बालुवाटार जग्गा प्रकरण : बस्न्यातको मुद्दामा तीन दिनभित्र जवाफ पेस गर्न सर्वोच्चको आदेश

बालुवाटार जग्गा प्रकरण : बस्न्यातको मुद्दामा तीन दिनभित्र जवाफ पेस गर्न सर्वोच्चको आदेश

A+ A A-

बालुवाटार जग्गा घोटाला प्रकरणमा जोडिएका अख्तियारका पूर्वप्रमुख आयुक्त दीप बस्न्यातविरुद्धको मुद्दामा सर्वोच्च अदालतले तीन दिनभित्र लिखित जवाफ पेस गर्न विशेष अदालत र कारागार कार्यालयका नाममा आदेश दिएको छ ।

बस्न्यातले गत शुक्रबार बन्दी प्रत्यक्षीकरणको रिट हालेका थिए । सर्वोच्चले १४ वैशाखमै बन्दी प्रत्यक्षीकरण र कोभिड–१९ महामारीबाहेकका मुद्दा सुनुवाइ नगर्ने निर्णय गरेपछि बस्न्यात बन्दी प्रत्यक्षीकरण रिट लिएर सर्वोच्च पुगेका हुन् । रिटमाथि सुनुवाइ गर्दै न्यायाधीश मीरा खड्काको एकल इजलासले तीन दिनभत्र जवाफ माग्ने आदेश सुनाएको हो ।

बस्न्यात भौतिक मन्त्रालयको सचिव छँदा विशिष्ट व्यक्तिहरूको निवास विस्तार गर्ने, विस्तारित क्षेत्रका जग्गावालालाई क्षतिपूर्तिस्वरुप बाहिर सट्टाभर्ना जग्गा दिने र मोहीलाई क्षतिको आधा हिस्साबराबर बाहिरको जग्गा दिनेलगायत निर्णय भएको थियो । यही पुष्टि भएपछि अख्तियारले ९ करोड ६५ लाख ७६ हजार बिगो माग गरेर बस्न्यातविरुद्ध मुद्दा हालेको थियो ।

विशेष अदालतले २९ मंसिरमा बस्न्यातलाई पुर्पक्षका लागि कारागार चलान गरेको हो । यो निर्णयविरुद्ध बस्न्यात सर्वोच्चमा ७३ नम्बरको निवेदन लिएर पुगेका थिए । मुलुकी फौजदारी कार्यविधि संहिताको दफा ७३ अनुसार मुद्दाको सुरुवाती सुनुवाइमा तल्लो अदालत वा निकायले दिएको आदेश चित्त नबुझे त्यसलाई बदर गर्न माथिल्लो अदालतमा पुनरावेदनसरह दिइने निवेदन हो, यो ।

यो निवदेन विचाराधीन रहेकै अवस्थामा १४ वैशाखमा सर्वोच्चको पूर्ण बैठकले वैशाख मसान्तसम्म बन्दी प्रत्यक्षीकरण र कोभिड महामारीका मुद्दा मात्रै छिन्ने निर्णय गरेपछि बस्न्यात बन्दी प्रत्यक्षीकरणको रिट लिएर सर्वोचच पुगेका हुन् ।

आफूसहित परिवारलाई नै कोभिड –१९ संक्रमण भएको भन्दै उनले बन्दी प्रत्यक्षीकरणको रिट हालेका हुन् । उनले आफू चाबहिलको ओम अस्पतालमा अक्सिजन लिएर उपचार गराइरहेको र परिवारमा श्रीमती, छोरालाई समेत संक्रमण भएको रिट निवेदनमा उल्लेख गरेका छन् ।

बस्न्यातविरुद्ध अकुत सम्पत्ति कमाएको आरोपमा सम्पत्ति शुद्धीकरण अनुसन्धान विभागले समेत छानबिन गरिरहेको छ ।

प्रकाशित मिति: आइतबार, वैशाख १९, २०७८ १२:५०