कोरोनाविरुद्धको खोपको पारदर्शी र न्यायोचित वितरण गर्न पूर्वउपकुलपतिहरूको माग

कोरोनाविरुद्धको खोपको पारदर्शी र न्यायोचित वितरण गर्न पूर्वउपकुलपतिहरूको माग

A+ A A-

त्रिभुवन विश्वविद्यालयका पूर्वउपकुलपतिहरूले ज्येष्ठ नागरिक र शिक्षक र विद्यार्थीहरूलाई कोरोनाविरुद्धको खोपको सूचीमा नपारी उपेक्षा गरेकाे आराेप लगाएका छन् ।

पूर्वउपकुलपतिहरू महेशकुमार उपाध्याय, नवीनजङ्ग शाह, केदारभक्त माथेमा, हीराबहादुर महर्जन र कमलकृष्ण जोशीले बुधबार एक विज्ञप्ति प्रकाशित गरी कोरोनाको बढी जोखिममा रहेका ज्येष्ठ नागरिक, शिक्षक र विद्यार्थीवर्गलाई खोपको सूचीमा सरकारले नपारी उपेक्षा गरेको आरोप लगाएका हुन् ।

विज्ञप्तिमा भनिएको छ, ‘बेलायतमा ९० वर्षीया महिलालाई पहिलो खोप लगाई खोप कार्यक्रम शुभारम्भ भयो, उक्त दिनलाई भी–डे (V-Day) भनेर विशेष महत्त्व दिइएको छ । विश्व स्वास्थ्य संगठन, जेसीभीआई तथा अन्य धेरै मुलुकहरू र सम्बन्धित संस्थाहरूले उमेर समूहलाई प्राथमिकताको सूचीमा अग्र स्थान दिएका छन् । नेपालमा भने खोपको पहिलो चरण समाप्त हुँदासम्म सबभन्दा बढी जोखिममा रहेका जेष्ठ नागरिकलाई पूर्णतया उपेक्षा गरेको पाइयो । दोस्रो चरणसम्म पनि जेष्ठ नागरिक उपेक्षित नै रहे । प्राथमिकताको सूचीमा सामाजिक न्याय सर्वथा अवहेलित रहेको त छ नै, साथै तथा कथित प्राथमिकतामा परेका भनिएकाहरूले मात्र पनि त्यो सुविधा पाएको नभई पहुँचवालाहरू कतिपयले खोपको सुबिधा पाइसकेका छन् ।’

‘शिक्षक–विद्यार्थीहरूको भौतिक उपस्थितिमा स्कुल, कलेज र विश्वविद्यालयका कक्षाहरू सञ्चालनमा आउन लागेपछि प्रत्येक दिन ठूलो सङ्ख्यामा शिक्षक–विद्यार्थी र कर्मचारीहरूमा पनि कोरोनाको जोखिम बढ्नु स्वाभाविक हुँदा पनि प्राथमिकताको सूचीमा यो वर्ग नपर्नु भने एउटा बिडम्बना नै हो,’ विज्ञप्तिमा भनिएको छ, ‘यसरी सामाजिक नैतिकताको खुलेआम उलङ्घन भएको छ । खोपको न्यायोचित वितरणको व्यवस्था गर्न असक्षम सम्बन्धित मन्त्री र मन्त्रीको टोलीले यसको जिम्मेवारी लिई सार्वजनिक रूपमा माफी मागी सामाजिक नैतिकताप्रति संवेदनशील रहेको जनाउनुपर्दछ । साथै, सम्बन्धित सम्पूर्ण कार्य पारदर्शी होस् भन्ने पनि हाम्रो जोरदार माग छ ।’

प्रकाशित मिति: बुधबार, माघ २८, २०७७ १६:३९