कोरोना संक्रमितले भरिन थाले उपत्यकाका अस्पताल, चिकित्सक भन्छन्- बिरामीले बेड नपाउने खतरा बढ्दै छ

कोरोना संक्रमितले भरिन थाले उपत्यकाका अस्पताल, चिकित्सक भन्छन्- बिरामीले बेड नपाउने खतरा बढ्दै छ

A+ A A-

चार हप्ताअघि त्रिवि शिक्षण अस्पताल महाराजगञ्जमा कोभिडका बिरामीको संख्या शून्यमा झरेको थियो ।

अस्पतालले ननकोभिडका बिरामी भर्ना गर्न सुरु गरेको थियो । महामारी कम भएकोमा चिकित्सकहरूले पनि केही राहत महसुस गरेका थिए । ‘कोभिड वार्ड बन्द गरेर ननकोभिडका बिरामी राख्न थालेका थियौं’, अस्पतालका कोभिड फोकल पर्सन डा. सन्तकुमार दास भन्छन्, ‘दुई सातायता फेरि कोभिडका बिरामी आउन थालेका छन् । ४५ जना कोभिडका बिरामी भर्ना भएका छन् । बेड मिलाउन गाह्रो भएको छ ।’

कोरोनाको दोस्रो छालमा कोभिडका जटिल बिरामी आएको उनी बताउँछन् । ‘पहिले लकडाउनले अरु बिरामी थिएनन् । कोभिडका लागि मिलाइएको थियो’, उनी भन्छन्, ‘अहिले संक्रमित पनि धेरै सिरियस छन् । ननकोभिडका बिरामी कम भए पनि बेड मिलाउन सहज हुने थियो ।’

०००

शुक्रराज ट्रपिकल तथा सरुवा रोग अस्पताल टेकु कोरोना संक्रमितका बिरामीले कहिल्यै खाली भएन । तर, फागुनको अन्तिममा दुई जना मात्र कोभिडका बिरामी अस्पतालमा थिए । बिरामी कम भएपछि टेकुले पनि ननकोभिडका बिरामीको उपचार सेवा सुरु गर्‍यो । त्यसो त टेकु कोरोना बिरामीको उपचारबाट खोप केन्द्रमा पनि परिणत भएको थियो ।

तर, पछिल्लो साता टेकुमा फेरि कोभिडका बिरामीले भरिएका छन् । ‘सरकरले निर्देशन दिए पनि मापदण्ड पालना भएको छैन । मानिस बाहिर निस्केका छन्’, प्रमुख कन्सल्टेन्ट डा. अनुप बाँस्तोला भन्छन्, ‘अब निकै गाह्रो दिन आउँछ । अस्पताल भरिने र बेड नपाइने डर छ ।’

टेकुमा भर्ना भएका संक्रमितमध्ये ५० प्रतिशत बिरामी युवा छन् । ‘संक्रमित निको हुन लामो समय लागेको छ’, डा. अनुप भन्छन्, ‘युवाहरू सिकिस्त भएर आएका छन् । आईसीयूमै राख्नु पर्ने अवस्था छ ।’ मापदण्ड पालना नगरेकै कारण अहिलेको स्थिति आएको डा. अनुपको निष्कर्ष छ ।

‘संक्रमण समुदायमै थियो । मानिस बाहिर निस्कन थाले । विद्यालयहरू खुले र मापदण्ड तोड्न सुरु भयो । संक्रमण फैलियो,’ उनले भने ।

०००

पाटन अस्पतालमा पनि कोभिडका बिरामी निकै कम भएका थिए । कोभिडका बिरामीको उपचारमा खटिएका चिकित्सकलाई ननकोभिडका बिरामीको उपचारमा खटाउन सुरु गरिएको थियो ।

‘कोभिडका बिरामी कम भएको थियो तर खाली थिएन । १० जनामा झरेको थियो । बिरामी थोरै भएपछि स्टाफ पुरानै ननकोभिडमा पठाएका थियौं’, अस्पतालका निर्देशक डा. रवि शाक्य भन्छन्, ‘दुई हप्ता भयो फेरि कोभिडका बिरामी बढेका छन् ।’

बेड भरिएपछि व्यवस्थापन गर्न कठिन भएको उनी बताउँछन् । ‘१२६ जना कोभिडका बिरामी भर्ना भएका छन् । पहिलो दुई सय बेड मिलाएका थियौं । अहिले १४२ बेड छ । अब ४० वटा बेड थप गर्दैछौँ । जटिल हुने देखिएको छ’, उनी भन्छन् ।

०००

बलम्बुस्थित सशस्त्र प्रहरी बलको अस्पतालमा १७ दिनअघि दुई जना कोभिडका बिरामी थिए । बुधबारसम्म आइपुग्दा अस्पतालमा ८० जना कोभिडका बिरामी भर्ना भएका छन् ।

‘नर्मल बेड, आईसीयू, भेन्टिलेटर भरिएको छ’, डा. प्रविन नेपाल भन्छन्, ‘८० वटा बेड छुट्याएकोमा ८० वटा नै भरिएको छ । २० वटा बेड थप गरेर १०० वटा पुर्‍याउँछौं । ननकोभिडका बिरामी कम आए भने अलि सहज हुन्छ ।’

संक्रमित भर्ना हुने क्रम धेरै बढेको उनी बताउँछन् । ‘हिजो मंगलबार मात्र २२ जना भर्ना भए । एकैदिन यति भर्ना हुनु भनेको समस्या त पक्कै छ’, उनी भन्छन्, ‘ज्वरो आएर, सास फेर्न गाह्रो भएर आएका धेरै छन् । पहिले जस्तो घरबेटीले बस्न दिएनन् भनेर आउनेको संख्या कम छ ।’

लक्षण नभएका संक्रमितलाई डिस्चार्ज गर्नुपर्नेमा उनको जोड छ । ‘पोजिटिभमा पनि लक्षण नभएकालाई डिस्चार्ज गरेर होम आइसोलेसनमा राख्न सकिन्छ’, उनी भन्छन्, ‘ट्रिटमेन्ट गर्नुपर्ने, अक्सिजन, आईसीयू र भेन्टिलेटर चाहिनेलाई अस्पतालमा राख्नुपर्छ ।’

०००

उकालो लाग्दो कोराना ग्राफ

टिचिङ, पाटन, टेकु, सशस्त्र प्रहरी बल अस्पताल मात्र होइन, उपत्यकाका सबै सरकारी र केही प्राइभेट अस्पताल कोभिडका बिरामीले भरिएका छन् । स्वास्थ्य तथा जनसंख्या मन्त्रालयको तथ्यांकले पनि उपत्यकाको अस्पताल भरिएको देखाउँछ ।

कोरोना संक्रमितको संख्या काठमाडौंमा उच्च छ । मंगलबारसम्मको तथ्यांक अनुसार काठमाडौंमा १ लाख ७६ हजार १० जना संक्रमित भएका छन् । जसमध्ये ६५ हजार ७ सय १७ जना पुरुष र ४१ हजार ८ सय ९३ जना महिला संक्रमित भएका छन् ।

भक्तपुरमा ९ हजार ७ सय संक्रमित भएकोमा ५ हजार ३ सय ९८ जना पुरुष र ४ हजार २ सय ८७ जना महिला संक्रमित भएका छन् । ललितपुरमा १७ हजार १ सय ८२ जना संक्रमित भएका छन् । जसमध्ये ९ हजार ४ सय ५३ जना पुरुष र ७ हजार ७ सय २९ महिला संक्रमित भएका छन् ।

बुधबारमात्र काठमाडौं ७८६, भक्तपुरमा ८४ र ललितपुरमा १८१ जना संक्रमित थपिएका छन् । पछिल्लो समयमा युके भेरियन्ट र डब्बल म्युटेन्ट भएको भाइरसका कारण संक्रमण बढिरहेको सरकारको निष्कर्ष छ ।

‘नयाँ डेढ गुणा बढी संक्रामक देखिएको छ’, इपिडिमियोलोजी तथा सरुवा रोग नियन्त्रण महाशाखाका निर्देशक डा. कृष्ण पौडेल भन्छन्, ‘बालबालिकादेखि युवासम्म संक्रमित भएका छन् । अब आईसीयू र भेन्टिलेटर धेरै चाहिने हुन सक्छ ।’

कसरी फैलियो उपत्यकामा संक्रमण ?

इपिडिमियोलोजी तथा सरुवा रोग नियन्त्रण महाशाखाका पूर्वनिर्देशक डा. बाबुराम मरासिनी उपत्यकमा कोरोना फैलिनुका पछाडि तीन कारण देख्छन् ।

‘पोलुसन धेरै भयो । त्यसले नाक, कानी घाँटीमा असर गर्‍यो । नयाँ वर्ष, होली, जात्रा र राजनीतिक पार्टीका भेलाले पनि हो । सभाका लागि देशभरबाट मानिस काठमाडौं आए’, उनी भन्छन्, ‘अर्को बाहिर गएका विद्यार्थी पनि फर्किए । नयाँ भेरियन्ट आयो ।’

कोरोना नियन्त्रणकाे तयारी पुगेन, असारसम्म दैनिक ११ हजार संक्रमित पुग्ने प्रक्षेपण

सरकारको तयारी सुस्त

उपत्यका जोखिममा हुँदा पनि सरकारको तयारी चुस्त नभएको विज्ञहरू बताउँछन् ।

‘कोभिडका बिरामीको उपचार गर्न छुट्टै अस्पताल आवश्यक पर्छ । सुरुका दिनदेखि नै डेडिकेटेड अस्पताल चाहिन्छ भनेको हो’, जनस्वास्थ्यविद् डा. शरद वन्त भन्छन्, ‘सबै एकै ठाउँमा उपचार गरेर हुँदैन । संक्रमित कहाँ कुन अस्पताल जाने हो, छुट्याउनुपर्छ ।’

के गर्दैछ सरकार ?

काठमाडौं प्रवेश गर्ने नाकामा हेल्थ डेस्क, स्वास्थ्य परीक्षण कन्ट्याक्ट ट्रेसिङ र क्वारेन्टाइनको व्यवस्था गरिएको सरकारी अधिकारीहरू बताउँछन् । ‘परीक्षण, कन्ट्याक्ट ट्रेसिङ र अस्पतालहरूको व्यवस्थापन गर्छौं’, निर्देशक डा. पौडेल भन्छन् ।

नयाँ भेरियन्ट फैलिएपछि सरकारले काठमाडौं उपत्यकामा कडाइ गर्न थालेको छ । सरकारले दिएको आदेश नमान्नेलाई संक्रामक रोग ऐन २०२० अनुसार कारबाही गरिने काठमाडौंका प्रमुख जिल्ला अधिकारी कालीप्रसाद पराजुली बताउँछन् ।

काठमाडौं प्रशासनले सवारीसाधन सञ्चालन गर्दा चालक र सहचालकले मास्क र भाइजर अनिवार्य लगाउन भनेको छ । घर तथा सार्वजनिक स्थानमा जथाभावी नथुक्न र प्रयोग गरेको मास्क जथाभावी नफाल्न पनि भनिएको छ । सवारीसाधनलाई दैनिक निसंक्रमण गर्न, यात्रु मास्क नलगाएर आएमा चालक तथा सहचालकले बढीमा १० रुपैयाँमा उपलब्ध गराउन प्रशासनले भनेको छ ।

यस्तो छ सरकारको आदेश

यो पनि....

स्वास्थ्य मन्त्रालय भन्छ- अझै नौ हप्ता कठिन हुन्छ

स्वास्थ्य मन्त्रालयको चेतावनी- स्वास्थ्य मापदण्ड पालना नगरे लकडाउन

उपत्यकामा कडाइ : लगाएको मास्क पाँच दिन सुरक्षित राख्नुपर्ने, जथाभावी थुक्न नपाइने

कोरोनाबाट थिलिँदै युवा, आईसीयूमा भर्ना हुनेको संख्या बढ्दो

नेपालमा देखियो यूके भेरियन्ट, कति घातक ?

के हो कोरोना ‘डब्बल म्युटेन्ट’ ? नेपालमा पनि नयाँ भाइरस घुमिरहेको हो ?

प्रकाशित मिति: बुधबार, वैशाख ८, २०७८ १८:०३