झा दम्पतीको जलेको कपडा भेटिएपछि प्रहरीले घरैबाट तीन जनालाई समात्यो

A+ A A-

महोत्तरीको पिपरा गाउँपालिका–५, सहोडबाका झा दम्पती हत्यामा संलग्न रहेको आरोपमा प्रहरीले थप तीन जनालाई पक्राउ गरेको छ । पक्राउ पर्नेमा स्थानीय विकास झा, कैलाश झा र शम्भु झा रहेको प्रहरीले जनाएको छ । कैलाश र विकास दाजुभाइ हुन् । प्रहरी निरीक्षक रञ्जन मिश्रका अनुसार कैलाश दूग्ध व्यवसायी हुन् भने उनका भाइ विकास दिल्लीमा सीए पढ्दै गरेका विद्यार्थी हुन् । केही महिनादेखि उनी घरमै बसिरहेका थिए ।

हिजाे दिउँसो अनुसन्धानका क्रममा घर तलासी गर्दा कैलाशको घरमा झा दम्पतीको जलेको कपडा बरामद भएको प्रहरीको भनाइ छ । झा दम्पतीको शव केही दिनसम्म उनकै घरमा बाकसमा लुकाएर राखिएको हुनसक्ने प्रहरीले आशंका गरेकाे छ ।

यद्यपि, अनुसन्धान जारी रहेकाले उनीहरूको संलग्नता र फेला परेको प्रमाणबारे तत्काल भन्न नमिल्ने महोत्तरीका प्रहरी उपरीक्षक दिनेश आचार्यले बताए ।

यसअघि प्रहरीले झा दम्पतीको हत्यामा संलग्न रहेको आशंकामा पिपरा गाउँपालिकाका रामबाबु यादव, उनका छोराहरू सुरेन्द्र यादव र राजेन्द्र यादव तथा भारत बिहार मधुबनी घर भई महोत्तरीको बनौलीमा बस्दै आाएका हरेन्द्र ठाकुरलाई पक्राउ गरेर अनुसन्धान अगाडि बढाएको थियो ।

अनुसन्धानका क्रममा गरिएको पोलिग्राफ टेस्टमा चारै जनाले झुटो बोलेको प्रहरीको दाबी छ । उनीहरूले अपराध स्वीकारेका छैनन् । गत १० फागुन राति ओछ्यानसहित बेपत्ता भएका झा दम्पतीको शव बोरामा राखेर गाडिएको अवस्थामा अस्ति बिहीबार फेला परेको थियो । शव पोष्टमर्टमका लागि धरान पठाइएको छ ।