सरकारी खर्चमा डोरी तान्ने प्रतियोगिता

A+ A A-

मोरङको बूढीगंगा गाउँपालिकामा सरकारी खर्चबाट डोरी तान्ने प्रतियोगिता हुने भएको छ । प्रदेश नम्बर एकको सामाजिक विकास मन्त्रालयले प्रतियोगिताको आयोजना गरेको हो ।

आगामी जेठ २५ गते शनिवार हुने प्रतियोगितामा प्रदेश नम्बर १ अन्तर्गत ८ जिल्लाका ८८ जना खेलाडीको सहभागीता रहने आयोजकले जनाएको छ । प्रतियोगिता व्यवस्थापनको जिम्मेवारी पाएको मोरङ जिल्ला डोरी तान संघले बिहीबार बूढीगंगामा पत्रकार सम्मेलन गर्दै प्रतियोगिताबारे जानकारी दिएको थियो ।

प्रदेश स्तरिय डोरी तान प्रतियोगिताको सम्पूर्ण तयारी पूरा भएको डोरी तान संघ मोरङकी अध्यक्ष रीता न्यौपानेले जानकारी दिइन् । प्रतियोगितामा प्रदेश नम्बर १ का झापा, मोरङ, सुनसरी, पाँचथर, सोलुखुम्बु, संखुवासभा, धनकुटा र भोजपुर जिल्ला सहभागी हुनेछन् ।

बुढीगंगा गाउँपालिका–१ स्थित नरग्राम माध्यामिक बिद्यालयको खेल मैदानमा प्रतियोगिता हुने अध्यक्ष न्यौपानेले जानकारी दिइन् ।

नेपाल डेरी तान संघका केन्द्रीय उपाध्यक्ष सुभाषश्री पोखरेलले पुरानो खेलमध्येको डण्डीबियो र डोरीतान नै नेपाली मौलिकतासँग जोडिएको खेल भए पनि राष्ट्रिय खेलकुद परिषद्का कारण ओझेललमा परेको बताए । उनले भने ‘अहिले पनि राज्यको ध्यान डोरी तान खेलमा जान सकेको छैन । यसमा हामीलाई दुख लागेको छ ।’

उनले हरेक राष्ट्रिय तथा प्रदेश स्तरीय खेल प्रतियोगिताहरुमा डोरीतान खेललाई अनिवार्य समेटन सरका सँग माग गरे । नेपालमा १७ वर्षअघि डोरी तान केन्द्रीय समिति बनाएर डोरी तान खेललाई ब्यवसायीकता दिन खोजिएको भए पनि राखेपले २ वर्ष अगाडि मात्र समिति बनाएको पोखरेलले बताए ।

संघका केन्द्रीय सदस्य सत्यनारायण चौधरीले लोप हुन लागेको डोरी तान प्रतियोगितालाई प्रोत्साहन गर्ने काम प्रदेश १ सरकारबाट सुरु भएकोले अब प्रदेश स्तरको प्रतियोगिताले सो खेललाई स्थापित गराउनेमा आफू विस्वस्त रहेको बताए ।

उनले प्रतियोगितालाई देशभरी नै चिनाउने गरी डोरी तान संघले काम शुरु गर्ने बताए । अन्तर्राष्ट्रिय मापदण्डअनुसार ६४० केजीकोे तौलमा प्रतियोगिता हुने जनाइएको छ । हरेक टिममा ८ जना खेलाडीका दरले खेलाडी प्रतिस्पर्धामा उत्रिने छन् ।

विजेता तथा उपविजेताले क्रमश नगद ५० हजार, २५ हजार रुपैयाँसहित ट्रफी मेडल र प्रमाणपत्र प्राप्त गर्ने छन् । यस्तै तेश्रो हुने टिमलाई समेत १५ हजार रुपैयाँ, ट्रफी, मेडल र प्रमाणपत्र वितरण गरिने डोरी तान संघ बुढीगंगाका अध्यक्ष अशोक अधिकारीले जानकारी दिए ।

प्रतियोगितामा लाग्ने कुल खर्चमध्ये सामाजिक विकास मन्त्रालयले ८ लाख र मोरङ जिल्ला डोरी तान संघले ४७ हजार रुपैयाँ ब्यहोर्ने छ । सामाजिक विकास मन्त्रालयको आयोजनामा भएको प्रतियोगिताको समन्वय क्षेत्रीय खेलकुद विकास समितिले गरेको छ ।

प्रकाशित मिति: शुक्रबार, जेठ २४, २०७६ ०२:३०