प्रधानमन्त्रीले उद्घाटन गरेको कृषि बजारमा झार उम्रियो

A+ A A-

प्रधानमन्त्री केपी शर्मा ओलीले साडे दुई महिनाअघि उद्घाटन गरेको एकीकृत फलफूल तथा तरकारी थोक बजार अझै सञ्चालनमा आएकाे छैन । विश्व बैंकको १६ करोड रुपैयाँ लगानीमा निर्माण भएको उक्त बजारको गत ३ चैतमा प्रधानमन्त्रीले उद्घाटन गरेका थिए ।

प्रदेश १ सरकार सञ्चालन हुने गरी मोरङको कटहरी गाउँपालिकास्थित जमटोकीमा निर्मित बजारमा अहिले झार उम्रिएको छ । प्रधानमन्त्री ओलीलले प्रदेशका मुख्यमन्त्री शेरधन राईलाई साँचो हस्तान्तरण गरेर बजारको उद्घाटन गरिएको थियो ।

प्रदेश सरकारले बजार सञ्चालनका लागि नीति बनाउनुपर्ने थियो । तर, प्रदेश सरकारको निष्क्रियताका कारण बजार सञ्चालनमा आउन नसकेको हो । कटहरी गाउँपालिकाका अध्यक्ष रामकुमार कामतले गाउँपालिका र प्रदेश सरकारबीचको सहमतिमा सो बजार सञ्चालन हुनुपर्ने भए पनि अझै कुनै छलफल नभएको बताए ।

गाउँपालिकालाई नै बजार सञ्चालनको जिम्मा दिए सहज हुने उनको तर्क छ । ‘प्रधानमन्त्रीले उद्घाटन गरेर प्रदेशका मुख्यमन्त्रीज्यूलाई साँचो हस्तान्तरण गर्नुभएको छ । अब प्रदेश सरकार र गाउँपालिकाको सहमतिमा सञ्चालन गर्ने कुरा भएको छ,’ उनले भने, ‘तर, हालसम्म कुनै संवाद र छलफल भएको छैन । अहिलेसम्म केही त्यस्तो कुरा जानकारीमा छैन ।’

अध्यक्ष कामतले कटहरी गाउँपालिका महानगरपालिकासँग जोडिएको हुनाले र सो गाउँपालिकामा पर्याप्त कृषि उत्पादन हुने भएकाले कृषकले सहज बजार पाउने बताए । उनले सो बजार सञ्चालनमा आए धेरै कृषक र स्थानीय लाभान्वित हुने बताए । उनले भने, ‘यहाँ कृषि उत्पादन धेरै छ । मोरङमै सबैभन्दा बढी तरकारी खेती यही गाउँपालिकामा हुन्छ । यहाँ र आसपासका धेरै किसान दाजुभाइ लाभान्वित हुनुहुनेछ । धेरैलाई रोजगारीको अवसरसमेत सिर्जना हुनेछ ।’

प्रदेश १ का भूमि व्यवस्था, कृषि तथा सहकारी मन्त्रालयले भने सो बजार सञ्चालनको विधि तथा प्रकृया तयार नभई प्रदेश सरकारलाई हस्तान्तरण भएको र उक्त बजार व्यवस्थापनका लागि विधि प्रक्रिया तयार भइरहेको जनाएको छ ।

मन्त्रालयका सचिव हस्तबहादुर विष्टले बजार सञ्चालनको कार्यविधि निर्माणको काम अन्तिम चरणमा रहेको जानकारी दिए । उनले सो बजार सञ्चालन कार्यविधि प्रदेश मन्त्रिपरिषद्बाट स्वीकृत हुनेबित्तिकै बजार सञ्चालनमा ल्याउने प्रक्रियामा लागिपरेको दाबी गरे ।

‘थोक कृषि बजार संघीय सरकारबाट निर्माण भएको हो,’ उनले भने, ‘सुरुमा निर्माण गर्दाको चरणमा प्रदेश सरकालाई हस्तान्तरण गर्ने भन्ने कुराहरु थिएन र पछि आएर प्रदेश सरकारलाई सञ्चालनको विधि प्रक्रिया तयार नगरी हस्तान्तरण गरियो ।’

उनका अनुसार कार्यविधि प्रदेश मन्त्रिपरिषद्बाट स्वीकृत भएपछि बजार सञ्चालनमा आउनेछ । ‘अबको १० दिनभित्र बजार सञ्चालन हुन्छ,’ उनले भने ।

स्थानीय जनप्रिय माविको ४ बिघा २ कठ्ठा र कटहरी गाउँपालिकाको करिब १८ कठ्ठा २ धुर जग्गा ५० वर्षका लागि भाडामा लिएर २०६८ सालमा सो कृषि बजारको निर्माण थालिएको थियो ।

मन्त्रालयका अनुसार कृषि बजारमा थोक बिक्री कक्ष, कृषक बिक्री सेड, विभिन्न ३० वटा स्टल, प्रशासकीय भवन, बैंक शाखा, चमेना गृह, सार्वजनिक शौचालय, मेनजेर आवास, कृषक अतिथि गृह, गार्ड आवास, फोहोर संकलन केन्द्र, लोडिङ अनलोडिङ क्षेत्र, डिप ट्युबवेल, पानी प्रशोधन केन्द्र तथा पार्किङ क्षेत्रको सुविधा रहनेछ ।

बजारभित्र १ हजार ४ सय ८८ स्क्वायर मिटरको १७ वटा होलसेल पसल र ३ सय ५१ स्क्वायर मिटर क्षेत्रमा खुद्रा बजार रहेको सचिव विष्टले जानकारी दिए । सञ्चालनमा आएपछि सो बजारमा किसानले उत्पादन गरेको तरकारी र फलफूल सोझै बजारमा लगेर बिक्री गर्न पाउनेछन् । बजारभित्र १ सय ३८ स्क्वायर मिटरमा खुद्रा पसल रहने व्यवस्था मिलाइएको छ ।

बजारभित्र फोहोर संकलन र व्यवस्थापनका लागि छुट्टै यार्ड छ । पानी आपूर्तिका लागि फिल्टरसहितको डिप ट्युबवेल, जेनेरेटर र सोलारको व्यवस्था गरिएको छ । सीसी क्यामराको निगरानीमा रहने बजारमा आगलागी नियन्त्रण गर्न भूमिगत रुपमा पानीको व्यवस्थापन पनि गरिएको छ ।

वार्षिक ४४ हजार ९ सय ६६ मेट्रिक टन तरकारी र १० हजार मेट्रिक टन फलफूल बिक्री गर्न मिल्ने बजारको क्षमता रहेको सचिव विष्टले जानकारी दिए ।

प्रकाशित मिति: सोमबार, जेठ १३, २०७६ ०२:३३