यस्तो छ प्रदेश १ को नीति तथा कार्यक्रम (पूर्णपाठ)

A+ A A-

प्रदेश १ सरकारको आगामी आर्थिक वर्ष २०७८/०७९ को नीति तथा कार्यक्रम प्रदेशसभामा पेस गरिएको छ । प्रदेशसभाको आठौँ तथा बजेट अधिवेशनको चौथो बैठकमा प्रदेश प्रमुख सोमनाथ अधिकारी प्यासीले आगामी आर्थिक वर्षको नीति तथा कार्यक्रम पेस गरेका हुन् । नीति तथा कार्यक्रममा सरकारले स्वास्थ्यक्षेत्रलाई उच्च प्राथमिकतामा राखेको छ ।

नीति तथा कार्यक्रममा सबै प्रकारका भेदभाव उन्मूलन, नागरिक स्वतन्त्रतालगायतका मौलिक हकहरूको कार्यान्वयन एवं कानुनी राज्यको मूल्य र मान्यतालाई स्थापित गर्ने नीति अख्तियार गरिने उल्लेख गरिएको छ ।

कोभिड–१९ को महामारीबाट नागरिकलाई बचाउन जनस्वास्थ्य, अस्पताल, स्वास्थ्य केन्द्र, सरसफाइ र पोषणसँग सम्बन्धित कार्य प्रदेश सरकारको मुख्य प्राथमिकतामा राखी अगाडि बढाइने नीति तथा कार्यक्रममा उल्लेख छ ।

त्यस्तै, कोभिडविरुद्धको खोपमा सबै प्रदेशवासीको सरल र सहज पहुँचलाई सुनिश्चित गर्न 'डिजिटल स्वास्थ्य, डिजिटल प्रदेश' कार्यक्रम कार्यान्वयनमा ल्याइनेछ । यसअन्तर्गत प्रदेश सरकारले पालिकाहरूको समन्वय र सहकार्यमा जिल्ला अस्पताल तथा स्थानीय निकायका अस्पताल एवं स्वास्थ्य केन्द्रहरूमा अनलाइन दर्ता गर्ने व्यवस्था मिलाइनेछ ।

त्यस्तै, डिजिटल साक्षर नभइसकेका गाउँ तथा टोलहरूका लागि स्थानीय वडाहरूलाई क्रियाशील बनाइनेछ । इलेक्ट्रोनिक स्वास्थ्य अभिलेख राख्ने, दूरचिकित्सा परामर्श र सेवा उपलब्ध गराउनेतर्फ पद्धति विकास गरी डिजिटल प्रदेशको अवधारणालाई स्वास्थ्यको क्षेत्रमा द्रुत गतिमा कार्यान्वयनको सुरुवात गरिनेछ ।

औषधि, अक्सिजनलगायतका स्वास्थ्य सामग्रीको सहज आपूर्ति तथा वितरण व्यवस्थापनका लागि संघीय सरकारसंगको समन्वय तथा सहकार्यमा सबै संशाधनको अधिकतम परिचालन गर्ने व्यवस्था मिलाइनेछ ।

कोरोनाले स्वरूप परिवर्तन गरिरहेको र नयाँ जोखिम उत्पन्न भएको परिस्थितिमा विपत् प्रतिकार्यको लागि प्रदेशको सबै अंग र कार्यमा आवश्यक तत्परता समावेश हुने गरी योजनाको निर्माण गरिनेछ ।

यस्तै, राजनीतिक दल, समुदाय, निजीक्षेत्र, सञ्चार जगत् तथा नागरिक समाजसँगको समन्वय र सहभागितामा विद्यालय तथा समुदायमा स्वास्थ्य चेतनाका कार्यक्रमहरू सञ्चालन गरिनेछ ।

यस्तै, कोभिड प्रतिकार्यमा संलग्न स्वास्थ्यकर्मीलगायत सुरक्षा निकायका राष्ट्रसेवकहरूको मनोबल अभिवृद्धि गर्न अतिरिक्त पारितोषिकको व्यवस्था गरिनेछ । संघीय सरकारसंगको सहकार्यमा समुदायमा कार्यरत महिला स्वास्थ्य स्वयंसेविकाहरूको उत्प्रेरणा वृद्धिका लागि अतिरिक्त सुविधा प्रदान गरिनेछ । साथै, कडा रोग लागेको अवस्थामा उपचार खर्चको व्यवस्था गरिनेछ ।

प्रकाशित मिति: बिहीबार, जेठ २७, २०७८ १८:१४