प्रचण्ड–नेपाल समूहद्वारा तेस्रो चरणको आन्दोलन घोषणा, माघ २८ मा काठमाडौंमा विरोध प्रदर्शन

प्रचण्ड–नेपाल समूहद्वारा तेस्रो चरणको आन्दोलन घोषणा, माघ २८ मा काठमाडौंमा विरोध प्रदर्शन

A+ A A-

प्रधानमन्त्री केपी शर्मा ओलीले प्रतिनिधिसभाको विघटन गरिदिएपछि आन्दोलित बनेको नेकपाको प्रचण्ड–नेपाल समूहले तेस्रो चरणको संघर्षका कार्यक्रम घोषणा गरेको छ ।

प्रचण्ड–नेपाल समूहको केन्द्रीय संघर्ष समितिका संयोजक नारायणकाजी श्रेष्ठले सोमबार संघर्षका थप कार्यक्रमबारे जानकारी दिएका छन् । श्रेष्ठले प्रतिनिधिसभा विघटन गर्ने कदम खारेज नभएसम्म आफूहरूको संघर्ष जारी रहने पनि जनाएका छन् ।

संघर्षका कार्यक्रमअन्तर्गत सो समूहले १३ माघमा काठमाडौंमा सिट्ठी जुलुस प्रदर्शन गर्ने भएको छ । त्यसै गरी १४ माघदेखि २१ सम्म माइतीघर मण्डलामा संविधानसभा सदस्य, संघीय सांसद तथा प्रदेशसभा सदस्यसहित धर्ना गर्ने भएको छ ।

त्यस्तै, १६ माघ १ बजे शान्ति बाटिकाबाट लैनचौरसम्म जुलुससहित सहिद श्रद्धाञ्जलि कार्यक्रम गर्ने संघर्ष समितिका संयोजक श्रेष्ठले जानकारी दिएका छन् ।

तेस्रो चरणको संघर्षका कार्यक्रमअन्तर्गत प्रचण्ड–नेपाल समूहले १५ माघमा बुटवलमा, १६ माघमा विराटनगरमा, १७ मा धनगढीमा विरोध प्रदर्शन तथा सभा गर्ने भएको छ । त्यस्तै, प्रदेशका राजधानीहरूमा विशिष्ट प्रकारका ठोस कार्यक्रमलाई निरन्तरता दिने निर्णय भएको पनि श्रेष्ठले जानकारी दिए ।

त्यस्तै, समाजका विभिन्न तह र तप्कासँग अन्तरक्रिया गर्ने कार्यक्रम राखिएको पनि श्रेष्ठले जनाएका छन् । संघर्षका कार्यक्रमअन्तर्गत २२ माघमा काठमाडौंमा युवा र्याली गर्ने भएको छ, त्यस्तै २६ माघमा देशव्यापी मसाल जुलुस तथा २८ माघमा काठमाडौंमा विरोध प्रदर्शन र सभा गर्ने संघर्ष समितिका संयोजक श्रेष्ठले जानकारी दिए ।