बागमतीको प्रदेश प्रमुखबाट हटाइएका प्रसाईं भन्छन्- यो प्रवृत्ति ठिक होइन, म सन्तुष्ट छैन

बागमतीको प्रदेश प्रमुखबाट हटाइएका प्रसाईं भन्छन्- यो प्रवृत्ति ठिक होइन, म सन्तुष्ट छैन

A+ A A-

बागमती प्रदेशका निवर्तमान प्रदेश प्रमुख विष्णुप्रसाद प्रसाईंले ओली सरकारले ल्याएको दल विभाजन सम्बन्धी अध्यादेशको विरोध गर्नेहरूले नै अहिले एमाले फुटाएको दावी गरेका छन् ।

शेरबहादुर देउवाले ल्याएको पार्टी विभाजन गर्ने अध्यादेश कुनै हालतमा ठीक नभएको उनको भनाइ छ । सरकारले प्रदेश प्रमुखबाट हटाएको दुई दिनपछि पत्रकारहरूसँग कुरा गर्दै प्रसाईंले पार्टी फुटाउने अध्यादेश ओलीले ल्याउँदा बेठिक, शेरबहादुरले ल्याउँदा ठिक कसरी भयो भन्दै प्रश्न गरेका थिए ।

निवर्तमान प्रदेश प्रमुख प्रसाईंले शेरबहादुर देउवा नेतृत्वको सरकार संवैधानिक नभएको बताएका छन् । उनले सरकार गैरजिम्मेवार ढंगबाट अघि बढेको पनि आरोप लगाए ।

‘आफू पदमा रहँदा वा नरहँदा समृद्ध नेपाल, सुखी नेपालीको भूमिकामा रहेर काम गरेको छु,’ प्रसाईंले भने । राजनीति गरेरै जिवन बिताएकाले प्रदेश प्रमुखको जिम्मेवारी साँघुरो कोठा जस्तै भएको उनको भनाइ छ ।

आफूलाई प्रदेश प्रमुखबाट हटाएकोप्रति उनले चित्त दुखाएका छन् । प्रदेश सरकार र प्रदेशसभासँग सहकार्य गरेर काम गरेकोमा सरकारले हटाएकोले आफू सन्तुष्ट नभएको बताए ।

‘संघीय सरकारले प्रदेश प्रमुखलाई केही समय राख्ने अनि हटाउने गरेकोप्रति म सन्तुष्ट छैन । एउटालाई हटाउँदै नयाँ नियुक्ति गर्ने प्रवृत्ति ठिक होइन,’ प्रसाईंले भने । उनले अझै पनि देश र जनताका लागि काम गर्ने बताए ।

प्रसाईंले प्रदेश प्रमुखको रुपमा २१ महिना १६ दिन काम गरे । बुधवार अष्टलक्ष्मी शाक्यलाई मुख्यमन्त्रीमा नियुक्त गरी शपथ खुवाएको भोलिपल्टै सरकारले उनलाई हटाएको हो ।

बागमतीका नयाँ प्रदेश प्रमुखलाई प्रसाईंले बधाई पनि दिए । सरकारले प्रदेश प्रमुखमा यादवचन्द्र शर्मालाई नियुक्त गरेको थियो । शर्माले शुक्रबार राष्ट्रपति विद्यादेवी भण्डारीबाट पद तथा गोपनीयताको शपथ लिएका छन् ।

प्रकाशित मिति: शनिबार, भदौ ५, २०७८ ११:३१