सुन तस्करी प्रकरणका आठ जनालाई थुनामा राख्न आदेश

A+ A A-

लगभग ३८ क्वीन्टल सुन तस्करी र मोरङ उर्लाबारीका सनम शाक्य हत्या प्रकरणमा मुछिएका तस्करीको सुनका लगानीकर्ता भनिएका भुजुङ गुरुङसहित आठ जनालाई उच्च अदालत विराटनगरले थुनामा राख्न आदेश दिएको छ ।

जिल्ला अदालत मोरङको आदेश पछि थुनामा रहेकाहरुले उच्चमा दिएको निवेदनको बिहिबार सुनुवाई गर्दै उच्च अदालत विराटनगरले आठ जनालाई थुनामै राख्न आदेश दिएको हो । कामु मुख्य न्यायाधीश शिवराज अधिकारी र लेखनाथ घिमिरेको इजलासले भुजुङ सहित आठ जनालाई थुनामा राख्न आदेश दिएको उच्च अदालत विराटनगरका रजिस्ट्रार नारायण रेग्मीले जानकारी दिए ।

यसअघि सुन मुद्दाका मुख्य आरोपीलाई छाड्ने विवादास्पद आदेश दिने उच्च अदालतमा मुख्य न्यायाधीश डा. कुलरत्न भुर्तेलसहित छ जना न्यायाधीशलाई न्यायपरिषद्ले काजमा तानेको थियो ।

छ जना न्यायाधीश तानिएपछि आज उच्च अदालतले भुजुङ गुरुङ, दोराम खत्री, विरेन्द्रमान श्रेष्ठ, राजु महर्जन, कपिलराज पुरी, फाल्दुङ फुल्टुङ भनिने लक्षुबहादुर गुरुङ, बेनु श्रेष्ठ, डाक्टर डेभिट भनिने छिरिङ वाङ्ला घलेलाई थुनामै राख्ने जिल्लाको आदेश सदर गरेको हो ।

जिल्ला अदालत मोरङका न्यायाधीश नारायणप्रसाद शर्माको इजलासले गत जेठ ८ गते पुर्पक्षकालागि थुनामा राख्ने आदेश दिएका थिए भने जेठ २९ गते खत्रीलाई थुनामा राख्ने आदेश दिएको थियो ।

अदालतले अबु सलाम खान भनिने शैयाद अकबर र डब्बु भनिने इस्तियाज उद्दिनलाई भने जनही १० लाख धरौटीमा छाड्न आदेश दिएको रजिष्ट्रार रेग्मीले बताए । उच्च अदालत विराटनगरले बालकृष्ण खडका, ठाकुरप्रसाद ढुंगाना, रेवत भन्ने रेवतकुमार आचार्य, बिनोद अधिकारी र मोतिराम श्रेष्ठलाई धरौटीमा छाड्ने जिल्लाको आदेश पनि सदर गरेको छ ।

पाँच जनालाई जिल्ला अदालतले धरौटीमा छाड्न आदेश दिएको थियो । सुन तस्करी प्रकरणमा गृह मन्त्रालयले गठन गरेको छानविन समितिले मोरङ प्रहरी मार्फत गत बैसाख १९ गते जिल्ला अदालत मोरङमा ‘आपराधिक समूह स्थापना र संचालन गरी सुन चोरी पैठारी र चोरी निकासीको अवैध कारोवार, अपहरण तथा शरीर बन्धक र कर्तव्य ज्यान’ मुद्धा दायर गरेको थियो ।

सो मुद्दामा १७ अर्व एक करोड ८० लाख ७१ हजार चार सय ७३ रुपैयाँ बरावरको ३७ लाख ९९ हजार ५ सय ६३ ग्राम (करिव ३८ क्वीन्टल) अवैध रुपमा सुन आयात गरिएको दावी गरिएको छ ।

प्रकाशित मिति: शुक्रबार, माघ २५, २०७५ ०८:३६