महासंघमा असफल किशोर प्रधान बालुवाटारबाट नियुक्ति लिएर निस्किए

A+ A A-

व्यवसायी किशोर प्रधान एमाले बनेकाे १८ दिनमै लाभ लिन सफल भएका छन् । ६ चैतमा उनलाई उचित जिम्मेवारी दिने शर्तसहित प्रधानमन्त्री केपी ओलीले एमाले प्रवेश गराएका थिए । साेहीअनुसार उनले सरकारी स्वामित्वको नेपाल वायु सेवा निगममा सञ्चालक समिति सदस्यकाे जिम्मेवारी पाएका छन् ।

लामो समय उद्योग वाणिज्य महासंघमा रहेर काम गरेका उनलाई महासंघकै कतिपय सदस्य तथा कर्मचारीले पदकाे भोको व्यक्तिका रूपमा चित्रित गर्ने गरेका छन् ।

चैत २०७६ मा महासंघको निर्वाचन हुँदै थियाे । त्याे वर्ष वैशाखबाटै महासंघकाे नयाँ नेतृत्वबारे चर्चा सुरू भयाे । महासंघका एक सदस्यले भनेका थिए, ‘किशोर दाइले महासंघमा महानिर्देशकको जिम्मेवारी दिए पनि लिनुहुन्छ।’ उनी महासंघमा निर्वाचित हुँदा धेरै समय महासंघ सचिवालयमा बिताउँथे । चुनावी एजेण्डा पनि त्यस्तै बनाएका थिए, 'विजनेस छोरालाई जिम्मा लगाएको छु, म पूर्ण समय महासंघलाई दिन्छु ।'

याे पनि..

एमालेको झण्डा ओढाएर बालुवाटारमा टीका, किशोर प्रधानले पाए १८औँ दिनमा राजनीतिक नियुक्ति

उनै प्रधानले एमाले पार्टीमा छिरेर महत्त्वपूर्ण पद हात पारेका छन् । ‘मलाई उचित जिम्मेवारी दिने कुरा भएको थियो, नेपाल एयरलाइन्समा नियुक्ति गरियो भन्‍ने कुरा आएको छ तर अझै पत्र हात परेको छैन’, प्रधानले भने ‘सरकारले जिम्मेवारी दिँदा खुसी नै हुनुपर्‍यो ।’

महासंघकाे अघिल्लो निर्वाचनमा शेखर गोल्छासँग पराजित भएपछि उनले महासंघ जिल्ला नगर उपाध्यक्षको जिम्मेवारी लिएका थिए । उनकै प्यानलबाट निर्वाचित प्रमोद श्रेष्ठ म्याग्दीमा मेयरको उम्मेदवार बनेपछि उनले जिल्ला नगर उपाध्यक्षमा उम्मेदावारी दिएका थिए । वरिष्ठ उपाध्यक्षमा पराजित उनी जिल्लानगर उपाध्यक्षमा भने विजयी भए । उनी पशुपति मुरारकाको कार्यकालमा जिल्ला नगर उपाध्यक्षकै जिम्मेवारीमा थिए । २८ वर्षदेखि उनी महासंघको राजनीतिमा सक्रिय छन् । मोरङ उद्योग वाणिज्य संघको महासचिव हुँदै उनी महासंघको केन्द्रीय समितिमा प्रवेश गरेका थिए ।

शेखर गोल्छासँग प्रतिस्पर्धा गर्ने क्रममा गोल्छा वरिष्ठ उपाध्यक्ष हुने समय नै नभएको दाबी गर्थे प्रधान । पछि गोल्छासँगै मिलेर महासंघको वरिष्ठ उपाध्यक्षमा उम्मेदवारी दिए । त्यस क्रममा ढकाललाई उनले स्वार्थी समूह भएको बताए । ढकाल समूहले चुनाव जित्दा स्वार्थी समूहले चुनाव जितेको हुने उनको संकेत थियो ।

स्रोतका अनुसार उनले महासंघ निर्वाचनको बेला नै एमालेमा प्रवेश गर्न वचन दिएका थिए । त्यतिबेला नै बालुवाटारले उनलाई सहयोग गरेकाे तर अन्य व्यवसायीलाई दबाब दिएकाे चर्चा थियाे ।

शेखर गोल्छाकाे टिमबाट अधिकांशले निर्वाचन जित्दा पनि विजयी हुन नसकेका पात्र हुन् किशाेर प्रधान । अघिल्लो निर्वाचनमा उनकै समूहका जिल्ला नगर उपाध्यक्ष विजयी हुँदा जिल्लाबाट नै कम भोट आएका कारण उनी पराजित हुनुपरेको थियो ।

तारन्तर महासंघमा राजनीति हाबी भयो भन्‍ने प्रधान अन्ततः एमाले छिरेर पद हात पार्न सफल भएका छन् । मोतिलाल दुगडलगायतका व्यापारीलाई एमालेले खाकी च्यापेकाे देखेर पनि उनी एमालेमा लागेकाे हुनसक्ने कतिपयकाे अनुमान छ । प्रधानसँगै अन्य २३४ जना व्यक्ति पनि एमालेमा प्रवेश गरेका थिए ।

प्रकाशित मिति: मंगलबार, चैत २४, २०७७ १६:५०