जसपाको आधिकारिकता नपाएपछि अब महन्थ ठाकुरसँग के छन् विकल्प ?

A+ A A-

निर्वाचन आयोगले जनता समाजवादी पार्टी नेपालको आधिकारिकता अध्यक्ष उपेन्द्र यादव समूहलाई दिएको छ । त्योसँगै निर्वाचन आयोगले महन्थ ठाकुर समूहलाई नयाँ दल दर्ताका लागि आह्वान गरेको छ ।

कांग्रेस हुँदै मधेस केन्द्रीत राजनीतिमा प्रवेश गरेका महन्थ ठाकुरका लागि निर्वाचन आयाेगकाे निर्णय सबैभन्दा ठूलाे झट्का हाे । राजनीतिकाे उत्तरार्धमा ठाकुरलाई जुन झट्का लाग्याे त्यति नै झट्का राजेन्द्र महताेलाई पनि लागेकाे छ । यस्ताे अवस्थामा महन्थ ठाकुर पक्षसँग अब मुख्यतः तीन विकल्प देखिएका छन् ।

कानुनी प्रतिवाद

ठाकुर पक्षका लागि अबको बाटो कानुनी प्रतिवाद हो । निर्वाचन आयोगले गरेको निर्णय चित्तबुझ्दो नभए सर्वोच्च अदालत जान सकिनेछ । आयोगले गर्ने निर्णय उच्च अदालतको फैसला सोसरह हुने भएकाले ठाकुर पक्षलाई सर्वोच्च जाने बाटो खुला नै छ । आयोगको निर्णय चित्त नबुझेको भन्दै ठाकुर पक्ष निर्णय बदर गर्न माग गर्दै अदालत गएको अवस्थामा मुद्दा कहिले टुंगो लाग्ने भर हुँदैन । त्यसैले कानुनी प्रतिवादको चरण भरपर्दो र आशालाग्दो प्रक्रिया भने होइन । ८ साउनमा ठाकुर पक्ष ११ साउनमा आयोगले गर्ने भनेको हेड काउन्टको प्रक्रिया रोक्न माग गर्दै अदालत गएको थियो । अन्तरिम आदेश माग गरेको भए पनि त्यसो हुन सकेन र १५ साउनमा दुवै पक्षलाई अदालतमा बोलाएको छ । त्यसैले जसपाको विवाद जुनसुकै रूपमा भए पनि अदालतसम्म पुग्ने चाहिँ देखिन्छ । तर, ठाकुर पक्षका लागि भरलाग्दो कदमका रूपमा भने दरिने छैन ।

नयाँ दल दर्ता गर्ने

कानुनी प्रतिवादले मात्रै ठाकुर पक्षलाई राहत दिन सक्दैन । निर्वाचन अयाोगले नयाँ दल दर्ता गर्न ठाकुर पक्षलाई आह्वान गरेको छ । अब ठाकुर पक्ष नयाँ दल दर्ताको प्रक्रियामा जानुपर्ने हुन्छ । त्यसो नभएको अवस्थामा यसअघि दर्ता भएका दलसँग मर्ज गर्न पनि सकिन्छ । पहिलादेखि नै ठाकुर पक्ष राजपा ब्युँत्याउने पक्षमा थिए । अब पनि उनीहरू त्यही प्रयासमा हुनेछन् । २८ असारमा राजपा विघटन भएको एक वर्ष पुगेको छ । एक वर्षसम्म त्यही नामको दल दर्ता गर्न नपाउने कानुनी व्यवस्था छ । त्यसैले राजपा विघटनको एक वर्ष पूरा भएकाले त्यही नाममा दल दर्ता गरेर अगाडि बढ्न सक्ने ठाकुर पक्षका नेताहरूको भनाइ छ ।

पार्टीमै रहेर संघर्ष

जसपाको विभाजन दुवै पक्षले नमागेका कारण विभाजन नहुने तर्क पनि केही नेताको छ । ४० प्रतिशत संख्या पुर्‍याएर विभाजन खोजेको भए नयाँ दल दर्तामा जानुपर्ने हुन्थ्यो । जसपा अध्यक्ष उपेन्द्र यादव समूहले आधिकारिकता प्राप्त गरे पनि ठाकुर पक्षले जसपा छोडिहाल्नु नपर्ने तर्क छ । नेता शरतसिंह भण्डारीले पनि दुवै पक्षले दल विभाजन नखोजेको र वैधानिकताको कुरामात्रै भएकाले आयोगले विभाजन गर्न नसक्ने तर्क गरेका छन् । भण्डारीका अनुसार, दुवै पक्षले जसपाकै पक्षमा सनाखत गरेका कारण पार्टीभित्र अल्पमत र बहुमत क्षणिक हुने दाबी गरे ।

ठाकुर पक्षका सांसदको पद के हुन्छ ?

वैधानिक रूपमा पार्टी विभाजन भएको अवस्थामा सांसद पद रहँदैन । राजनीतिक दलसम्बन्धी ऐनले दल विभाजनका लागि केन्द्रीय समिति र संसदीय दल दुवैतिर कम्तीमा ४० प्रतिशत संख्या चाहिन्छ । दल विभाजन गर्दा ४० प्रतिशत नपुग्ने अवस्थामा नयाँ दल दर्ता गर्नुपर्ने हुन्छ र उक्त दलमा सामेल हुने सांसदको पद कायम रहँदैन ।

महन्थ ठाकुर पक्षले केही दिनअघि यो विषयमा पनि छलफल गरेको थियो । छलफलका क्रममा लक्ष्मणलाल कर्णले वैधानिक रूपमा पार्टी विभाजन हुन नसकेको अवस्थामा सांसद पद कायम नरहने बताएका थिए । त्यतिबेलाको छलफलमा मनिष सुमनले यो प्रश्न उठाउँदा कर्णले स्वभाविक रूपमा पद नरहने बताएका थिए भने सर्वेन्द्रनाथ शुक्लले कानुनी परामर्श जारी रहेको बताए । त्यसबेला ठाकुरले पनि नयाँ दल दर्तामा जानुपर्ने बाध्यता रहेको बताएका थिए ।

आयोगले नयाँ दल दर्ता गर्न आग्रह गरेसँग ठाकुर पक्षमा रहेका सांसदहरूको पद धरापमा परेको छ । उनीहरू उपेन्द्र यादव नेतृत्वको पार्टीमै रहने निर्णयमा पुगे भने चाहिँ सांसद पद कायम रहनसक्छ । नयाँ दल दर्ता भयो र त्यसमा सहभागी भएको अवस्थामात्रै सांसद पद खारेजीमा पर्ने हो ।

यो पनि पढ्नुस् :

महन्थको साथले पार्टी जाेगाएका उपेन्द्रले पन्ध्र महिनामै कसरी उल्ट्याए राजनीति ?

निर्वाचन आयोगले दियाे उपेन्द्र यादव समूहलाई जसपाको आधिकारिकता

जेलबाट निर्वाचन आयोग पुगेका रेशम चौधरीले भने- एउटाका पक्षमा हस्ताक्षर गर्न मेरो नैतिकताले दिएन

जेलबाट आयोग पुगेका रेशम चाैधरी बसे तटस्थ, उपेन्द्रका पक्षमा ३४ जना

निर्वाचन आयोगले जसपा विभाजन गराउँदै छ, क्षति उसैले ब्यहोर्छ : शरतसिंह भण्डारी (अन्तर्वार्ता)

पार्टीको आधिकारिकता हामीले पाउने भयौँ, आत्मालोचना गरे महन्थ र राजेन्द्रलाई ढोका खुला छ : उपेन्द्र यादव

निर्वाचन आयोगमा जसपाको हेड काउन्ट : उपेन्द्र समूहमा उत्साह, निरास महन्थ समूह (फोटो फिचर)

सनाखतका लागि कारागारबाट निर्वाचन आयोग पुगे रेशम चौधरी (फोटो फिचर)

प्रकाशित मिति: सोमबार, साउन ११, २०७८ १७:३१