खोप पुर्‍याउन हिँडेकी स्वास्थ्यकर्मीको शव जंगलमा भेटियो, खुट्टा र नाकमा चोट, दुईवटा प्रहरी टोलीले अनुसन्धान गर्दै

खोप पुर्‍याउन हिँडेकी स्वास्थ्यकर्मीको शव जंगलमा भेटियो, खुट्टा र नाकमा चोट, दुईवटा प्रहरी टोलीले अनुसन्धान गर्दै

A+ A A-

डडेल्धुराको परशुराम नगरपालिका- ८ को जमरानी आधारभूत स्वास्थ्य इकाइ केन्द्रमा कार्यरत स्वास्थ्यकर्मीको शव शनिबार फेला परेको छ ।

२६ वर्षीया अस्मितादेवी धामीको शव चार दिनपछि फेला परेको प्रहरीले जनाएको छ । शव परशुराम नगरपालिका- ९ को हट्वानी सामुदायिक वनमा फेला परेको हो ।

अस्मिता २ असारमा कार्यालयबाट कोरोनाको बचत खोप र स्वास्थ्य सामग्री लिएर जोगबुडा अस्पताल हिँडेकी थिइन् । उनको मुखमा चोट लागेको अवस्थामा शव भेटिएको जिल्ला प्रहरी कार्यालय डडेल्धुराका प्रहरी नायब उपरीक्षक महेन्द्र नेपालले शिलापत्रलाई बताए । पोस्टमार्टमपछि मात्रै हत्या वा अन्य कारणले मृत्यु भएको हो भन्ने खुल्ने उनले बताए ।

उनले भने, ‘नाकको डाँडी र मुखमा चोट देखिन्छ, अहिले नै हत्या वा आत्महत्या भन्न सकिँदैन । पोस्टमार्टम रिपोर्टपछि मात्रै बाँकी कुरा खुल्छ । हामी अहिले अनुसन्धानमै छौँ ।'

मृतक धामीको शव मूलबाटोदेखि ६० देखि ७० मिटरको दूरीमा फेला परेको हो । त्यसको केही तल उनले बोकेको कोभिड भ्याक्सिन बक्स र केहीमाथि चप्पल फेला परेको थियो । शव पोस्टमार्टमका लागि जोगबुडा अस्पतालमा राखिएको र आजै पोस्टमार्टम हुने प्रहरीले जनाएको छ ।

धनगढीबाट दुईवटा प्रहरी टोली परिचालन

घटनाको अनुसन्धानका लागि प्रदेश प्रहरी कार्यालयले धनगढीबाट दुईवटा प्रहरी टोली परिचालन गरेको छ । आइतबार संघीय प्रहरी इकाइ कार्यालय र प्रदेश प्रहरी कार्यालयबाट छुट्टाछुट्टै टोली खटाइएको हो ।

सुदूरपश्चिम प्रदेश प्रहरी कार्यालयका प्रवक्ता प्रहरी उपरीक्षक योगेन्द्र थापाले घटनाको अनुसन्धानका लागि संघीय प्रहरी इकाइ कार्यालयका प्रहरी नायब उपरीक्षक लक्ष्मण शाहीको नेतृत्वमा टोली खटाइएको बताए ।

उनका अनुसार सोही घटनाको अनुसन्धानका लागि सुदूरपश्चिम प्रदेश अनुसन्धान समूह (आरआईटी) को टोली पनि खटाइएको छ ।

प्रकाशित मिति: आइतबार, असार ६, २०७८ १२:३४