पत्रकार महासंघ मोरङले स्थापना गर्‍यो कोरोना समन्वय कोष

A+ A A-

नेपाल पत्रकार महासंघ मोरङ शाखाले कोरोना संक्रमित पत्रकारको उपचारमा सहयोग गर्न कोरोना समन्वय कोष स्थापना गरेको छ । बिहीबार बसेको उपलब्ध पदाधिकारी तथा सदस्यको बैठकले कोभिड–१९ बाट संक्रमित पत्रकारको उपचारमा सहयोग गर्न कोरोना समन्वय कोष स्थापना गर्ने निर्णय गरेको हो । कोषमा सोही बैठकबाट ५१ हजार रुपैयाँ संकलन गरिएको सचिव नेत्र पी अधिकारीले जानकारी दिए ।

महासंघ अध्यक्ष सञ्जिव खनालको अध्यक्षतामा बसेको बैठकले खनालकै संयोजकत्वमा कोषको संचालन तथा व्यवस्थापन गर्न सल्लाहकार शंकर खरेल, कोषाध्यक्ष नेत्र पी अधिकारी र कोषाध्यक्ष अभयकुमार राई रहेको समिति गठन गरेको छ ।

कोषमा प्रदेश सरकारबाट अनुदान प्राप्त हुने दुई लाख रुपैयाँसमेत समावेश गर्ने निर्णय गरिएको सचिव अधिकारीले जानकारी दिए । बैठकले कोषमा सहयोग रकम जुटाउन इच्छुक सबै सञ्चारकर्मी तथा शुभेच्छुकलाई आह्वानसमेत गरेको छ ।

महासंघका सदस्यहरूलाई कोरोना संक्रमित भएर गम्भीर अवस्थामा उपचार गराउनुपर्ने अवस्था भए कोष परिचालन गरिने जनाइएको छ । सहयोग रकम महासंघको नाममा कृषि विकास बैंक विराटनगर शाखाको खाता नम्बर ०६०१६००३१८९७९०१९ मा रकम जम्मा गर्नसकिने सचिव अधिकारीले बताए ।

बैठकले संक्रमित पत्रकारको उपचारमा सहजीकरण गर्नका लागि अध्यक्ष खनालकै नेतृत्वमा ६ सदस्यीय ‘र्‍यापिड रेस्पोन्स’ टीमसमेत गठन गरेको छ । समितिमा महासंघका सल्लाहकार शंकर खरेल, उपाध्यक्ष मोहन भट्टराई, तारा आचार्य, सचिव नेत्र पी अधिकारी र कोषाध्यक्ष अभयकुमार राई रहेका छन् ।