प्रदेश १ मा प्रतिपक्षीको चेतावनीः सरकार एक्लै नबढ

A+ A A-

प्रदेश नं १ को प्रदेश सभाको आजबाट सुरु भएको हिउँदे अधिवेशनको पहिलो बैठकमा प्रतिपक्षी सांसदहरुले सरकारलाई एकलौटी निर्णय नगर्न सचेत गराएका छन् ।

उनीहरुले सरकारले एकलौटी रुपमा अगाडी बढेको भन्दै आइन्दा यस्तो कार्य नदोहाेर्याउन सत्तापक्षलाई सजग गराएका हुन् । बैठकमा नेपाली काग्रेसको संसदीय दलका नेता राजिव कोइरालाले सरकारसँग सहकार्य गर्ने तर पछि नलाग्ने बताए ।

उनले प्रदेश सरकारले समयमा बजेट कार्यान्वय नगर्दा प्रतिपक्ष समेत बदनाम हुने अवस्थामा पुगेको जिकिर गर्दै प्रदेश सरकारलाई सफल बनाउन आफुहरुको रचनात्मक सहयोग रहने बताए ।

उनले प्रदेश सरकारको भनाइ र गराइ समेत नमिलेको भन्दै आलोचना गरे । अहिले संघीयता कागजको नाउ जस्तो भएको भन्दै कुनैपनि समय दुर्घटनामा पर्न सक्ने दाबी गरे ।

नेकपा संसदीय दलका उपनेता टंक आङबोहाङले सरकारको काम कार्वाहीको बचाउन गरेका थिए । बैठकमा बोल्दै आङबोहाङले प्रदेश सरकारले नीति तथा कार्यक्रम अनुसार बिकासका कामलाई कार्यान्वयको चरणमा लान कर्मचारी समायोजना, नयाँ अभ्यास, संघिय सरकारबाट हस्तान्तरण लगायतको कारणले बजेट कार्यान्वयनमा ढिलाई भएको स्वीकार गरे ।

उनले अबका दिनमा सत्ता पक्ष र प्रतिपक्षको रुपमा अगाडी बढ्न नहुने भन्दै कांग्रेस लगायतका विपक्षी दलहरुलाई सहकार्यका लागि आव्हान गरे ।

संघीय समाजवादी फोरम संसदीय दलका नेता जयराम यादवले प्रदेश राजधानी र नामाङकनको विषय टुङ्गो लागाएपछि मात्र विकास र समृद्धिको बाटोमा अगाडी बढ्न सकिने बताए । उनले संसदिय समिति र मन्त्रीमण्डललाई चाडै पुर्णता दिनु पनेमा जोड दिए ।

राष्ट्रिय प्रजातन्त्र पार्टी संसदीय दलका नेता इन्दीरा राई र संघीय लोकतान्त्रीक राष्ट्रिय मन्चका नेता विष्णु तुम्बहाम्फेले ऐतिहासीक पहिचानको आधारमा प्रदेशको नाम टुङ्गो लागाउनु पर्नेमा जोड दिए ।

प्रदेश सभा बैठकमा संसदको कार्य व्यवस्था परामर्श समितिको सदस्यमा नेकपा सांसद मोहन कुमार खड्काको स्थानमा सिता थेवेलाई सर्वसम्मत नियुक्त गरिएको छ ।

बर्षे अधिबेशन अन्त्य भएको तीन महिना २७ दिनपछिबाछ शुरु भएको हिउँदे अघिबेशन प्रदेश प्रमुख प्रा डा गोबिन्द सुब्बाको अधिवेशन आब्हान सम्बन्धि पत्र सभामुख प्रदिप भण्डारीले पढेर सुनाएका थिए ।

संसद भवन अघि लिम्बुवानको धर्ना

प्रदेश १ को हिउदे अधिवेसन सुरु भए सँगै किरात लिम्बुवान वा खम्बुवान नाम माग गर्दै संसद भवन अगाडि १ घण्टा धर्ना दिएका छन ।

संघीय लोकतान्त्रिक राष्ट्रिय मञ्चका अध्यक्ष कुमार लिङदेनको नेतृत्वमा धर्ना बसेका थिए । संसद भवन अगाडि धर्ना दिएका लिम्बुवान संगठन सम्बद्ध नेताहरुले ३ बजे शुरु भएको अधिवेशनलाई प्रभावित पार्ने गरि धर्ना दिएका थिए ।

बाक्लो सुरक्षा व्यवस्थाकाविच प्रदेश समितिको हिउँदे अधिवेशन संचालन भएको थियो । कार्यक्रममा सुनसरी, झापा र मोरङका विभिन्न स्थानबाट बाक्लो संख्यामा सो पार्टीका कार्यकर्ताको उपस्थिती रहेको थियो ।