दुई महिनामा दुई खर्बको कर्जा विस्तार, ग्लोबल र एनआईसीको प्रतिस्पर्धा

A+ A A-

दुई महिना अघिसम्म अधिक तरलता (लगानी योग्य पुँजी) को समस्या खेपिरहेका बैंकहरूले अब भने तरलता अभावको समस्या खेप्न थालेका छन् । बैंकमा जम्मा हुने निक्षेपभन्दा बढी कर्जाको माग बढ्न थालेपछि तरलता अभावको समस्या देखिन थालेको हो ।

पुस र माघमा मात्रै दुई खर्ब रुपैयाँको कर्जा विस्तार भएको छ । दुई महिनामा दुई खर्ब रुपैयाँको कर्जा विस्तार हुँदैगर्दा बैंकमा जम्मा भएको निक्षेप भने यस अवधिमा ८० अर्ब रुपैयाँ भएको देखिन्छ । यस हिसाबले पुससम्ममा देखिएको एक खर्ब २० अर्ब रुपैयाँको अधिक तरलताको 'ग्याप'लाई यसले पूरा गरेको छ ।

पुसमा ५८ अर्ब रुपैयाँको निक्षेप बढ्दा एक खर्ब २७ अर्ब रुपैयाँको कर्जा विस्तार भएको थियो भने माघमा जम्मा पाँच अर्ब रुपैयाँको निक्षेप बढ्दा ७३ अर्ब रुपैयाँको कर्जा विस्तार भएको छ ।

हालसम्म वाणिज्य बैंकहरूले ३७ खर्ब ८६ अर्ब २७ करोड रुपैयाँको निक्षेप (डिपोजिट) गरेका छन् भने ३३ खर्ब १७ अर्ब रुपैयाँको कर्जा विस्तार गरेका छन् । चालू आवको सात महिनाको अवधिमा चार खर्ब १२ अर्ब रुपैयाँको कर्जा विस्तार भएको छ भने दुई खर्ब ९६ अर्ब रुपैयाँको मात्रै निक्षेप जम्मा भएको छ ।

चालू आवको सात महिनामा सबैभन्दा बढी ऋण प्रवाह गर्नेमा एनआईसी एसिया बैंक रहेको छ । यो बैंकले सात महिनामा ६९ अर्ब ३६ करोड रुपैयाँ ऋण प्रवाह गरेको छ भने पछिल्लो एक महिनामा मात्रै १० अर्ब दुई करोड ऋण प्रवाह गएको छ ।

त्यस्तै, हालसम्मको ऋण प्रवाहमा पनि एनआईसी एसिया नै सबैभन्दा अगाडि रहेको छ । यो बैंकको हालसम्मको ऋण प्रवाह दुई खर्ब ४३ अर्ब १० करोड रुपैयाँ रहेको छ । माघ महिनासम्म उसको निक्षेप दुई खर्ब ७५ अर्ब रुपैयाँ पुगेको छ ।

एनआईसीई एशियापछि धेरै कर्जा विस्तार गर्ने बैंक ग्लोबल आईएमई हो । ग्लोबल आईएमईले हालसम्म दुई खर्ब ५३ अर्ब रुपैयाँ निक्षेप जम्मा गर्दा दुई खर्ब १९ अर्ब रुपैयाँको कर्जा विस्तार गरेको छ । चालू आर्थिक वर्षको सात महिनामा ग्लोबलले १९ अर्ब ८३ करोड र माघमा मात्रै चार अर्ब १४ करोड रुपैयाँको कर्जा बढाएको छ । दुई खर्बमाथिको कर्जा पुर्‍याउने यी दुई बैंक मात्रै हुन् ।

नबिल बैंकले पछिल्लो महिना छ अर्ब ४ करोड रुपैयाँ र चालु आवको सात महिनामा ३१ अर्ब ५६ करोड रुपैयाँले कर्जा बढाएपछि एक खर्ब ८४ अर्ब ५७ करोड रुपैयाँ कर्जा पुगेको छ । यही अवधिसम्ममा नबिलको निक्षेप भने दुई खर्ब तीन अर्ब रुपैयाँ पुगेको छ । बैंकको अघिल्लो महिनाको तुलनामा माघमा ४७ करोड रुपैयाँ निक्षेप घटेको छ भने चालु आवको सात महिनामा १० अर्ब दुई करोड रुपैयाँ मात्रै निक्षेप बढेको छ ।

पछिल्लो सात महिनामा धेरै कर्जा विस्तार गर्ने अर्को बैंक हो प्रभु बैंक । यो बैंकले सात महिनामा २८ अर्ब २९ करोड रुपैयाँ कर्जा विस्तार गरेर एक खर्ब ३१ अर्ब रुपैयाँ पुर्‍याएको छ । यसै अवधिमा बैंकले निक्षेप २९ अर्ब ५२ करोड रुपैयाँले बढाएर एक खर्ब ६६ अर्ब रुपैयाँ पुर्‍याएको छ ।

चालु आवको यही अवधिमा सिद्धार्थ बैंकले २० अर्ब ५५ करोड, एनएमबी बैंकले २० अर्ब ९१ करोड, राष्ट्रिय वाणिज्य बैंकले १९ अर्ब ३४ करोड रुपैयाँ कर्जा बढाएका छन् । सबैभन्दा कम कर्जा प्रवाह गर्नेमा एनएमबी बैंक, एभरेष्ट बैंक, स्ट्यान्डर चार्टड बैंक र नेपाल बंगलादेश बैंक रहेका छन् ।

यी बैंकले क्रमश: एक अर्ब २३ करोड, एक अर्ब २१ करोड, दुई अर्ब ४१ करोड र दुई अर्ब ८८ करोड रुपैयाँको कर्जा प्रवाह सात महिनाको अवधिमा गरेका छन् ।

प्रकाशित मिति: मंगलबार, फागुन ४, २०७७ २०:०४