भने- नेपालमा एउटा अन्तर्राष्ट्रियस्तरको स्टेडियम बन्नुपर्छ । किनकी देशमा एउटा पनि अन्तर्राष्ट्रियस्तरको स्टेडियम छैन । नामले अन्तर्राष्ट्रिय धेरै छन् । ग्राउण्ड अन्तर्राष्ट्रियस्तरको होला तर, त्यहाँका संरचनाहरू अन्तर्राष्ट्रियस्तरका छैनन् । गौतम बुद्ध अन्तर्राष्ट्रिय क्रिकेट रंगशाला भने ती संरचनाहरू सहितको रंगशाला हो ।

हाम्रा लागि यो सपना मात्रै पनि हुनसक्छ । तर, यो नेपालमा पनि अन्तर्राष्ट्रियस्तरको स्टेडियम बनाऔँ न भन्ने सकरात्मक नगरिक आन्दोलन पनि हो ।

काम रोकिएपछि सरकारले बनाउने, नेताले बनाउने वा धुर्मुस-सुन्तली फाउण्डेशनले नै बनाउने भन्ने कुराको जवाफ छैन । तर, सरकारले नै जिम्मा लिने हो भने नबन्ला कि भन्ने शंका गर्न सकिन्छ । यदि सरकारले बनाउथ्यो भने मूलपानीको स्टेडियम पनि बन्थ्यो होला । मूलपानीको स्टेडियम १६ वर्षदेखि त्यो अवस्थामा छ ।

यो दुई वर्षको समयमा धुर्मुस-सुन्तलीले क्रिकेट रंगशाला निर्माणमा देखाएको प्रगति साच्चिकै अतुलनीय छ । मैले नजिकबाट नियालेको हुँदा कामको प्रगतिबारे दाबीका साथ भन्न सक्छु ।

स्टेडियम बनाउनु पर्छ भन्ने सोच मैले बनाएको हो । 'नेपालमा अन्तर्राष्ट्रियस्तरको स्टेडियम बन्नुपर्छ' भनेर स्टाटस लेख्दा शतप्रतिशतले सकरात्मक प्रतिक्रिया दिनुभयो । अहिले पनि त्यो हेर्न सकिन्छ । त्यहाँ 'बन्नुपर्छ' र 'सहयोग गर्छु' भन्ने मात्र प्रतिक्रियाहरू छन् ।

तर, एउटा व्यक्ति सबैको विश्वासको पात्र नहुन सक्छु । त्यसैले, केही बस्ती बनाइसकेर धेरैको वाहवाही पाएको धुर्मुस-सुन्तली फाउण्डेशनले नै सुरु गर्‍यो भने पक्कै बन्छ जस्तो लाग्यो । तसर्थ, हामीले दाइ (सिताराम कट्टेल 'धुर्मुस') लाई रंगशाला बनाउन अनुरोध गरेका थियौँ ।

सुरुमा उहाँ तयार हुनुभएको थिएन । 'नमुना नेपाल' बनाउने तयारी गरिरहनु भएकाले पनि उहाँ रंगशाला बनाउने पक्षमा हुनुहुन्न थियो । हामीले नै उहाँलाई निरन्तर अनुरोध गरेपछि बल्ल उहाँ रंगशालाको पक्षमा आउनुभएको थियो ।

सबैतीर रंगशाला बन्नुपर्छ भन्ने आवाज उठिरहेको थियो । यता हामीले पनि दाइलाई प्रोत्साहित गरिरहेका थियौँ । पछि दाइले जनताको मत लिन चाहनुभयो र फाउनण्डेशनको पेजबाट प्रश्न सोध्नुभयो- 'नमुना नेपाल कि अन्तर्राष्ट्रिय रंगशाला ?'

उक्त प्रश्नमा ९९ प्रतिशत व्यक्तिहरूले रंगशालाको पक्षमा प्रतिक्रिया दिनुभयो । धेरैले साथ र सहयोगको बचन दिए । अन्तत: सरकारले जग्गा दिएको खण्डमा दाइ रंगशाला बनाउन तयार हुनुभयो ।

चन्दा उठाएर देश बनाउने लाेकरिझ्याइँमा लाग्दा टाट पल्टेका धुर्मुस सुन्तली

जग्गा खोज्ने क्रममा हामी धेरै ठाउँमा पुग्यौँ । तर, दिग्गज व्यक्तिहरूले सबै क्षेत्रको खेलप्रेमी जम्मा हुन सक्ने ठाउँ भन्दै चितवन देखाउनुभयो । सुरुमा त हामीले जग्गा पाएनौँ । जग्गा नै नमिल्ने भएपछि हामी उक्त परियोजनाबाट केही हच्किएका थियौँ । पछि महानगरपालिकाले नै जग्गा मिलाएर सम्झौता गर्न बोलाउनुभएको थियो । सम्झौताको दिन पनि प्रधानमन्त्रीदेखि देशका शीर्षस्थ नेताहरूको उपस्थिति रहेको थियो ।

फाउण्डेशनले कुनै जग्गा कब्जा गरेर व्यक्तिको लागि काम गर्न लागेको थिएन । त्यसैले पनि हाम्रो लागि सबैको साथ मिलेको थियो ।

काम सुरु भएपछि थुप्रै सहयोग आयो । तर, काम चलिरहँदा नै कोरोनाको महामारीले विश्व आक्रान्त बन्यो । मन खोलेर सहयोग माग्न सकिएन । बीचमा केही सहज भएपछि राम्रै सहयोग आइरहेको थियो । काम पनि द्रूत गतिमा चलिरहेको थियो । फेरि, कोरोना आइदियो । त्यसपश्चात् भने काममा केही असर पर्न गयो । ऋण लाग्यो, अनि काम रोकियो ।

अहिले सामाजिक सञ्जालमा विभिन्न टिक्काटिप्पणीहरू भइरहेका छन् । तर, अहिले जस्तो आलोचना भइरहेको छ, अवस्था त्यस्तो पनि छैन । रंगशालामा धेरै काम भएको छ । तपाईंले धुर्मुसलाई भेटेर गफिनुभयो भने, रंगशालामा नै पुगेर अवलोकन गर्नुभयो भने पनि त्यो देखिहाल्नुहुन्छ । नत्र, फाउण्डेशनमा नै गएर पनि बुझ्न सकिन्छ । यहाँ त सबैजना बन्द कोठामा रहेर अरुलाई गाली गर्नैमा व्यस्त बने । धुर्मुसले गरेको यो काम एक जिम्मेवार नागरिकको हिसाबले निकै अतुलनीय छ ।

धुर्मुसले रंगशालाको निर्माण पैसा कमाउनको लागि गर्नुभएको होइन । उहाँ कलाकारिताकै माध्यमबाट पनि राम्रो पैसा कमाउन सक्ने मान्छे हो । बजारमा उहाँको माग अहिले पनि उच्च छ । स-सम्मान उहाँहरूले पैसा कमाउन सक्नुहुन्छ । पैसाकै लागि घाम-पानी सहेर, दुनियाँको गाली सुन्दै यस्तो टाउको फुटाएर काम गर्न जरुरी थिएन । त्यसैले त भन्छु- उहाँले पैसाको लागि होइन, देशको लागि गर्नुभएको हो ।

मलाई थाहा छ, एक-डेढ वर्षदेखि नै रंगशालाको काम ऋणमा भइरहेको थियो । सरकारबाट तथा खेलप्रेमीहरूबाट सहयोग मिल्ने आत्माविश्वासले नै उहाँले काम गर्नुभएको थियो । नत्र एउटा कलाकार वा नागरिक १६ करोड ऋणको भारी बोकेर के कमाउन काम गर्‍यो होला त ? के स्वार्थले काम गर्‍यो होला त ?

अहिले जे जति काम भएको छ नि, त्यो काम यदि कोही ठेकदार राखेर सरकारबाट भएको थियो भने पक्कै डबल पैसा लाग्थ्यो । धुर्मुसले त नाम बेचेर पनि 'डिस्काउन्ट' लिएर काम गर्नुभएको छ । आखिर यो सबै राष्ट्रकै लागि त थियो नि ।

१६ कराेड ऋणले राेकिएका धुर्मुसकाे बयान : जताततै उधाराे भयाे, काम अघि बढाउनै मुस्किल पर्‍याे

हाम्रो कल्पनाभन्दा बाहिरको कामलाई एक जना मान्छे मात्रै लाग्दा ३५ प्रतिशत काम हुन्छ भने सिंगो सरकार तथा सरोकारवाला निकाय लाग्ने हो भने यो बनाउन सकिँदैन होला त ?

त्यो रंगशाला न धुर्मुसको हो, न मेरो नै हो । त्यो त राष्ट्रको सम्पत्ति हो । बनिसकेपछि त खेलसँग सम्बन्धित निकायहरूले नै त्यसलाई सञ्चालन गर्ने हो नि । सरकारले जग्गा दिएको छ भने त्यो व्‍यक्तिको हुनै सक्दैन । तर, यहाँ बुझाई गलत भएको छ ।

अहिले सरकारलाई 'ह्याण्डओभर' गर्ने कुराहरू पनि आइरहेको छ । तर, त्यसो भएको खण्डमा रंगशाला कहिले पूरा हुन्छ थाहा छैन । सरकारले जिम्मा लिने र ठेकेदार राखेर बनाउने हो भने अर्को १६ वर्ष नलाग्ला भन्न सकिन्न ।

यदि, फाउण्डेशनकै नेतृत्वमा सरकारले सहयोग गरेर काम गर्ने हो भने डेढ वर्षभित्र काम सकिन्छ । धुर्मुसलाई नै काम गर्न दिने हो भने त्यहाँ कुनै भ्रष्टचार हुनेछैन । जसको कारण पनि चाँडै रंगशाला तयार हुन्छ ।

कलाकार भएर कलाकारिता मात्रै गर्नु नि भन्ने कुराहरू पनि उठिरहेका छन् । के एउटा कलाकारले राष्ट्रको लागि योगदान दिनै नपाउने ? हामीले पनि संरचना बनाउँछौँ भन्न नपाउने ? कुनै परियोजनाको आडमा गलत काम गर्नु हुदैँन । गलत काम गरेको खण्डमा त सरकार छ, अख्तियार छ । त्योभन्दा ठूलो कुरा त जनताको विश्वास गुम्छ नि ।

हामीमाझ नकरात्मकता बढि छ । सबैले सकरात्मक सोचाई राखेर काम गर्ने हो भने राष्ट्रको विकास चाँडै हुन्छ । देशको लागि काम गर्ने मान्छेलाई सहयोग गरियो भने देश बन्न समय लाग्नेछैन ।

हामी 'नेताले काम गरेनन्' भनेर गाली पनि गर्छौं अनि राम्रो काम गरिरहनेको खुट्टा पनि तान्छौँ । अनि यो देश कसले आएर बनाइदिने हो त ?

राम्रो काम गरिरहेका धुर्मुसलाई असफल बनाउनु भनेको सिंगो देशका लागि केही गर्नुपर्छ भन्ने मान्छेहरूलाई पनि असफल बनाउनु हो । अहिले धुर्मुसले रंगशाला बनाउने भयो भनेपछि खुट्टा तान्न लागेका छन् । किनभने, नेपालीलाई त कसैले राम्रो काम गरेको मनै पर्दैन ।

मेरो कुरा यत्ति हो- देशमा एउटा अन्तर्राष्ट्रियस्तरको रंगशाला बन्नुपर्छ । नेपालमा रहेर खेल्न चाहाने युवाहरूले भोलिका दिनमा आफ्नो प्रतिभा देखाउने ठाउँ पाउनुपर्छ ।

(दिप्सन लुइटेलसँगको कुराकानीमा आधारित)

प्रकाशित मिति: बुधबार, असोज ६, २०७८ २१:०६