स्वास्थ्यकर्मी अस्मिता मृत्यु प्रकरण : यस्तो आयो पोस्टमार्टम रिपोर्ट

A+ A A-

डडेल्धुराको परशुराम नगरपालिका- ८ को जमरानी आधारभूत स्वास्थ्य इकाइ केन्द्रकी स्वास्थ्यकर्मी २६ वर्षीया अस्मितादेवी धामीको पोस्टमार्टम रिपोर्ट आएको छ । पोस्टमार्टम रिपोर्टमा उनको हत्या र बलात्कार भएको नदेखिएको प्रहरीले जनाएको छ ।

जिल्ला प्रहरी कार्यालयका एक प्रहरी अधिकारीका अनुसार पोस्टमार्टम रिपोर्टमा उनको बलात्कारपछि हत्या भएको भन्ने विषयमा कुनै तथ्य फेला परेको छैन । उनले भने, 'अहिले नै अनुसन्धान सकिएको छैन । उनको भिसेरा परीक्षणका लागि पनि पठाएका छौँ ।’

अस्मिता २ असारमा कार्यालयबाट कोरोनाको बचत खोप र स्वास्थ्य सामग्री लिएर जोगबुडा अस्पताल हिँडेकी थिइन् । २ असारमा हराएकी धामी ५ असारमा परशुराम नगरपालिका–९ को हट्वानी सामुदायिक वनमा फेला परेकी थिइन् ।

धामीको शव मूलबाटोदेखि ६० देखि ७० मिटरको दूरीमा फेला परेको थियो । त्यसको केही तल उनले बोकेको कोभिड भ्याक्सिन बक्स र केहीमाथि चप्पल फेला परेको थियो । उनको मुखमा चोट लागेको अवस्थामा शव फेला परेको प्रहरीले बताउँदै आएको छ ।

यता, घटनाको अनुसन्धानका लागि जिल्ला प्रहरी कार्यालय डडेल्धुरा, संघीय प्रहरी इकाइ कार्यालय र प्रदेश प्रहरी कार्यालयबाट छुट्टाछुट्टै टोली खटाइएको छ ।

न्याय माग्दै आफन्त सडकमा

स्वास्थ्य केन्द्रमा कार्यरत धामीको न्याय माग्दै आफन्त सडकमा आएका छन् । सोमबार मृतक धामीका आफन्त हत्यामा संलग्नलाई कारबाहीको माग गर्दै आन्दोलनमा उत्रिएका हुन् ।

उनका आफन्तले ‘अस्मितालाई न्याय दे, घटनाको सत्यतथ्य छानबिन गर, महिलाहिंसा अन्त्य गर, धामीको हत्या गर्नेलाई फासी दे, स्थानीय सरकार कान खोल’ भन्दै नाराबाजी गरेका छन् ।

त्यस्तै, उनीहरूले आज परशुराम नगरपलिका प्रमुख भीमबहादुर साउँदलाई ६ बुँदे ज्ञापनपत्र बुझाएका छन् । हत्याको सत्यतथ्य र निष्पक्ष छानबिन गर्न तथा दोषीलाई हदैसम्मको कारबाहीका लागि उनीहरूले माग गरेका छन् ।

खोप पुर्‍याउन हिँडेकी स्वास्थ्यकर्मीको शव जंगलमा भेटियो, खुट्टा र नाकमा चोट, दुईवटा प्रहरी टोलीले अनुसन्धान गर्दै

प्रकाशित मिति: सोमबार, असार ७, २०७८ १६:५१