कैलालीमा खुकुलो बनाउँदै एक साता थपियो निषेधाज्ञा, कुन-कुन नियम फेरिए ?

A+ A A-

कैलालीमा जारी भएको निषेधाज्ञा पुनः थपिएको छ । सोमबार कैलालीका प्रमुख जिल्ला अधिकारी खगेन्द्र प्रसाद रिजालको अध्यक्षतामा बसेको जिल्ला कोभिड–१९ संकट व्यवस्थापन केन्द्र(डीसीएमस)को बैठकले १४ असारसम्म निषेधाज्ञा लम्ब्याउने निर्णय गरेको हो ।

बैठकले निषेधाज्ञालाई खुकुलो पार्दै १४ असार राति १२ बजेसम्मका लागि लम्ब्याउने निर्णय गरेको छ । निषेधाज्ञाको समयमा सार्वजनिक यातायातका सबै सवारी साधन बन्द रहनेछन् । निजी सवारी साधन भने जोर बिजोर प्रणाली लागू गर्ने निर्णय भएको छ । जोर बिजोर प्रणाली अन्तरगत नै ट्याक्सी र अटो बढीमा २ राखेर सञ्चालन गर्न पाइने छ ।

त्यस्तै, अत्यावश्यक सामग्री प्रवाह गर्नेबाहेक सबै खाले पसलहरू प्रत्येक दिन बिहान ६ बजेदेखि दिउँसो ३ बजेसम्म खुला गर्ने निर्णय गरिएको छ । उद्योग, कलकारखाना लगायत, सार्वजनिक तथा निजी निर्माण कार्य सञ्चालन गर्न पाइने छन् ।

यस्तै, होटल रेष्टुरेन्ट, खाजा पसलले होम डेलिभरी तथा टेक अवे सेवा(खाना र खाजा लगेर जानुपर्ने) बिहान ८ देखि बेलुकी ८ बजेसम्म सञ्चालन गर्न पाउनेछन् ।

अब सरकारी कार्यालय, सार्वजनिक निकाय, बैंक वित्तीय संस्थाहरू, गैरसरकारी संस्था स्वास्थ्य सुरक्षाका मापदण्ड अपनाएर तथा आलोपालो गरी सञ्चालन गर्न सकिने छ । सबै प्रकारका सभा सम्मेलन, गोष्ठी तथा भीडभाड हुने स्थान बन्द रहनेछन् । विवाह ब्रतबन्धको हकमा स्वास्थ्य मापदण्ड पालना गरी बढीमा १० जनासम्म मात्रै भेला हुन पाउने छन् ।