बागमती प्रदेशको नीति तथा योजना आयोगको उपाध्यक्षमा बस्नेत

A+ A A-

बागमती प्रदेशको नीति तथा योजना आयोग उपाध्यक्षमा डा. जगतबहादुर बस्नेतलाई नियुक्त गरिएको छ ।

मुख्यमन्त्री अष्टलक्ष्मी शाक्यले सिन्धुपाल्चोकस्थित मेलम्चीका बस्नेतलाई आयोगको उपाध्यक्षमा नियुक्त गरेकी हुन् ।

बागमतीका पूर्वउद्योग, पर्यटन वन तथा वातावरणमन्त्री अरुण नेपालको सिफासिरमा बस्नेतलाई शाक्यले आयोगको जिम्मेवारी दिएकी छन् ।

गुठी तथा भूमि सम्बन्धका विज्ञसमेत रहेका बस्नेत भूमि अधिकारको क्षेत्रका अभियन्ता पनि हुन् । आयोगको अध्यक्षमा मुख्यमन्त्री रहने व्यवस्था छ ।

मुख्यमन्त्री शाक्यले प्रदेश नीति तथा योजना आयोगमा बस्नेतसहित सदस्यमा रामेछापका ज्ञानकुमार श्रेष्ठ, काठमाडौंकी निलम ताम्राकार र नुवाकोटका रामशरण प्याकुरेललाई नियुक्त गरेकी छन् । सदस्य श्रेष्ठ एमाले रामेछापका नेता हुन् भने नुवाकोट आदर्श बहुमुखी क्याम्पसका अध्यक्षसमेत रहेका प्याकुरेल एमालेका राष्ट्रिय प्रतिनिधि परिषद् सदस्य हुन् ।

नवनियुक्त आयोगका उपाध्यक्ष र सदस्यहरूले शुक्रबार पद तथा गोपनीयताको शपथ लिएका छन् । मुख्यमन्त्री शाक्यले मुख्यमन्त्री तथा मन्त्रिपरिषद्को कार्यालयमा शपथ गराएकी हुन् ।

शाक्यले आयोग पदाधिकारीविहीन हुँदा काम अघि बढाउन समस्या भएकाले आयोगलाई पूर्णता दिएको बताइन् । ‘कामलाई एउटा गतिमा अगाडि बढाउन आयोगलाई पूर्णता दिएको छु । पदाधिकारी नहुँदा काम अगाडि बढाउन समस्या थियो,’ शाक्यले भनिन् ।

प्रदेश नीति तथा योजना आयोग विगत एक वर्षदेखि पदाधिकारीविहीन थियो । निवर्तमान मुख्यमन्त्री डोरमणि पौडेलसँगको असन्तुष्टिका कारण आयोगका तत्कालीन उपाध्यक्ष खिमलाल देवकोटाले २०७६ असार अन्तिममा राजीनामा दिएका थिए । देवकोटाको राजीनामापछि आयोग उपाध्यक्षविहीन बनेको हो ।

प्रकाशित मिति: शुक्रबार, भदौ २५, २०७८ १२:२५