खेल क्षेत्रको विकासका निम्ति खेलकुदमन्त्रीले माग सुझाव

A+ A A-

युवा तथा खेलकुदमन्त्री एकवाल मियाँले खेल क्षेत्रको विकासका लागि खेल क्षेत्रका व्यक्तित्वसँग आवश्यक सल्लाह–सुझाव मागेका छन् । शनिबार 'ओलम्पिकि डे'का अवसरमा आयोजित कार्यक्रममा बोल्दै मन्त्री मियाँले आफूले युवा तथा खेलकुद मन्त्रालय अन्य मन्त्रालयभन्दा राम्रो बनाउन चाहेको उल्लेख गर्दै मन्त्रालयलाई राम्रो बनाउनका निम्ति सरोकारवालासँग सल्लाह, सुझाव माग गरेका हुन् ।

आफ्नो ध्यान खेलकुद क्षेत्रमा राम्रो योजना र रणनीति बनाउनको लागि भएको भन्दै त्यसनिम्ति खेल क्षेत्रका व्यक्तिहरूको सुझाव र सहयोग आवश्यक रहेको उनले बताए । उनले राष्ट्रिय खेलकुद परिषद्को नियमावली छिट्टै बनाउनको लागि टिम बनाउने पनि बताए ।

‘मन्त्रालयलाई अझ राम्रो कसरी लान सकिन्छ त्यसमा मेरो बढी ध्यानाकर्षण भएको छ । कसरी सहकार्य गरेर राम्ररी रणनीति बनाएर, प्लान बनाएर मन्त्रालय र अरु सम्बन्धित सबैलाई कसरी राम्रो बनाउन सकिन्छ भनेर मेरो ध्यान अगाडि बढेको छ । खेल क्षेत्रको विकासका लागि राय, सल्लाह, सुझाव दिनुस् । राष्ट्रिय खेलकुद परिषद्को ऐन आइसकेको छ । अब नियमावली पनि बनाउने म चाँडै टिम तयार पार्दैछु । कानुन विज्ञ, खेलका विज्ञहरूलाई ड्राफ्ट उपलब्ध गराउँछु । त्यसमा के थपेर जाँदा हुन्छ छलफल गरौँ । अझ राम्रो कसरी गर्न सकिन्छ, त्यसमा राय–सुझाव पाउँ’ उनले भने ।

नेपाल ओलम्पिक कमिटीका अध्यक्ष जीवनराम श्रेष्ठले खेलकुद क्षेत्रले विश्वव्यापी रूपमा भ्रातृत्व र मित्रता बढाएको बताए । खेलले शान्ति र विकासको कुरा अगाडि बढाइरहेको पनि उनले बताए । उनले कोभिड १९ को प्रोटोकललाई मान्दै सुरक्षित भएर खेल क्षेत्रलाई अगाडि बढाउनुपर्ने बताए । उनले ओलम्पिक डे को माध्यमबाट सबैले आफ्नो जीवनलाई सक्रिय बनाउने सन्देश दिन चाहेको पनि उल्लेख गरे ।

प्रकाशित मिति: शनिबार, असार ५, २०७८ १५:४२