विद्युत् विस्तारको माग राख्दै जनप्रतिनिधि नै बसे अनशन

A+ A A-

गाउँमा विद्युत् विस्तारको माग गर्दै बैतडीको मेलौली नगरपालिकाका जनप्रतिनिधिले नै आमरण अनशन सुरु गरेका छन् ।

गाउँमा विद्युत् विस्तार नभएको भन्दै मेलौली- ९ का वडा सदस्य भीमदत्त भट्ट आमरण अनशनमा बसेका हुन् । वडासदस्य भट्टसँगै स्थानीय बमबहादुर चन्द अनशनमा बसिरहेका छन् । मेलौली नगरपालिका भवनअगाडि उनीहरूले अनशन सुरु गरेका हुन् ।

गाउँमा विद्युत् नभएकै कारण चितुवाको आक्रमणबाट स्थानीयले अकालमा ज्यान गुमाउनुपरिरहेकाले आमरण अनशनमा बसेको वडा सदस्य भट्टले बताए । 'मेलौलीको ८ र ९ नं वडा चितुवाबाट प्रभावित वडा हुन्, चितुवाको आक्रमणबाट बच्नका लागि विद्युत् विस्तारको माग गरेर अनशनमा बसेका हौँ,' उनले भने ।

मेलौली- ८ र ९ को सीमानामा पर्ने डडेल्धुराको भागेश्वरमा विद्युत् पुगिसकेकाले त्यतैबाट विद्युत् विस्तारका लागि पहल गर्नुपर्ने उनीहरूको माग छ । यस आर्थिक वर्षभित्र विद्युत् विस्तारका लागि प्रतिवद्धता नआएसम्म अनशन जारी रहने जनाइएको छ ।

नगरपालिकाका प्रमुख कृष्णसिंह नायकले विद्युत् विस्तारका लागि पालिकाले गर्नुपर्ने सम्पूर्ण प्रयास गरिरहेको बताए । मेलौलीमा सबस्टेसन निर्माणका लागि नेपाल विद्युत् प्राधिकरण प्रादेशिक कार्यालयले प्रक्रिया अघि बढाइसकेकाले जतिसक्दो चाँडो होस् भनेर पालिकाका तर्फबाट समेत समन्वय भइरहेको उनले बताए ।

'विद्युत् विस्तारको काम प्रक्रियामा अघि बढिसकेको छ, अनशन बस्नु खासै आवश्यक छैन, पालिकाका तर्फबाट सबै सरोकारवालालाई विद्युत् विस्तारका लागि पहल गरिरहेका छौँ,' उनले भने ।

यसअघि आइतबार मात्रै मेलौली–८ र ९ का स्थानीयवासीले विद्युत् विस्तारको माग गर्दै नगरप्रमुख नायकलाई ज्ञापनपत्रसमेत बुझाएका थिए ।

प्रकाशित मिति: मंगलबार, असार १५, २०७८ ०९:५८