लुम्बिनी : प्रदेशसभामा अविश्वास प्रस्तावमा छलफल नहुने, प्रदेश प्रमुख परामर्शमा

लुम्बिनी : प्रदेशसभामा अविश्वास प्रस्तावमा छलफल नहुने, प्रदेश प्रमुख परामर्शमा

A+ A A-

अविश्वासको प्रस्तावमा छलफलका लागि बोलाइएको लुम्बिनी प्रदेशसभाको बैठक २ वटा पत्र पढेर स्थगित हुने भएको छ ।

मुख्यमन्त्री शंकर पोखरेलले राजीनामा दिएकाले अविश्वासको प्रस्ताव टेबुल नहुने र २ वटा पत्र पढेर बैठक स्थगित हुने प्रदेशसभा सचिवालयका सचिव दुर्लभ कुमार पुनले बताए ।

प्रदेश प्रमुख धर्मनाथ यादवले अधिवेशन बोलाएको पत्र तथा मुख्यमन्त्रीले राजीनामा दिएको पत्र पढेर सुनाएपछि बैठक स्थगित हुने पुनले बताए । मुख्यमन्त्रीले राजीनामा दिएकाले अविश्वासको प्रस्तावमा भने छलफल हुने छैन ।

मुख्यमन्त्री पोखरेलको राजिनामापछि प्रदेश प्रमुख यादव नयाँ सरकार गठनको गृहकार्यमा लागेका छन् । प्रदेश प्रमुखको कार्यालयका प्रवक्ता चिरञ्जीवि पौडेलका अनुसार यो नयाँ अभ्यास भएकाले संविधानत: कसरी अगाडि बढ्ने भन्ने विषयमा प्रदेश प्रमुख यादवले परामर्श सुरु गरेका छन् ।

प्रदेश मन्त्रीमण्डल गठनका लागि संविधानको धारा १६८ आर्कषित हुने छ । मुख्यमन्त्री पोखरेलले एकल बहुमत प्राप्त सरकार गठनका लागि राजिनामा दिएको बताइसकेका छन् । माओवादीका २, जनता समाजवादी पार्टीका ४ सांसद पदमुक्त भएपछि प्रदेश सभामा ८१ सांसद छन् । नयाँ सरकार गठनका लागि ४१ सदस्य आवश्यक पर्छ । एमालेसँग त्यो सङ्ख्या छ ।

त्यसैले एकल बहुमतको सरकार बनाउने गरी मुख्यमन्त्री पोखरेलले राजीनामा दिएका हुन् ।

जसपाका नेताहरूका बारेमा भने एमालले आधिकारिक रूपमा केही बताएको छैन । स्रोतका अनुसार जसपाका ४ सांसदलाई मन्त्रीमा यथावत राखिने छ । पार्टीले कारबाही गरे पनि संविधानत ६ महिनासम्म उनीहरू मन्त्री बन्नेछन् ।

मुख्यमन्त्रीका प्रेस सल्लाहकार शेर बहादुर केसीले नयाँ सरकार गठनका लागि मार्ग प्रशस्त गर्न मुख्यमन्त्रीले राजीनामा दिएको बताए । संविधानको धारा १६८ को उपधारा (१) मा प्रदेशसभामा बहुमत प्राप्त संसदीय दलको नेतालाई प्रदेश प्रमुखले मुख्यमन्त्री नियुक्त गर्ने व्यवस्था छ ।

प्रकाशित मिति: आइतबार, वैशाख १९, २०७८ ११:०७