प्रहरी नै भाग्ने गरी साेलुखुम्बुमा के भएको थियो ?

फाइल तस्बिर

A+ A A-

सोलुखुम्बुको महाकुलुङ गाउँपालिका–३ छेस्काममा अघिल्लो सातादेखि नै हल्ला थियो, खोटाङ र भोजपुरको सिमानातिर विप्लवका हतियारधारी कार्यकर्ता तालिम गरिरहेका छन् ।

महाकुलुङ गाउँपालिका निकै विकट छ । यस गाउँपालिकाको सीमा पूर्वमा संखुवासभा, पश्चिममा खुम्बु पासाङल्हामु र सोताङ गाउँपालिका, उत्तरमा खुम्बुपासाल्हामु गाउँपालिका तथा दक्षिणमा खोटाङ र भोजपुरसँग जोडिएको छ ।

छिमेकी जिल्लाको जंगलमा विप्लवका कार्यकर्ता हतियारसहित तालिम गरिरहेको भन्ने सुनेपछि गाउँलेहरु त्रसित थिए । तर, आइतबार फेरि अर्को हल्ला चल्यो, ‘विप्लवका कार्यकर्ता त महाकुलुङ छिरिसके रे ।’ त्रास थप बढ्यो ।

महाकुलुङ गाउँपालिका उपप्रमुख विपना कुलुङका अनुसार गाउँपालिकामा अहिलेसम्म विप्लवका कार्यकर्ता भनेर कोही अगाडि देखिएका छैनन् ।

छिमेकी जिल्लाबाट विप्लवका कार्यकर्ता हतियारसहित गाउँ पसे भन्ने हल्ला भएपछि स्थानीयमा त्रास बढ्यो । आइतबार दिउँसै छेस्काम प्रहरी चौकीमा कसैले अर्को खबर पुर्यायो, ‘विप्लव समूहले राति चौकी हान्ने तयारी गरेको छ, उनीहरु २०–२५ जनाको समूहमा छन् ।’

५/७ जनाको संख्यामा रहेका प्रहरी चौकी नै खाली गरेर बिदामा निस्किए । सल्लेरीबाट महाकुलुङमा सुरक्षार्थ खटिएका एक प्रहरी जवानले स्थानीयलाई उदृत गर्दै भने, ‘हतियारसहित केही व्यक्ति राति चौकीभित्र पनि पसेका थिए । तर, कुनै आक्रमण भने गरेनन् ।’

के भन्छन् महाकुलुङ गाउँपालिकाका अध्यक्ष सागर किराती ?

म चार दिनयता सल्लेरीमा छु । प्रहरी चौकीमा आक्रमणको प्रयास भएको हल्लापछि म निरन्तर त्यहाँका सुरक्षाकर्मी र जनप्रतिनिधिसँग सम्पर्कमा छु । आजै बिहान मात्रै मैले छेस्काम प्रहरी चौकीमा फोन गरेको थिएँ । उहाँहरुले गस्तीमा जाँदै छौं भन्नुभएको थियो । आक्रमण भएको होइन भन्नुभयो ।

महाकुलुङ गाउँपालिकामा विप्लवका एकजना पनि कार्यकर्ता छैनन् । तर, भोजपुरको सीमातिर विप्लवका कार्यकर्ता हतियारसहित तालिम गर्दै गरेको हल्ला भने चलेको थियो । त्यसैले एक साता अघिदेखि नै जिल्ला प्रहरी कार्यालय सल्लेरीको टोली महाकुलुङ पुगेर निगरानी बढाएको छ ।

प्रहरी के भन्छ ?

जिल्ला प्रहरी कार्यालय सल्लेरीबाट महाकुलुङ पुगेको प्रहरी टोलीका एक जवानले नाम नबताउने सर्तमा यस्तो बताए :

छेस्काम चौकीका प्रहरी सुरक्षित स्थानतर्फ गएको कुरा सत्य हो । घटनाबारे थप अनुसन्धानचाहिँ भइरहेको छ । विप्लवका कार्यकर्ताले आक्रमण गर्ने तयारी गरेको सूचना पाएपछि प्रहरीहरु चौकी छाडेर भागेको हुन सक्छ । उनीहरुले यो कुरा स्विकारेका छैनन् ।

आइतबार दिउँसोदेखि नै हल्ला चलेको रहेछ कि जंगलमा हतियारधारी समूह लुकेर बसेका छन् । उनीहरुले आइतबार राति नै चौकीमा आक्रमण गर्न लागेको खबर सुराकीको आधारमा चौकीका प्रहरीले थाहा पाएछन् । त्यसपछि उनीहरु त्यहाँबाट हिँडेका रहेछन् । केही स्थानीयले बताएअनुसार हतियारसहित केही व्यक्ति राति चौकीभित्र पनि पसेका थिए । तर, कुनै आक्रमण भने गरेनन् । चौकीभित्र कुनै क्षति भएको छैन ।
काठमाडौंबाट हेलिकाेप्टरमार्फत सुरक्षाकर्मी ल्याइएको छ । सल्लेरीबाट हामी आएका छौं । विराटनगरबाट थप प्रहरी पठाइएको खबर आएको छ ।

टेम्केमैयुङ घटनासँगको कनेक्सन

जेठ ७ मा भोजपुरको टेम्केमैयुङ गाउँपालिका–१, तिम्माको धोद्रे जंगलमा प्रहरीले विप्लवका कार्यकर्तामाथि गोली हानेको थियो । गोली लागेर षडानन्द नगरपालिका–२ कुदाककाउलेका ३२ वर्षीय तीर्थराज घिमिरेको मृत्यु भयो । उनीहरुलाई हतियारसहित तालिम गर्दै गरेको अवस्थामा फेला पारेपछि गोली चलाइएको प्रहरीको दाबी थियो ।

टेम्केमैयुङमा विप्लवका कार्यकर्ता थुप्रै रहेकाे अनुमान प्रहरीको छ । त्यसैले केही दिनयता त्यहाँको सुरक्षा व्यवस्था कडा पारिएको छ । टेम्केमैयुङबाट सुरक्षित स्थान खोज्दै विप्लवका कार्यकर्ता छिमेकी जिल्लाको महाकुलुङ गाउँपालिका पुगेको हुन सक्ने अनुमान गरिएको छ ।

‘टेम्केमैयुङ महाकुलुङबाट टाढै भए पनि बाटोचाहिँ एउटै हो,’ महाकुलुङ गाउँपालिका अध्यक्ष सागर किरातीले भने, ‘महाकुलुङतिर आउने बाटो अरु बाटोको तुलनामा सजिलो छ भने महाकुलुङमा ठूलाठूला जंगल छन्, मध्यवर्ती क्षेत्र छ । त्यसैले टेम्केमैयुङबाट भागेर विप्लवका कार्यकर्ता महाकुलुङको जंगलमा लुकेर बसेको आशंकाचाहिँ गरिएको छ ।’

प्रकाशित मिति: मंगलबार, जेठ २१, २०७६ ००:५०