महासंघमा स्वार्थी समूह ल्याउने वा नि:स्वार्थी मतदाताको रोजाइमा : किशोर प्रधान

महासंघमा स्वार्थी समूह ल्याउने वा नि:स्वार्थी मतदाताको रोजाइमा : किशोर प्रधान

A+ A A-

निजीक्षेत्रको छाता संगठन नेपाल उद्योग वाणिज्य महासंघको अघिल्लो निर्वाचनमा शेखर गोल्छा र किशोरकुमार प्रधान एकआपसमा प्रतिस्पर्धी थिए । १३ मंसिरका लागि तोकिएको महासंघको निर्वाचनमा प्रधानले शेखरकाे साथ सहयोगमा वरिष्ठ उपाध्यक्षमा उम्मेदवारी दिएका छन् । २८ वर्षदेखि महासंघमा सक्रिय उनी यसअघि पशुपति मुरारकाको कार्यकालमा उपाध्यक्षको जिम्मेवारीमा थिए ।

अघिल्लो निर्वाचनमा उनको प्यानलबाट जिल्ला नगर उपाध्यक्ष विजयी भए पनि वरिष्ठ उपाध्यक्षमा उनी पराजित भए । तर, स्थानीय तहको निर्वाचनमा उम्मेदवार भएपछि तत्कालीन उपाध्यक्ष प्रमोद श्रेष्ठ गएपछि भवानी राणाको कार्यकालमा पनि उनी जिल्ला नगर उपाध्यक्षकै जिम्मेवारीमा छन् । सन् २०२३ देखि २०२६ को कार्यकालमा अध्यक्ष हुने गरी अहिले पुन: वरिष्ठ उपाध्यक्षमा उम्मेदवारी दिएका किशोरकुमार प्रधानसँग भागवत भट्टराईले गरेको कुराकानी :

अहिले आयआर्जन कम हुँदै गएको, आर्थिक क्रियाकलापहरू सुस्त भएको अवस्थामा महासंघको चुनाव हुँदै छ । अहिलेको अवस्था र महासंघमा आउनुपर्ने कस्तो नेतृत्व हो ?

उद्योगीहरूका हकहित उठाउन र आय-आर्जनको बाटो फैलाउनको लागि नै नेपाल उद्योग वाणिज्य महासंघ, व्यवसायीहरूको ठूलो छाता संगठनको रूपमा स्थापित भएको छ । देशको अर्थतन्त्रमा विगत ५४/५५ वर्षदेखि नेपाल उद्योग वाणिज्य महासंघले सवल भूमिका अपनाएको छ । देशलाई राजस्वदेखि निकासी र पैठारी सम्पूर्ण कुरामा नेपाल उद्योग वाणिज्य महासंघको ठूलो लगानी मात्रै हाेइन, देन पनि छ । जसले गर्दा देशको ढुकुटी भर्ने काम गरेका छौँ । अहिले संसारभर नै उद्यम व्यवसाय तथा आयआर्जनमा सुस्तता आएको छ । कोभिड- १९ को असर पर्‍यो, डर र रोगले त्रसित भएर व्यवसायमा संलग्न हुने अवस्था पनि रहेन, त्यसले गर्दा समस्या परेको हो ।

नेपाल उद्योग वाणिज्य महासंघका सम्पूर्ण व्यवसायीलाई एकीकृत गरेर आय-आर्जन वृद्धि गर्ने बाटो विस्तार गर्नेछौँ । देशलाई समृद्धिको दिशातर्फ अघि बढाउन महासंघमा असल नेतृत्व आवश्‍यक पर्छ ।

नेतृत्वमा पहिलो नम्बरकाे हिसाबले हामीले छनोट गरिनै सकेका छौँ । नेपालमा सबैभन्दा पहिले उद्योगको सुरुवात गर्ने गोल्छा अर्गनाइजेसनको हात छ । रुघुपति जुटमिलबाट सुरु भएको उद्योगको शृंखला हो हाम्रो । आज नेपाल धेरै उद्योगी व्यवसायीलाई गोल्छा अर्गनाइजेसनको ठूलो हात छ । ३ पुस्ताअघि सिर्जना भएको र अहिलेको तेस्रो पुस्ताले 'लिड' गर्ने अवस्था छ ।

यो देशमा उद्योगलाई स्थापना गरेको आयआर्जन र रोजगारी विस्तार गर्ने गोल्छा अर्गनाइजेसन छ । त्यही गोल्छा अर्गनाइजेसनले नेतृत्व गर्ने अवस्था आयो । हामीले साथ दिएर उहाँको पुस्ताले कल्पना गरेको र अहिलेको संकटको अवस्थालाई उहाँकै नेतृत्वमा सम्पन्न गरेर प्रमाणित गर्न सक्षम हुनेछौँ ।

जसले उद्योगको सुरुवात गरेको थियो, अहिलेको संकटको बेलामा उसकै सन्तानले नेतृत्व गरेर यसलाई सक्षम बनाउन सक्छ भने हाम्रो सम्पूर्ण आट, जोश जाँगर उहाँसँगै मिसाउनेछौँ । विश्‍वास गर्नुस्, उहाँ नेतृत्वमा हामीले अहिलेको संकटलाई निवारण गर्न सक्नेछौँ ।

विधानतः अध्यक्ष बन्दै गरेका शेखर गोल्छाले नेतृत्व सम्हाल्दै गर्दा तपाईं तीन पुस्तासँग नै काम गर्दै हुनुहुन्छ, के नयाँलाई अवसर नदिने ?

२८ वर्षको संलग्नता नेपाल उद्योग वाणिज्य महासंघमा छ । कुनै पनि उद्योगमा जसको लगानी धेरै हुन्छ, त्यसलाई चिन्ता बढी अवश्य हुन्छ । मेरो लगानी उद्योग वाणिज्य महासंघमा धेरै छ ।

जबसम्म स्वास्थ्यले साथ दिन्छ, नेपाल उद्योग वाणिज्य महासंघमा सेवा गर्ने प्रयास गरिनै रहन्छु

मलाई नेपाल उद्योग वाणिज्य महासंघलाई सक्षम बनाएर एउटा राम्रो परिपाटीको सुरुवात गरेर, सबै उद्योगी व्यवसायी एकीकृत रूपमा व्यवसाय गर्ने वातावरण बनाउने र सरकारसँग सहकार्य गरेर अगाडि बढ्ने सोच लिएर मैले पुनः एक पटक शेखर गोल्छाको नेतृत्वमा अगाडि बढेको हुँ । उहाँको वरिष्ठ उपाध्यक्ष बनेर काम गर्छु भनेर प्रतिस्पर्धामा छु ।

चुनावी अभियानका क्रममा सुदूरपश्चिममा निवर्तमान अध्यक्ष पशुपति मुरारका, वर्तमान वरिष्ठ उपाध्यक्ष शेखर गोल्छासहित ।

जबसम्म स्वास्थ्यले साथ दिन्छ, नेपाल, उद्योग वाणिज्य महासंघमा सेवा गर्ने प्रयास गरिनै रहन्छु । महासंघ मेरो लागि मन्दिर हो । यो मन्दिर पुजारीको रूपमा सधैँ पूजा गर्ने प्रयास रहन्छ । मेरो मतदाता मेरो देउता हुन् । त्यो देउवातले पुँजारीका रूपमा मलाई कति योग्य सम्झनुहुन्छ हेर्न बाँकी छ ।

हारियो भने अर्को पटक पनि प्रतिस्पर्धामा रहनुहुन्छ, हाेइन त ?

प्रतिस्पर्धाबाट बाहिरिने र नबाहिरिने समयसापेक्ष मात्रै हुन्छ । अहिलेको समयमा म निश्चित रूपमा जित्नेबाहेकको कुरा सोचेको पनि छैन । जब म नेतृत्वमा पुगेर सेवा प्रदान गर्छु, त्यतिबेला उहाँहरूलाई मेरो लगानी गरेको २८ वर्षदेखिको अभूतपूर्व तरिकाबाट सफलता हासिल गर्नुभयो भन्ने पार्नेछु ।

मैले कुनै स्वार्थबिना काम गर्ने हो । मैले उद्योगको जिम्मेवारी छोरोलाई दिएको छु । मसँग सेवा गर्ने समय छ । महासंघको सम्पूर्ण उद्योगी व्यवसायीको सेवा गरेर अहिलेको छियाछिया भएको अथर्तन्त्रलाई कसरी स्थापित गर्ने भन्ने कुरामा म अगाडि बढ्ने, सरकारसँग सहकार्य गरेर सिङ्गाे बिजनेसको वातावरण बनाउने योजना हो । अहिले हामी रेमिट्यान्समा निर्भर छौँ, रेमिट्यान्सले संसारको कुनै पनि देश चलेको छैन ।

एक जमानामा गार्मेन्ट कति निर्यात हुन्थ्यो । गार्मेन्टले देश चल्छ भनिन्थ्यो, एक जमानामा कार्पेट निर्यात हुन्थ्यो, कार्पेटले चल्छ भनियो । अहिले गार्मेन्ट र कार्पेटको स्थिति हेरौँ । अहिलेकाे म्यानपावरमार्फत उद्यमशील युवाहरूलाई विदेश पठाएर देशलाई धनी बनाउने भन्ने साेच हाम्रो मुर्खता हो । त्यही मुर्ख्याइँलाई दूर गर्नका लागि सरकारसँग सहकार्य गरेर आफ्नै देशमा उद्योग संचालन गर्ने र बिजनेसको वातावरण बनाउने हो । हामीसँग प्रशस्त सम्भावना पनि छ ।

हामीसँग धेरै सम्भावना भए पनि त्याेअनुसार काम गर्न सकेका छैनौँ । त्यो यस पटकको नेतृत्व र मेरो नेतृत्वले गरेर देखाउनेछ । हेर्नुहोला छ वर्षमै नेपालको आर्थिक वृद्धिदर डब्बल डिजिटमा पुर्‍याउने योजना छ । हाम्रो सोच परिणाममुखी हुनेछ । लगानी र सुदृढीकरणको हिसाबले काम गरेका हुन्छौँ । हामीले देशको अर्थतन्त्रलाई समष्टीगत रूपमा बदल्नका लागि नयाँ योजनाका साथ अघि बढ्छौँ ।

उद्योगी व्यवसायीको सबल दुर्लभ पक्षका काण कि राज्यको नीतिका कारण ?

दुवै हो । अहिले जनताले दुईतिहाइ बहुमत दिएर पठाएको सरकार छ । आफ्नो आन्तरिक कलहमा रुमल्लिएको अवस्था छ । यस्तो अवस्थामा पनि हामीले आफ्नो किसिमको आँट गरेका छौँ ।

पटक-पटक काम गर्ने वातावरण भएन भन्ने कुरा छ, सरकारले तपाईंहरूको एजेण्डा सुनेन पनि भन्नुभएको छ । यस्तो अवस्थामा तपाईंहरूको सोच पूरा होला ?

सरकारले नसुन्नुको कारण आफैँ समस्यामा भएकाले होला । तर, सधैँ यस्तो नहोला । उहाँहरूले पनि देशको अर्थतन्त्र सुधारका लागि काम गर्नुपर्ने अवस्था छ । अहिलेको समस्या धेरै दिन रहँदैन । छिट्टै समाधान हुनेछ । अहिलेको सरकारले आर्थिक मुद्दा नै अघि सारेको हो । यो आर्थिक मुद्दा आन्तरिक कठिनाइका कारणले गर्न नसकेको हो । यस्तो कठिनाइ लामो समय रहँदैन, पार लागिनै हाल्नेछ । थप आर्थिक गतिविधिको विस्तार गर्नका लागि कुनै पनि निमय उपनियमबाट अवरोध छ भने पनि हामी सरकारसँग मिलेर काम गर्ने योजना बनाएका छौँ ।

यससम्बन्धी हाम्रो हुनेवाला अध्यक्षले योजना बनाउनुभएको छ । यसको प्रभाव देखिनेछ । हामीले कोभिडको समस्या सोचेका थिएनौँ । तर, अहिले हामीले कोभिडसँग लड्ने क्षमता पनि वृद्धि गर्दै छौँ । समस्या त आउँछ समस्यासँग जुधेर नै अघि बढ्ने हो ।

अघिल्लो चुनावमा तपाईं शेखर गोल्छाको प्रतिस्पर्धी हुनुहुन्थ्यो, अहिले के स्वार्थ मिल्यो र सँगै देखिनुभयो ?

स्वार्थ लिएर खटिएको हुन्छ भने त्यसको परिणाम राम्रो हुँदैन । अहिले जति पनि मेरा प्रतिस्पर्धी र मलाई हेर्नुभयो भने मूल्यांकन गर्न सकिन्छ

उहाँ र मेरो बीचमा स्वार्थ कुनै छैन । संस्था बनाउनका लागि आवश्यक मानिस छनोट गर्ने क्रममा मलाई छनोट गर्नुभएको हो । उहाँसँग प्रशस्त क्षमता छ । हामीसँग हात मिलाउन खोज्नुभएको हो । मसँग कुनै स्वार्थ छैन । कुनै पनि काममा बिनास्वार्थ खटिएका हुन्छौँ भने त्यसकाे परिणाम राम्रो हुन्छ ।

स्वार्थ लिएर खटिएको हुन्छ भने त्यसको परिणाम राम्रो हुँदैन । अहिले जति पनि मेरा प्रतिस्पर्धी र मलाई हेर्नुभयो भने मूल्यांकन गर्न सकिन्छ । को स्वार्थमा छ को नि:स्वार्थमा छ । त्यो मूल्यांकन गर्ने क्षमता मेरो देउता (मतदाता)हरूले गर्नुहुनेछ ।

सहमतिबाट वरिष्ठ उपाध्यक्ष हुने बाटोचाहिँ बन्द गर्नुभएको हो ?

एउटा हातले कहिल्यै पनि रोटी पाक्दैन । तपाईंले चाहेर पनि एक हातले पकाइयो भने काँचो हुन सक्छ । काँचो रोटी कसैलाई पनि फलदायी हुँदैन । त्यसले शरीरमा तन्दुरुस्ती ल्याउन सक्दैन । त्यसैले दुई हात जबसम्म रोटीका लागि अगाडि सर्दैन, तबसम्म अधुरो हुन्छ ।

सहमति र सहकार्य भन्ने कुरा सबैले चाहना गर्नुपर्छ । त्यो पनि अभिभावकले मिलाउनुपर्छ । मैले लिन्छु र दिन्छु भन्ने कुरा पनि हाेइन । संस्थाको मर्यादा र हितका लागि कसको योगदान बढी छ, कसको योगदान कम छ, त्यसको मूल्यांकनका आधारमा उहाँहरूले निर्णय लिनुपर्ने कुरा हो । निर्णय लिने कुरा अभिभावकले गर्ने हो । अभिभावकको निर्णय मान्यो भने कुरा मिल्छ, विरोध गर्‍यो भने घर नै भाँडिन्छ ।

अहिलेको अवस्थामा उद्यमी व्यवसायीलाई वा राज्यलाई केको आवश्‍यकता छ । स्वार्थसहितको नेतृत्वको आवश्‍यकता छ कि नि:स्वार्थसहितको भन्ने कुरा यो मतदाताले बुझ्नुभएको छ । त्यसखाले उहाँहरूको निर्णय जे आउँछ । स्वार्थसहितको नेतृत्व चाहिए पनि छनोट गर्नुहुन्छ । नि:स्वार्थमा चाहिने भए पनि त्यस्तै निर्णय लिनुहोला ।

तपाईंले जित्दा नि:स्वार्थ, अर्कोले जित्दा स्वार्थ हो ?

अहिले भन्नै पर्दैन । दुनियाँले सोच्न सक्ने, सोच्नुपर्ने अवस्था छ ।

मतदाताले तपाईंलाई नरुचाउँदासहित स्वार्थ भन्ने त नरहला नि ?

मैले भनेकै छु मतदाता भनेको भगवान् हो । उहाँहरूले आफ्नो इच्छाले गर्नुहुनेछ । त्यसका लागि तयार नै छु ।

अन्तिममा गत निर्वाचनको तुलनामा यो पटक बलियो हुनुहुन्छ कि थप कमजोर ?

मैले जित्ने प्रशस्त आधार छन् । मलाई पूर्वअध्यक्षको आशीर्वाद, अहिलेको नेतृत्वको दिशा-निर्देश, आउने नेतृत्वको निर्देशन र तीनै जनाको सम्मिश्रण र मेरो मेहनतका कारण म विजयी हुनेछु ।

प्रकाशित मिति: बुधबार, मंसिर ३, २०७७ १९:२५