ईश्वर पोखरेलले भने : प्रचण्ड-नेपाल समूहको पाखण्डी निर्णयलाई निर्वाचन आयोगले बदर गरिदियो

ईश्वर पोखरेलले भने : प्रचण्ड-नेपाल समूहको पाखण्डी निर्णयलाई निर्वाचन आयोगले बदर गरिदियो

A+ A A-

नेपाल कम्युनिस्ट पार्टी (नेकपा) को ओली समूहका सचिवालय सदस्य ईश्वर पोखरेलले प्रधानमन्त्री केपी शर्मा ओलीलाई पार्टीको साधारण सदस्यबाट हटाउने प्रचण्ड-नेपाल समूहको निर्णयलाई ‘पाखण्डी निर्णय’ को संज्ञा दिएका छन् ।

पार्टी कार्यालय धुम्बाराहीमा सोमबार आयोजित पत्रकार सम्मेलनमा उपप्रधानमन्त्री पोखरेलले पार्टीको पहिलो वरीयताको अध्यक्ष ओलीलाई साधारण सदस्यबाट हटाउने प्रचण्ड-नेपाल समूहको ‘पाखण्डी निर्णय’ लाई निर्वाचन आयोगले बदर गरिदिएको बताए ।

तपाईंहरू पार्टी विभाजन हुन नसक्ने बताइरहँदा प्रचण्ड–नेपाल समूहले अध्यक्ष ओलीलाई साधारण सदस्यबाट हटाइसक्यो नि भन्ने प्रश्नमा पोखरेलले भने, ‘उहाँहरूको त्यो पाखण्डी निर्णयलाई हिजोको निर्वाचन आयोगको निर्णयले बदर गरिदिएको छ ।’

उनले प्रधानमन्त्री ओलीले पार्टी अध्यक्षका रुपमा राखेको अडानलाई नै आयोगको निर्णयले पुष्टि गरेको बताए । ‘हिजो निर्वाचन आयोगले लिएको निर्णयको हामीले सम्मान गर्छौं र त्यसलाई सकारात्मक लिन्न्छौँ,’ उनले भने,‘ यसले नेकपा विभाजन भएको छैन भन्ने हाम्रो अडानलाई स्वीकार गरेको छ । ’

उनले आफूहरू पार्टी विभाजन नभई पार्टी एकताकै पक्षमै रहिरहेको बताए ।

‘अध्यक्ष ओलीले पार्टीको तर्फबाट जे अडान राख्नुभयो । हामी फुटको पक्षमा थिएनौँ र छैनौँ । अहिले पनि हामीले कसैलाई पनि पार्टीबाट निष्कासन गरेका छैनौँ । पार्टी एकताकै पक्षमा छौँ,’ उनले भने ।

उपप्रधानमन्त्री पोखरेलले प्रचण्डले २८ कात्तिकमा प्रधानमन्त्री ओलीविरुद्ध पेस गरेको गम्भीर आरोपसहितको अभियोगपत्र फिर्ता लिएर निर्वाचनमा भाग लिन सहमत भए पार्टी एकतालाई बचाउन सकिने बताए ।

‘एकतालाई बचाउने हो भने २८ कात्तिकको प्रचण्डजीले प्रधानमन्त्री ओलीविरुद्ध पेस गरेको आरोपपत्र फिर्ता लिएर सरकारले घोषणा गरेको निर्वाचनमा भाग लिन तयार भएर आउनुपर्छ । त्यसो हुँदा पार्टीभित्रको अहिलेको संकट टार्न सकिन्छ,’ उनले भने ।

प्रकाशित मिति: सोमबार, माघ १२, २०७७ १४:१०