माधव नेपाल भन्छन्- पार्टीको आधिकारिकता कसैलाई नदिएर सूर्य चिन्ह फ्रिज गर्ने षड्यन्त्र हुँदैछ

माधव नेपाल भन्छन्- पार्टीको आधिकारिकता कसैलाई नदिएर सूर्य चिन्ह फ्रिज गर्ने षड्यन्त्र हुँदैछ

A+ A A-

नेपाल कम्युनिष्ट पार्टी (नेकपा) प्रचण्ड-माधव समूहका अध्यक्ष माधवकुमार नेपालले पार्टीको आधिकारिकता कसैलाई नदिएर चुनाव चिन्ह फ्रिज गराउने षड्यन्त्र भइरहेको बताएका छन् ।

सोमबार नेकपा प्रचण्ड-माधव समूहको केन्द्रीय कमिटीको चौथो बैठकमा अध्यक्ष नेपालले पार्टीको आधिकारिकता कसैलाई पनि नदिएर चुनाव चिन्ह फ्रिज गराउने षड्यन्त्र भइरहेको बताएका हुन् ।

निर्वाचन आयोगले पत्र पठाएर आधिकारिकताका सवाल उठाउन खोज्नुले षड्यन्त्र भइराखेको अनुभूति भएको नेपालले बताए । केन्द्रीय कमिटीमा एक चौथाइ सदस्य समेत नरहेको केपी ओली पक्षको आधिकारिकता हुनै नसक्ने दाबी गर्दै अध्यक्ष नेपालले आफूहरु नै आधिकारिक भएको बताए ।

‘निर्वाचन आयोगले पार्टीको आधिकरिकताका सवाल उठाउन खोजेको देखिन्छ । प्रष्ट के छ भने पार्टीको आधिकारिकता कोसँग रहन्छ केपी ओली जोसँग एक चौथाई केन्द्रीय सदस्य पनि छैनन् । त्योसँग पार्टीको आधिकारिकता हुन सक्दछ ? दावा गर्न मिल्छ ?,’ उनले भने, ‘हरेक षड्यन्त्र भइरहेका छन् कि पार्टीको आधिकारिकता कसैलाई पनि नदिने, निर्वाचन चिन्ह कसैलाई पनि नदिएर फ्रिज गर्ने खालका ठूलो षड्यन्त्र भइरहेको छ ।’

अध्यक्ष नेपालले नेपाल कम्युनिष्ट पार्टी (नेकपा) को आधिकारिक नेतृत्व आफूहरुले नै रहेको दाबी गरे । दुई तिहाइ बहुमत केन्द्रीय कमिटी सदस्यको निर्णयलाई पन्छाएर कसैले अघि बढ्ने सपना देखेको भए सम्भव हुन नदिने नेपालको चेतावनी छ ।