नगरप्रमुखको प्रतिवद्धतापछि अस्मिताको शव परिवारले बुझे

A+ A A-

डडेल्धुराको परशुराम नगरपालिका–८ को जमरानी स्वास्थ्य केन्द्रमा कार्यरत २६ वर्षीया अस्मिता धामीको शव आफन्तले बुझेका छन् ।

परशुराम नगरपालिकाका प्रमुख भीमबहादुर साउदले अस्मिताको हत्यामा संलग्नलाई कारबाहीको दायरामा ल्याउनेलगायतका विषयमा प्रतिवद्धता जनाएपछि मंगलबार परिवारले अस्मिताको शव बुझेर अन्त्येष्टि गरेको छ ।

धामीका परिवारलाई परशुराम नगरपालिकाले राहत स्वरूप १० लाख दिने निर्णय पनि गरेको छ । नगरप्रमुख साउदले ७ लाख ५० हजार नगरपालिका र २ लाख ५० हजार रुपैयाँ वडाबाट व्यवस्थापन गर्ने कार्यपालिकाको बैठकले निर्णय गरेकोे बताए ।

जिल्ला प्रहरी कार्यालय डडेल्धुराका प्रवक्ता प्रहरी निरीक्षक राजेन्द्रबहादुर चन्दले शवको पोष्टमार्टम सोमबार गरिएको भएपनि रिपोर्ट भने आइसकेको छैन ।

जोगबुढा अस्पतालका चिकित्सकले संकलन गरेको नमुना परीक्षणका लागि काठमाडौं पठाउने तयारी पनि भइरहेको उनले बताए । पोष्टमार्टम रिपोर्ट आइनसकेको भएपनि अस्मिताको हत्या भएको अनुमान प्रहरीको छ ।

घटनाबारे प्रहरी अझै अनुसन्धान गरिरहेको उनले बताए । २ असारमा स्वास्थ्य सामग्री लिएर जोगबुडा अस्पताल हिँडेकी धामी ५ असारमा परशुराम नगरपालिका–९ को हट्वानी सामुदायिक वनमा मृत फेला परेकी थिइन् ।

घटनाबारे अनुसन्धान गर्न जिल्ला प्रहरी कार्यालय डडेल्धुरा, संघीय प्रहरी इकाइ कार्यालय र प्रदेश प्रहरी कार्यालयबाट छुट्टाछुट्टै टोली खटाइएको छ ।

प्रकाशित मिति: मंगलबार, असार ८, २०७८ १४:२१