बागमतीमा नयाँ आचारसंहिता: नियुक्तिमा मन्त्री र पदाधिकारीले नातावादलाई प्रश्रय दिन नपाउने

बागमतीमा नयाँ आचारसंहिता: नियुक्तिमा मन्त्री र पदाधिकारीले नातावादलाई प्रश्रय दिन नपाउने

A+ A A-

बागमती प्रदेश सरकारले मन्त्री तथा पदाधिकारीहरूका लागि आचारसंहिता जारी गरेको छ । नयाँ आचारसंहिता मन्त्रिपरिषद्‍बाट स्वीकृत गराएर लागू गरिएको छ ।

प्रदेश सरकारको आचारसंहिताले मन्त्री तथा पदाधिकारीहरूलाई कुनै पनि नियुक्तिमा सिफारिस गर्न नातावाद र कृपावादलाई प्रश्रय दिन नपाइने बनाएको छ । अष्टलक्ष्मी शाक्य नेतृत्वको सरकारले अब नातावात, कृपावादलाई प्रश्रय दिन नहुनेदेखि आफू वा आफन्तको काम गराउन पदाधिकारीलाई दबाद दिन नपाइने नियम बनाएको छ ।

बागमती सरकारका प्रवक्तासमेत रहेका भौतिक पूर्वाधार विकास मन्त्री केशवराज पाण्डेले मन्त्री र पदाधिकारीहरूले पदको दुरुपयोग गरी नातागोता र आफन्तहरूलाई प्राथमिकता दिन नहुने बताए । ‘मन्त्री तथा पदाधिकारीहरूले नियुक्तिका लागि सिफारिस गर्दा सबै प्रक्रिया पुर्‍याएर आवश्यक कागजात संलग्न गरी सम्बन्धित विषय विज्ञहरू मध्येबाट नै प्रस्ताव गर्नुपर्ने आचारसंहिता बनाएका छौँ,’ मन्त्री पाण्डेले भने ।

आफन्त वा आफूनिकटका व्यक्तिहरूसँग सम्बन्धित कुनै काम गराउन वा नगराउन अन्य निकायका पदाधिकारीलाई दबाब र अनुचित प्रभाव पर्न नहुने आचारसंहितामा उल्लेख छ । मन्त्री र सरकारका पदाधिकारीहरू गैरसरकारी संघसंस्थामा बस्न नपाइने नियम पनि बनाइएको मन्त्री पाण्डेले जानकारी दिए । गोप्य राख्नु पर्ने विषयलाई बाहिर ल्याउन नहुने आचारसंहितामा उल्लेख छ ।

मन्त्री र पदाधिकारीहरूलाई कानुनले तोकिएभन्दा बढी कुनै पनि सुविधा लिन नपाउने, सादा जीवन कडा परिश्रमको नीति अबलम्बन गर्नुपर्ने, स्थलगत भ्रमण वा कुनै कार्यक्रममा सहभागी हुँदा मुख्मन्त्रीलाई जानकारी गराउनु पर्ने, सरुवा मापदण्ड बनाएर मात्रै आफू मातहतका कर्मचारीहरूको सरुवा गर्नुपर्ने आचारसंहितामा उल्लेख छ ।

मन्त्री र पदाधिकारीहरूले समाजवाद उन्मुख कार्यक्रमलाई कार्यान्वयनका लागि नेतृत्वदायी भूमिका निभाउनु पर्ने आचारसंहितामा उल्लेख छ । आचारसंहिता पालना गर्ने क्रममा कुनै बाधा पुगेमा मुख्यमन्त्रीको निर्णय नै अन्तिम हुने प्रवक्ता पाण्डेले बताए ।

प्रकाशित मिति: शुक्रबार, भदौ २५, २०७८ १५:३३