रुपमतीको हत्यामा संलग्न सार्वजनिक

A+ A A-

विराटनगर महानगरपालिका–८ बलुवाईकी ११ वर्षीया बालिका गुडिया भनिने रुपमती दासको हत्या अभियोगमा पक्राउ परेको दुई जनालाई प्रहरीले सार्वजनिक गरेको छ ।

जिल्ला प्रहरी कार्यालय मोरङले आज पत्रकार सम्मेलन गरी रुपमतीलाई बलात्कार पछि हत्या गरेको अभियोगमा पक्राउ परेका विराटनगर ८ का २५ वर्षीय आवत अन्सारी र १८ वर्षीय चन्दु महतोलाई सार्वजनिक गरेको हो ।

लागुऔषधको दुव्र्यसनमा फसेका दुई युवाले रुपमतीको हत्या गरेको प्रहरी अनुसन्धानको निश्कर्ष निस्किएपछि उनीहरुलाई पक्राउ गरिएको प्रहरीले जनाएको छ । दुबै जनालाई पक्राउ गरेर थप अनुसन्धान गर्ने काम भइरहेको प्रहरीले जनाएको छ ।

प्रहरीले सार्वजनिक गरेको घटनास्थलको स्केच

घटना भएको एक सातापछि प्रहरीले वास्तविकता र दोषी पत्ता लगाउन सकेको हो । अन्सारी र महतोलाई प्रहरीले घटना भए यता अनुसन्धानको दायरामा ल्याएको थियो ।

प्रमाण जुटाउन नसक्दा घटनामा उनीहरुको संलग्नता हो की हैन भन्ने दोधारमा प्रहरी परिरहेको थियो । पक्राउ परेका दुबै जनाले घटनामा संलग्नता स्वीकार गरिसकेको प्रहरी स्रोतले जानकारी दिएको छ ।

घटनाको अनुसन्धानका क्रममा प्रहरीले ११ जनासंग सोधपुछ गरेको थियो । घटनाको अनुसन्धानमा संलग्न एक प्रहरीका अनुसार लागुऔषधकै नसामा उनीहरुले बलात्कारपछि बालिका रुपमतीको हत्या गरेको अनुसन्धानका क्रममा खुलेको छ ।

मोरङ प्रहरी प्रमुख एसपी मनोजकुमार केसीले घटनालाई अझै पनि घटनाको निचोडमा पुग्न केही प्रमाण संकलन गर्ने काम भइरहेको बताए । प्रहरीले अहोरात्र खटेर गरेको मेहनत अनुसार राम्रो उपलब्धी हाँसिल हुँदै गएको उनको भनाइ छ ।

केसीले घटना जघन्य प्रकृतिको भएकाले पनि प्रमाणसंग जोडेर हेर्नु पर्ने भएकाले अनुसन्धानमा समय लागेको जानकारी दिए । घटनाको एक हप्तासम्म पनि कुनै सूचना सार्वजनिक गर्न नसकेको प्रहरीको आलोचना गर्ने क्रम समेत सुरु भएको थियो । हिजोमात्र मृतक वालिकाका परिवारले प्रहरीले गम्भिरतापूर्वक अनुसन्धान नगरेको भन्दै प्रहरीको आलोचना गरेका थिए ।

जिल्ला प्रहरी कार्यालय मोरङ र प्रदेश १ प्रहरी कार्यालय विराटनगरको संयुक्त टोलीले घटनाको अनुसन्धान थालेको थियो । अनुसन्धानमा खटिएका एक प्रहरी अधिकृतले घटनाको अनुसन्धान गर्न आवश्यक पर्ने धेरै प्रमाणहरु संकलनमै समय धेरै लगाउनु परेको बताए ।

मोरङको विराटनगर महानगरपालिका–८ र कटहरी गाउँपालिका–२ को सीमानामा रहेको सिंघिया खोलामा माघ १३ गते नग्न अवस्थामा रुपमतीको शव फेला परेको थियो ।

छिमेकी मोहम्मद नहिमकहाँ टिभी हेर्न भनेर आमा मुन्नीदेवीसंग शनिबार राति लगभग ८ हिंडेकी रुपमतीको शव हत्या गरेर फ्यालेको अवस्थामा बगिरहेको खोलाको पानी भित्र भोलीपल्ट फेला परेको हो ।

त्यसअघि नै नहिमकहाँ टिभी हेरिरहेका बुवा रामप्रसाद घर फर्किएपछि मात्रै छोरी टिभी हेर्न नगएको खुलेको थियो । अनुसन्धानमा खटिएका एक प्रहरी अधिकारीका अनुसार सुरुमा मुख बन्द गरेर उनीहरुले घरदेखि अलि पर खोलाको डिस्कोको चउरमा पुर्याएको खुलेको छ । त्यसपछि पालै पालो बलात्कार गरेको र बालिकाले चिच्याउन खोजेपछि अन्सारी र महतोले मुख र घाँटी थिचेर पालै पालो बलात्कार गरेको प्रहरी स्रोतको भनाइ छ ।

मुख र घाँटी थिचेर बलात्कार गरेकै कारण रुपमतीको मृत्यु भएको बताइएको छ । प्रहरीका अुनसार बलात्कार गरिरहेकै बेला त्यहीं छेउमा रहेको बाटो हुँदै राति एक वृद्धा हिंडेको देखेपछि ती युवाले रुपमतीलाई बगिरहेको खोलाको पानी भित्र फ्यालेर हिंडेको खुलेको छ ।

त्यस अघि अन्सारी र महतोले रुपमतीकै एक आफन्त युवतीलाई बलात्कारको योजना बनाएको प्रहरी अनुसन्धानबाट पत्ता लागेको छ । युवतीलाई निशाना बनाउनु अघि पनि एक महिलालाई अन्सारीले पाउरोटीमा लागुऔषध नाईट्रोसन मिसाएर खुवाएर बलात्कारको योजना बनाएको प्रहरी अनुसन्धानबाट खुलेको छ । तर महिलाले खान अस्वीकार गरेका कारण उनीहरुको त्यो योजना भने सफल नभएको प्रहरी अनुसन्धानका क्रममा देखिएको छ ।

त्यसपछि रुपमतीकै आफन्त एक युवतीलाई उनीहरुले निशाना बनाएको र त्यो पनि असफल हुँदा राती टिभी हेर्न छिमेकी घरमा जादै गरेको रुपमतीलाइ उनीहरुले बलात्कार गरेको प्रहरी अधिकारीहरुको भनाइ छ ।

महिलालाई पाउरोटीमा मिसाएर नाईट्रोसन खान दिएको घटनाले पनि अनुसन्धानमा धेरै ठूलो सहयोग पु¥याएको प्रहरीको भनाइ छ । रुपमतीले लगाएको चप्पल भने शव भेटिएकै दिन फेला परेको थियो ।

घटनामा संलग्नको पहिचान भएर पक्राउ परेपछि मात्रै बालिकाले लगाएका कपडा फेला परेका हुन् । प्रहरीले रुपमतीले लगाएको टोपी र कपडा भने सय मिटर आसपासमा मान्छे मर्दा शव जलाउनका लागि प्रयोग गरिने ठाउँमा फेला परेको जनाएको छ ।पक्राउ परेकाहरुले नै प्रहरीलाई घटनास्थल र रुपमतीको कपडा फ्यालेको ठाउँ देखाइदिएका हुन् । रुपमतीले लगाएको टोपी, जामा, सुरुवाल लगायतका कपडा बरामद गरिसकिएको प्रहरी भनाइ छ ।

शव पानी भित्र भेटिएको र पानीले घटनाको प्रमाण नष्ट गरिदिंदा अनुसन्धानका लागि सुरुमा कुनै भेउ पाउन नसकेको प्रहरीले पोष्टमार्टम रिपोर्टले पनि बलात्कारपछि नै हत्या भएको पुष्टि गरेपछि अनुसन्धान तिब्र बनाएको थियो ।

अनुसन्धान र पोष्टमार्टम रिपोर्ट मेल खाएपछि तथा हत्यामा संलग्न पक्राउ परेर घटनामा आफूहरुको संलग्नता स्वीकार गरिसकेपछि प्रहरीले घटनाको सबै विवरण सार्वजनिक गर्ने तयारी गरिरहेको छ ।

प्रकाशित मिति: आइतबार, माघ २०, २०७५ १५:१०