आफन्तबाटै कोरोना संक्रमितको दाहसंस्कार हुन थालेपछि समुदाय त्रसित

A+ A A-

सरकारी तबरबाट शव व्यवस्थापनमा ढिलाइ भएपछि कोरोना संक्रमितको दाहसंस्कार आफन्तबाटै हुँदा समुदायमा संक्रमण फैलिने भयले स्थानीयवासी त्रसित देखिएका छन् ।

कोरोना भाइरसको लक्षण देखिएपछि गत ३१ वैशाखमा रोल्पा अस्पतालमा भर्ना भएका रोल्पा नगरपालिका– २, सदरमुकाम लिवाङका एक व्यक्तिको अक्सिजनको मात्रा नबढेपछि थप उपचारका लागि जिल्लाबाहिर लैजाने क्रममा बाटैमा मृत्यु भयो ।

शव अस्पताल पुर्‍याएका आफन्तहरू लामो समय कुर्दासमेत सरकारी तबरबाट शव व्यवस्थापन गर्नेबारे चासो नदेखाउँदा आफन्तहरूले नै शव व्यवस्थापनका गर्न बाध्य भएको बताएका छन् ।

यस्तै, कोरोना भाइरसका कारण केही दिनअघि मृत्यु भएका सुनील स्मृति गाउँपालिका– ४ का एक पुरुषको आफन्तले नै अन्त्येष्टि गरेका थिए ।

कोरोनाका कारण मृत्यु हुनेको संख्या रोल्पामा बढिरहेको छ । जिल्ला प्रशासन कार्यालयका अनुसार सोमबारसम्म जिल्लामा कोरोनाका कारण मृत्यु हुनेको संख्या सात पुगेको छ ।

यसरी मृत्यु भएकाहरूमध्ये अधिकांशको अन्त्येष्टि परिवारले नै गरेका छन् । नातेदार वा छिमेकीको मृत्युपछि दाहसंस्कारका लागि मलामी जानुपर्ने सामाजिक दायित्वका कारण दाहसंस्कारमा समेत जमघट हुने क्रम बढ्दै जान थालेसँगै कोरोनाले महामारी लिने कुराले जनमानसमा त्रास सिर्जना गरेको छ ।

'कोरोना संक्रमितको परिवारबाट गरिने अन्त्येष्टिले कारोना संक्रमण भयावह हुने देखिन्छ,' छिमेकीको मृत्युसँगै अन्त्येष्टिमा उपस्थित भएर फर्किएका रोल्पा नगरपालिका– ४ का विनोद आचार्यले भने । मृतकको शव परिवारका सदस्यहरूले समेत छुने गर्दा परिवारका सदस्यमा पनि संक्रमणको उच्च जोखिम रहेको उनको भनाइ छ ।

आफन्तको मृत्युभएपछि १ घण्टा पर्खंदासमेत सेनाको टोली नआएपछि आफूहरूले नै शवको व्यवस्थापन गरेको रोल्पा नगरपालिका– ४ का धनराज डाँगीले बताए ।

'कोरोनाबाट अस्पतालमा मृत्यु भएकाहरूलाई प्लास्टिकले राम्रोसँग मोडेर संक्रमण बाहिर नजाने गरी शवको अन्त्येष्टि गरिनुपर्ने हुन्छ । आफन्त र अस्पतालको समन्वयबिना शवको अन्त्येष्टि गर्ने भन्ने कुरा नै हुँदैन,' प्रमुख जिल्ला अधिकारी नवराज सापकोटाले बताए ।

'कोभिडका कारण मृत्यु भएको सुनिश्चित नभएसम्म सेना जाँदैन', प्रजिअ सापकोटाले भने । कोरोनाको पहिलो लहरको बेला सबै शव सेनाले नै व्यस्थापन गर्ने नियम भए पनि दोस्रो लहरमा मृतकका आफन्तले अन्त्येष्टि गर्न चाहे उनीहरूलाई दिने नियम रहेको उनको भनाइ छ ।

प्रकाशित मिति: मंगलबार, जेठ ४, २०७८ १४:२३