बाँकेमा निषेधाज्ञा : बजार नपाउँदा खेतमै कुहिन थाले गोलभेडा

A+ A A-

बाँकेमा बन्दाबन्दीका कारण उत्पादन भएका गोलभेडा बिक्री नहुँदा खेतमै कुहिन थालेका छन् ।

कोभिड-१९ संक्रमण रोकथाम तथा नियन्त्रणका लागि बाँकेमा निषेधाज्ञा जारी भएपछि किसानले लगाएको गोलभेडा खेतमै कुहिएको हो । सवारीसाधन सञ्चालन नभएपछि बारीमा गोलभेडा लिन पुग्ने व्यवसायी र खुद्रा ग्राहक पनि नआउँदा किसान मर्कामा परेका छन् ।

कृषि क्रान्ति गर्ने सरकारले कृषिजन्य उत्पादन ढुवानीका सवारीसाधनलाई निर्वाध चल्न दिने बताएपनि व्यवहारमा त्यसो हुन नसकेपछि किसानले लगाएको तरकारी खेतमा नै कुहिन थालेका हुन् । उत्पादित तरकारी बजारसम्म लैजान नसक्दा किसानहरू दोहोरो मारमा परेका छन् । दैनिक गुजाराका लागि हुने आम्दानी पनि रोकिएको छ भने बैंकबाट लिएको ऋणको व्याज पनि तिर्न नसक्ने अवस्था आएको छ ।

बैजानाथ गाउँपालिका ८ फत्तेपुरका किसान विनोद भुसालले उत्पादन गरेको गोलभेडा बिक्री नहुँदा ११ लाख रुपैयाँ बराबरको घाटा लागेको बताए । गोलभेडा बिक्री गर्ने समयमा जिल्लामा निषेधाज्ञा जारी भएपछि आफ्नो सम्पूर्ण लगानी डुबेको किसान भुसालले बताए । भुसालले कृषि विकास बैंकबाट ५ लाख रुपैयाँ ऋण लिएर १० कट्ठा जमिनमा तरकारी खेती सुरु गरेका थिए ।

भुसालको तरकारी खेती छेउमै चन्द्र चौधरीले खेती गरेका छन् । चौधरी आफैँ पनि गाउँको अगुवा किसानमध्ये एक हुन् । चौधरीले माछा, बंगुर र तरकारी खेती समेत गर्दै आएका छन् । उनी घर घरका मानिसहरू व्यवसायिक तरकारी खेतीमा लागेको भएपनि बजार व्यवस्थापन हुन नसक्दा समस्या भएको बताउँछन् ।

व्यावसायिक तरकारी खेतीका लागि विधिवत फर्म दर्ता गराएका अधिकांश किसानले सरकारबाट सहयोग नपाएको गुनासो गर्ने गरेका छन् । बल्लतल्ल ऋण गरेर लगानी गरेर उत्पादन भएको तरकारीको सरकारले बजार प्रबन्ध गरिदिनुपर्ने माग उनीहरूले गरेका छन् ।

प्रकाशित मिति: आइतबार, वैशाख २६, २०७८ १३:४०