सत्तारूढ दल संसदलाई प्रभावकारी ढंगले अघि बढाउने पक्षमा छैन : बालकृष्ण खाँड

फाइल तस्वीर

A+ A A-

नेपाली कांग्रेस संघीय संसदीय दलका मुख्य सचेतक बालकृष्ण खाँडले सत्तारूढ दल संसदलाई अगाडि बढाउने मानसिकतामा नरहेको बताएका छन् ।

सोमबार संसदको कार्य व्यवस्था तथा परामर्श समितिको बैठकपछि सञ्चारकर्मीलाई प्रतिक्रिया दिँदै मुख्य सचेतक खाँडले सत्तापक्ष संसदलाई गतिशील र प्रभावकारी ढंगले अगाडि बढाउने पक्षमा नरहेको बताएका हुन् ।

मंगलबार संसदको बैठक बस्ने भए पनि सरकारले हालसम्म कुनै पनि बिजनेस नदिएको उनको भनाइ छ । सरकारले जारी गरेका अध्यादेश सदन चलेका बेलामा विधेयककै रूपमा अगाडि बढाउनुपर्ने भए पनि ती अध्यादेशलाई अगाडि बढाउने सम्बन्धमा पनि सरकार गम्भीर नभएको उनले बताए ।

‘सत्तापक्ष सदनलाई गतिशील गराउने र सदनलाई प्रभावकारी रूपमा अगाडि बढाउने मानसिकतामा आजको मितिसम्म छैन' उनले भने

मुख्य सचेतक खाँडले संसदीय परम्पराअनुरूप संसद आरम्भ हुँदा सबै दलले शुभकामना मन्तव्य राख्न पनि सरकारले अभिरुचि नदेखाएको बताए । ‘सदन प्रारम्भ हुँदाखेरी सरकारले, प्रमुख प्रतिपक्षी दलले, सबै दलले सदनमा शुभकामना आदान प्रदान गर्ने हाम्रो पुरानो प्रचलन थियो । भोलिको मिटिङमा सबै दलहरूले अहिलेको परिस्थितिको बारेमा आफ्नो शुभकामना मन्तव्य व्यक्त गर्नुस् भन्दा पनि सरकारको तर्फबाट शुभकामना मन्तव्य दिनेमा पनि कुनै अभिरुचि जनाउनु भएको छैन’ उनले भने ।