मुख्यमन्त्री शाहीले आफैँसँग राखे पाँच मन्त्रालय, नवनियुक्त मन्त्रीको सपथ अन्यौलमा

मुख्यमन्त्री शाहीले आफैँसँग राखे पाँच मन्त्रालय, नवनियुक्त मन्त्रीको सपथ अन्यौलमा

A+ A A-

मुख्यमन्त्री महेन्द्रबहादुर शाहीले पाँचवटा मन्त्रालय आफैँसँग राखेका छन् । दुई मन्त्रीलाई राजीनामा गर्न लगाएर तीन नयाँ मन्त्री थपेका मुख्यमन्त्री शाहीले पाँचवटा मन्त्रालय आफैँसँग राखेका हुन् ।

उनले आन्तरिक मामिला तथा कानुनमन्त्री नरेश भण्डारी र आर्थिक मामिला तथा योजनामन्त्री विमला केसीलाई राजीनामा गर्न लगाएर सबै मन्त्रालय आफैँसँग राखेका हुन् ।

मुख्यमन्त्री शाहीले मुख्यमन्त्री तथा मन्त्रिपरिषद्को कार्यालय, सामाजिक विकास मन्त्रालय, आन्तरिक मामिला कानुन युवा तथा खेलकुद मन्त्रालय, जलस्रोत तथा ऊर्जा विकास मन्त्रालय र आर्थिक मामिला तथा योजना मन्त्रालय आफैँसँग राखेका छन् ।

बुधबार मुख्यमन्त्री शाहीले दुई मन्त्रीलाई राजीनामा गर्न लगाएर तीन जना मन्त्री बनाउने तयारी गरेका थिए ।

आन्तरिक मामिला कानुन युवा तथा खेलकुदमन्त्रीमा विन्दमान विष्ट, जलस्रोत तथा ऊर्जा विकास मन्त्रीमा सीता नेपाली र आर्थिक मामिला तथा योजना मन्त्रालय गोपाल शर्मालाई नियुक्त गर्ने तयारी गरेका थिए ।

नयाँ मन्त्रीको सपथ ग्रहण कार्यक्रम बिहीबार दिउँसो ११ बजे गर्ने तयारी गरेको बेला अन्तिम समयमा मुख्यमन्त्रीको आग्रहमा प्रदेश प्रमुखको कार्यालयले रोकेको थियो ।

मुख्यमन्त्री शाहीलाई विश्वासको मत दिएको नेपाली कांग्रेसले दुई मन्त्रालय मागेपछि शाहीले नयाँ थपिएका मन्त्रीको सपथ ग्रहण नगराएर शुक्रबार चार मन्त्रालय आफैँसँग रहेको जानकारी प्रदेश प्रमुखको कार्यालयलाई गराएका थिए ।

अहिले मन्त्रालय खाली रहेका कारणले मुख्यमन्त्रीले आफैँसँग राखेको मुख्यमन्त्रीको सचिवालयले जनाएको छ । सचिवालयका अनुसार कांग्रेससँग सहमति हुनेबित्तिकै नयाँ नियुक्त गर्ने भनिएका मन्त्री र कांग्रेसबाट आएका मन्त्रीको सपथ ग्रहण हुनेछ ।

प्रकाशित मिति: शुक्रबार, वैशाख ३१, २०७८ २१:२४