पोखरा-बेलापुर सडकखण्ड : डिभिजन वनले माग्यो पूर्वाधार कार्यालयसँग जवाफ

A+ A A-

कञ्चनपुरको दैजीदेखि बैतडी र बझाङको देउरा जोड्ने राजमार्गको डडेल्धुरामा पर्ने पोखरा-बेलापुर सडकखण्डमा निर्माणका नाममा अन्धाधुन्ध सल्लाका रुख काटिएको विषयमा डिभिजन वन कार्यालयले पूर्वाधार कार्यालय डडेल्धुरालाई पत्र काटेको छ ।

सामुदायिक वनले रुख कटानको लागि डिभिजन कार्यालय डडेल्धुराबाट इजाजत नलिएको र सडक निर्माणका लागि वातावरणीय प्रभाव मूल्यांकन कार्य प्रक्रियामै रहेका बेला रुख काटिएको विषयमा अनुसन्धान गरिरहेको डिभिजन वनले पूर्वाधार कार्यालयसँग जवाफ मागेको हो । पूर्वाधार कार्यालय डडेल्धुराले भने सडक निर्माणका क्रममा आफूहरूले रुख नकाटेर सामुदायिक वनले काटेको बताउँदै आएको छ ।

कार्यालयका प्रमुख इन्जिनियर रामचन्द्र खत्रीले वनले कार्यालयका नाममा पत्र काटेको र त्यो पत्र कार्यालयमा पुगेको जानकारी दिए । पत्र हेरेर वनलाई जवाफ दिने उनको भनाइ छ ।

डिभिजन वन कार्यालयले रेन्जर केशव पौडेललाई अनुसन्धानकर्ता तोकेको छ । पौडेलको टोलीले अनुसन्धान गरिरहेको छ । रेन्जर पौडेलले सामुदायिक वनका अध्यक्षलाई लिखित जवाफ दिन भने पनि अझै नदिएको बताए ।

डडेल्धुराको अमरगढी नगरपालिका- ७ पोखरादेखि नवदुर्गा गाँउपालिकाको बेलापुरसम्म १० किलाेमिटर सडक कालोपत्रे गर्ने काम चलिरहेको छ । नवदुर्गा गाँउपालिका- १ मष्टभगवती मन्दिरसम्म सडक पिच हुने भएकाले रुख खेर जानुभन्दा उपभोक्ताको मागअनुसार रुख कटान गरिएको पलेथ्थर सामुदायिक वनका अध्यक्ष खडकबहादुर बुढाएरले जानकारी दिए । १० मिटर सडक पिच गर्दा धेरै रुख काटिएर खेर जाने भएकोले सर्वपक्षीय बैठक राखेर निर्णय गरि रुख काट्न स्थानीयलाई पुर्जी दिएको अध्यक्ष बुढाएरले बताए ।

सडक निर्माणकाे निहुँमा काठ तस्करहरूले नवदुर्गा गाउँपालिका-१ को पलेथ्थर र सल्लेरी सामुदायिक वनक्षेत्रमा हरिया सल्लाका रुख काटेर गोलिया बनाएका छन् । स्थलगत अनुगमन गर्दा पलेथ्थर सामुदायिक वनमा ३१ र सल्लेरी सामुदायिक वनमा १६ सल्लाका रुख काटेको पाइएको डिभिजन वन कार्यालयले जनाएको छ ।

वन फडानी गरेर गोलिया बनाई राखेको अवस्थामा करिब ३५ सय क्युविक फिट काठ अवैधरूपमा काटिएको पाइएको डिभिजन वन कार्यालयले जनाएको छ । सडक निर्माणका क्रममा सैयौँ सल्लाका रुख वातावरण परीक्षण तथा प्रभाव मूल्यांकन नगरेर काट्ने र कानुनविपरित वन विनाश गर्ने कार्यमा स्थानीय तहदेखि प्रदेश सरकारका जनप्रतिनिधिको समेत संग्लनता रहेको स्थानीयले आशंका गरेका छन् ।

सो सडक निर्माणका लागि आर्थिक वर्ष २०७६/७७ मा ठेक्का सम्झौता भइसकेको र ढुङ्गाडसम्मको ट्रयाक खोल्ने कार्य आर्थिक वर्ष २०७५/०७६ मा सम्पन्न भएको प्रदेश सरकार मातहतको पूर्वाधार विकास कार्यालय डडेल्धुराले जनाएको छ । केएस कन्ट्रक्सन निर्माण कम्पनीले यो सडकखण्डमा कालोपत्रेकाे काम गरिरहेको छ ।

सम्बन्धित समाचार