प्रदेश १ : राष्ट्रपति आमा सुरक्षा कार्यक्रममा कांग्रेसको टिप्पणी- प्रधानमन्त्री बा कार्यक्रमचाहिँ खोइ त ?

प्रदेश १ : राष्ट्रपति आमा सुरक्षा कार्यक्रममा कांग्रेसको टिप्पणी- प्रधानमन्त्री बा कार्यक्रमचाहिँ खोइ त ?

A+ A A-

नेपाली कांग्रेसले आगामी आर्थिक वर्षका लागि प्रदेश १ सरकारले ल्याएको नीति तथा कार्यक्रम झुटको पुलिन्दा मात्र भएको टिप्पणी गरेको छ ।

प्रदेशसभामा पेश भएको नीति तथा कार्यक्रममाथिको छलफलमा नेपाली कांग्रेसका प्रमुख सचेतक केदार कार्कीले प्रत्येक वर्ष सरकारले नीति तथा कार्यक्रम ल्याए पनि कार्यान्वयन गर्न नसकेको आरोप लगाउँदै यसपटक पनि जनतालाई झुक्याउन झुटको पुलिन्दा ल्याएको बताए ।

‘सरकारले प्रत्येक वर्ष फुलबुट्टा भरेर कपिपेष्ट गर्दै नीति तथा कार्यक्रम ल्याउँछ । अघिल्लो वर्षकै कार्यान्वयन हुन सकेको छैन,’ उनले भने, ‘झुटका पुलिन्दालाई एकिकृत गरेर नीति कार्यक्रम ल्याएको छ ।’

प्रमुख सचेतक कार्कीले पछिल्लो राजनीतिक घटनाक्रमका कारण मुख्यमन्त्री शेरधन राई प्रदेशमा बलियो बनेकाले उत्कृष्ट नीति कार्यक्रम ल्याउने अपेक्षा गरे पनि त्यसो हुन नसकेको बताए ।

सहज अवस्था भएकाले सरकारले कार्यान्वयन गर्न सक्ने नीति कार्यक्रम ल्याउने अपेक्षा गरेको भए पनि त्यो नभएको उनले बताए । मुख्यमन्त्री राई प्रधानमन्त्री ओलीसँग उखान टुक्का सिक्न गएको उनको व्यङ्ग्य थियो ।

‘यसपालि मुख्यमन्त्रीको दौडधुप देखेर राम्रो नीति कार्यक्रमका लागि त्यासो गरिएको जस्तो लागेको थियो,’ उनले भने, ‘तर, उहाँ त काठमाडौं ट्युसन पढ्न जाँदै उखान टुक्का पो सिकेर आउनु भएछ ।’

उनले नीति तथा कार्यक्रममा राष्ट्रपति आमा सुरक्षा कार्यक्रम समेटिएकोप्रति पनि व्यङ्ग्य गरे । ‘राष्ट्रपति आमा सुरक्षा कार्यक्रम मात्र किन ? प्रधानमन्त्री ओली सत्ता पक्ष, प्रतिपक्ष र विरोधीको पनि बा हुनुहुन्छ । प्रधानमन्त्री बा कार्यक्रम किन ल्याइएन ?’ उनले भने, ‘प्रधानमन्त्री बा कार्यक्रमचाहिँ चाहिँदैन ? बालाईचाहिँ सुरक्षा चाहिँदैन ?’ उनले यथार्थमा टेकेर बजेट ल्याउन सरकारलाई सुझाव दिए ।

प्रकाशित मिति: शुक्रबार, जेठ २८, २०७८ १३:००