माधव नेपालको टिप्पणी- निर्वाचन आयोगले मलाई मान्दिनँ भने पनि प्रचण्डजी अध्यक्ष हुनुहुन्छ नि !

माधव नेपालको टिप्पणी- निर्वाचन आयोगले मलाई मान्दिनँ भने पनि प्रचण्डजी अध्यक्ष हुनुहुन्छ नि !

A+ A A-

नेकपा प्रचण्ड–नेपाल समूहका अध्यक्ष माधवकुमार नेपालले निर्वाचन आयोगले आफूलाई अध्यक्ष नमाने पनि अर्का अध्यक्ष पुष्पकमल दाहाललाई स्वीकार गरेको बताएका छन् ।

सोमबार पेरिसडाँडामा आयोजित कार्यक्रमलाई सम्बोधन गर्दै नेपालले आफूलाई आयोगले अध्यक्ष नमाने पनि प्रचण्डलाई अध्यक्ष मानेकाले पार्टीको आधिकारिकता आफूहरूसँगै रहेको बताएका हुन् ।

‘निर्वाचन आयोगले मलाई अध्यक्ष मान्दिनँ भनेछ, केही छैन । प्रचण्डलाई मान्छु भनेपछि उहाँको आधिकारिकता त रह्यो,’ उनले भने, ‘केपी ओलीको नाम हामीले हटाएर दिइसकेका छौँ, अब उनी समाप्त भए ।’

यसअघि आइतबार निर्वाचन आयोगले साबिककै नेकपालाई आधिकारिक मान्ने निर्णय गरेको थियो । आयोगको यो निर्णयसँगै प्रचण्ड–नेपाल समूहले अध्यक्ष बनाएका नेपालको पदले पनि कानुनी मान्यता पाउने छैन । आयोगको यसअघिको रेकर्डमा ओली र प्रचण्ड नै नेकपाको अध्यक्ष रहेको र त्यसैलाई आयोगले मान्ने भएको छ ।

नेपालले पार्टीको बहुमत केन्द्रीय कमिटीको बैठकले ओलीलाई अध्यक्षबाट हटाइसकेकाले निर्वाचन आयोगले नमाने पनि उनी अध्यक्ष रहन नसक्ने बताए । ‘केन्द्रीय कमिटीले अनुशासनको कारबाही गरेर हटाउने अधिकार छ,’ उनले भने, ‘यस्तो अवस्थामा दुईवटा अध्यक्षमध्ये एउटा खाली हुने भयो । त्यो घुमिफिरी त आफैँतिर आउने नै हो । ’

उनले प्रधानमन्त्री ओलीलाई बालुवाटार छोडेर बालकोट गएर आराम गरेर बस्न पनि आग्रह गरे । ‘केपी ओलीजी अब केही चान्स छैन तपाईँको । खुरुक्क बालुवाटार छोडेर बालकोट गएर आराम गरेर बस्नुहोस् ।’

नेपालले ओली समूहलाई धुलो छाप पार्टीको पनि संज्ञा दिए । ‘केपी ओलीको पार्टी धुलो छाप पार्टी हो । कोही नजानुहोला,’ उनले भने ।

प्रकाशित मिति: सोमबार, माघ १२, २०७७ १५:३१