नेकपाको स्थायी समिति बैठक आज, ओली बैठकमा आउलान् त ?

A+ A A-

आज मध्यान्ह नेकपाको बहुप्रतिक्षित स्थायी समिति बैठक बस्दैछ । नेकपाको घरझगडा कसरी किनारा लाग्ला भन्ने अर्थमा आजको बैठक निकै महत्वपूर्ण हुनेछ । बैठकको एजेण्डा तय गर्ने सन्दर्भमा अध्यक्षद्वय केपी ओली र प्रचण्डबीच विवाद छ ।

त्यही विवादका कारण २१ मंसिरको स्थायी समिति बैठकमा ओली उपस्थिति भएनन् । त्यसदिन अनुपस्थित भएकै कारण अनौपचारिक संवाद गर्न २८ मंसिरलाई अर्को बैठक बोलाइएको थियो । तर, यो बीचमा एकपटकमात्रै ओली र प्रचण्डबीच संवाद भयो । त्यसले समस्या सम्बोधन गर्नेभन्दा पनि बरु आइन्दा एक्लाएक्लै नभेट्ने भन्दै निस्किए । त्यही सन्देश प्रचण्डले २५ मंसिरमा आफूनिकटका बागमती प्रदेशका नेताहरुलाई सुनाए ।

घरझगडाले थलिएको नेकपाको प्रचण्ड-माधव समूह स्थायी समिति बैठकबाट टुंगो नलाग्ने केन्द्रीय समितिमा पुग्ने मूडमा छन् । तर, ओली समूह सकेसम्म स्थायी समिति बैठक विनानिष्कर्ष टुंगियो भन्ने चाहन्छन् । ५ पुसलाई केन्द्रीय समिति बैठक बोलाइएको छ ।

बैठकमा आउन ओलीमाथि दबाब
प्रधानमन्त्री तथा केपी ओलीलाई आजको स्थायी समिति बैठक बहिस्कार गर्न सहज भने छैन । २१ मंसिरको स्थायी समिति बैठकमा भौतिक उपस्थिति नभएपछि पत्रमार्फत आफ्ना धारणा राखेर ओलीले सहभागिता जनाइसकेको इतर पक्षको दाबी छ ।

खासगरी, प्रचण्डले ३ मंसिरमा पेस गरेको राजनीतिक प्रस्ताव र १३ मंसिरमा ओलीले पेस गरेको प्रतिजवाफको प्रस्तवामाथि छलफल नहुने अवस्थामात्रै ओली स्थायी समिति बैठकमा उपस्थित हुन सक्ने बताइरहेका छन् ।

ओलीको त्यही अडानका बीचमा पनि २१ मंसिरको स्थायी समिति बैठकमा उनीनिकट ११ जना नै स्थायी समिति सदस्य सहभगाी भए । त्यसमा शंकर पोखरेलले मात्रै उक्त प्रतिवेदनमाथि छलफल गर्न नहुने धारणा राखेका थिए । अहिले बैठकका लागि पार्टीको आन्तरिक समस्यासम्बन्धी भनेर छलफलको कार्यसूची बनाइएको छ ।

शीतलनिवास स्रोतका अनुसार थालमा जति छ, बाँडीचुँडी खानु भन्ने सन्देश ओलीलाई दिने गरेकी छिन्, जसले गर्दा ओलीले अपेक्षित सहयोग शीतल निवासबाट पाइरहेका छैनन्, त्यसकारण उनलाई बैठकमा जान दबाब बढेको छ ।

राजनीति प्रतिवेदनलाई प्रमुख एजेण्डाको रुपमा नबनाएका कारण ओलीलाई बैठकमा जान आफ्नैबाट दबाब छ । महासचिव विष्णु पौडेल, नेता सुवास नेम्वाङ, पृथ्बीसुब्बा गुरुङलगायतका नेताहरु प्रधानमन्त्री बैठकमा सहभागी हुने दाबी गरिरहेका छन् ।

निरन्तर राष्ट्रपति विद्यादेवी भण्डारीसँग संवादमा रहेका ओलीलाई भण्डारीको सुझाव पनि दुई अध्यक्ष मिल्नु भन्ने रहेको छ । शीतलनिवास स्रोतका अनुसार थालमा जति छ, बाँडीचुँडी खानु भन्ने सन्देश ओलीलाई दिने गरेकी छिन्, जसले गर्दा ओलीले अपेक्षित सहयोग शीतल निवासबाट पाइरहेका छैनन्, त्यसकारण उनलाई बैठकमा जान दबाब बढेको छ । शनिबार ११ बजे पनि शीतल निवास छिरेका ओलीले पार्टीकै छलफलमा केन्द्रित रहेको शीतलनिवास स्रोतको दाबी छ ।

आजका लागि तय संवैधानिक परिषद्को बैठकमा विपक्षी दलको नेता नआउने जनाउ पाएपछि ओली शीतलनिवास पुगेका थिए । परिषद्को बैठक नै अन्यौलमा परेको छ । एकातिर स्थायी समितिको बैठक, त्यसैको सम्मुखमा परिषद् बैठक राखेर संवैधानिक निकायमा नियुक्तिको प्रयासले ओली अझै पनि प्रचण्ड-माधव समूहलाई दबाब बढाउन चाहन्छन् भन्ने सन्देश पनि प्रवाहित गरिरहेका छन् । अर्कातिर २१ मंसिरको स्थायी समितिमा ओलीपक्षका सबै नेताहरु सहभागी भएकोले पनि ओलीमाथि आज बैठकमा सहभागी हुन दबाब बढेको छ ।

प्रचण्डको बहुमतमा जोड
घरझगडा टुंगो लगाउन नेकपाभित्र स्थायी समितिको बहुमतले निर्णय लिनुपर्ने आवाज उठ्न थालेको छ । विवादलाई तन्काएर राख्न नसकिने भन्दै नेकपाका स्थायी समिति नेताहरु बहुमतीय प्रक्रियाबाट भए पनि विवाद किनारा लगाएर पार्टीलाई सक्रिय बनाउनुपर्ने मत छ ।

यो मत राख्नेमा प्रचण्ड-माधव नेपाल समूहका नेताहरुको हो तर एकताको भावना र विधानविपरीत हुनेभन्दै ओली पक्ष बहुमतीय प्रक्रियाको विरोधमा छ । तर, विगतमा माधव नेपाललाई एक्लो बनाउन प्रचण्ड र केपी ओलीले बहुमतको अभ्यास गरिसकेका कारण ओली समूहको तर्क बलियो नभएको नेपाल समूहका नेताहरुको भनाइ छ ।

स्थायी समिति सदस्य अष्टलक्ष्मी शाक्य पार्टी सधै गञ्जागोलमा रहुनभन्दा विधि र प्रक्रियाबाट टुंगो लगाउनुपर्ने बताउँछिन् । शाक्य भन्छिन्, ‘यो कलह कतिञ्जेल राख्ने अब प्रक्रियाबाट टुंगो लगाउनपर्छ ।’ यो सन्देश चाँहि अध्यक्ष प्रचण्ड र नेता माधव नेपालले आफूनिकटका नेताहरुलाई दिइरहेका छन् ।

गुटभेलामा जारी
पार्टीभित्रको विवाद मिलाउनका लागि अनौपचारिक संवाद गर्नलाई एक साताको समय राखेर २१ मंसिरको स्थायी समितिले आजलाई बैठक तोकेको थियो । यो बीचमा दुई अध्यक्ष केपी ओली र प्रचण्डवीच जम्मा एकपटकमात्रै संवाद भयो । प्रितीकर हुन नसकेको त्यो संवादपछि प्रचण्ड र ओली दुवै समूहले प्रदेश र जिल्ला तहमा गुट भेलामा जोड दिए ।

२५ मंसिरमा प्रचण्ड-माधव नेपाल समूहले बाग्मती प्रदेशको नेताहरुलाई पेरिसडाँडामा बोलाएर छलफल गरे । त्योभन्दा अघि गण्डकी प्रदेशका नेताहरुसँग पोखरामा गुट भेला भएको थियो । खासगरी, १० पुसमा ओली पक्षका विद्यार्थी नेताहरु मदन भण्डारी कलेजमा गुट बेला गरेर प्रचण्ड-माधव नेपाल समूहको राजनीतिक प्रतिवेदन छलफलमा प्रतिवन्ध लगाउने र बहस भए प्रतिकार गर्ने सम्मको निर्णय गरेपछि अर्को समूहले १९ मंसिरमा थापाथली क्याम्पसमा भेला गर्‍यो ।

हुन त त्यो भन्दा पहिला नै ओलीले प्रदेश १ का आफूनिकट नेताहरुलाई भर्चुअल बैठकमा सम्बोधन गरेका थिए । त्यसको निरन्तरतामा ओली समूहका नेताहरु सक्रिय छन् । यो समूहको युवा तथा विद्यार्थी नेताहरुको समूहले प्रदेश १ मा छलफल गरिसकेको छ । र, ३ पुसमा प्रदेश २ मा छलफल गर्दैछ । र, निरन्तर अन्य प्रदेशमा जाने रणनीति बनाएको छ । त्यसलाइ काउन्टर गर्न प्रचण्ड-माधव नेपाल समूहले पनि प्रदेश तहमै छलफललाई निरन्तरता दिएको हो ।

स्थायी समिति सदस्य अष्टलक्ष्मी शाक्यले पार्टीको समस्या कार्यकर्तालाई जानकारी दिन छलफल आवश्यक परेको बताईन् । शाक्यका अनुसार छलफल सबै प्रदेशमा निरन्तर हुनेछन् ।

प्रकाशित मिति: आइतबार, मंसिर २८, २०७७ ०८:३२