मौसम सफा भएसँगै गर्मी महसुस, भोलिदेखि चिसो बढ्ने सम्भावना

A+ A A-

पछिल्लो केही दिनयता काठमाडौं उपत्यकासहित देशभरको मौसस सफा भएसँगै गर्मी महसुस गरिएको छ । मौसम सफा भई राम्रोसँग घाम लागेकाले दिउँसोको अधिकतम तापक्रम वृद्धि भई गर्मी महसुस भएको मौसमविद् प्रतिभा मानन्धरले जानकारी दिइन् ।

'अब गर्मी नै सुरु भइसकेको भने होइन । केही दिन मौसम सफा भएकाले दिउँसोको अधिकतम् तापक्रम वृद्धि भई गर्मी महसुस भएको हो । कुनै मौसमी प्रणाली विकसित भए फेरि चिसो बढ्छ', मौसमविद् मानन्धरले बताइन् ।

मौसमविद्का अनुसार डम्म बादल लाग्यो भने बादलले ब्ल्याङ्केटको काम गर्छ र अधिकतम् तापक्रम घट्छ । पानी पर्‍यो भने पनि जाडो बढ्छ तर अहिले तत्कालै ठूलो पानी पर्ने सम्भावना भने नरहेको बताइएको छ । पानी पार्ने उल्लेखनीय मौसमी प्रणाली देशभर नै नरहेको जल तथा मौसम विज्ञान विभागले जनाएको छ ।

गत साता काठमाडौं उपत्यकासहित देशका विभिन्न स्थानमा वायु प्रदूषण ह्वात्तै बढेको थियो । त्यतिबेला अधिकतम् तापक्रम घटे पनि न्यूनतम् तापक्रम बढेको थियो । त्यसैले सर्वसाधारणले प्रदूषण बढेको समयममा पनि चिसो महसुस गर्न पाएनन् । गत वर्षमा डिसेम्बर वा जनवरीभित्रै हिउँदे वर्षा भएको थियो । यस वर्ष अहिलेसम्म हिउँदे वर्षा हुन सकेको छैन । (मंसिर, पुस र माघ) महिनामा ३.५ प्रतिशत वर्षा हुने गर्दछ ।

यस वर्ष माघ महिना सुरु हुन लाग्दा पनि हिउँदे वर्षा भएको छैन । आइतबार काठमाडौं उपत्यकाको अधिकतम् तापक्रम २३ दशमलव ७ डिग्री सेल्सियस मापन भएको थियो । आज पनि काठमाडौंको अधिकतम् तापक्रम २३ दशमलव ७ डिग्री सेल्सियस नै रहेको छ । त्यसैले गर्मी अनुभव भएको हो ।

भोलिदेखि देशको अधिकांश स्थानमा आंशिकदेखि सामान्य बदली भई केही स्थानमा हल्का वर्षा हुने सम्भावना रहेकाले दिउँसोको अधिकतम् तापक्रममा कमी भई चिसो बढ्ने मौसमविद् मानन्धरले बताइन् ।

मौसम पूर्वानुमान महाशाखाको पछिल्लो विवरणअनुसार आज काठमाडौं उपत्यकाको न्यूनतम तापक्रम ३ दशमलव ९ डिग्री र अधिकतम तापक्रम २३ दशमलव ७ डिग्री सेल्सियस रहेको छ । रासस

प्रकाशित मिति: सोमबार, पुस २७, २०७७ १९:१९