स्थानीयकै मिलेमतोमा वन फडानी : प्रदेश वन निर्देशक विष्ट

A+ A A-

डडेल्धुरा जिल्लाको भित्रिमधेस क्षेत्र आलिताल गाउँपालिका–८ मा निर्मित डोला चक्रपथ सडक निर्माणका क्रममा अवैध रूपमा सालका रूख काटिएको विषयमा सुदूरपश्चिम वन निर्देशनालयले स्थलगत निरीक्षण गरेको छ । प्रदेश वन निर्देशक हेमराज विष्टसहितको टोलीले शनिबार निरीक्षण गरेको हो ।

अनुगमनका क्रममा स्थानीयकै मिलेमतोमा वन फडानी गरेको पाइएको निर्देशक विष्टले जानकारी दिए । उनले रजनी सामुदायिक वन र राष्ट्रिय वनक्षेत्रमा रहेका साल, जामुन र अस्मा गरेर ५८ वटा रूख हानी नोक्सानी भएको बताए ।

‘डोला चक्रपथ सडक निर्माणका क्रममा अवैध रूपमा ती रूख काटिएका हुन् । बरामद गरेका केही काठ आलिताल सव डिभिजनमा राखिएको छ,’ उनले भने, ‘रूख काट्ने समूह र त्यहाँका स्थानीयले घटनालाई गुपचुप राख्दा हामीले जानकारी पाएनौँ । क–कस्को मिलेमतो छ भन्ने कुरा अनुसन्धानले देखाउँछ ।’

‘एक महिनाअघि काटिएका रूख ढिलो थाहा पाउनु वनका कर्मचारीको लापरबाही जस्तो देखिन्छ । अनुसन्धान जारी छ । जानकारी पाउँदा पाउँदै वनका कर्मचारीले वास्ता नगरेको भए उनीहरूको पनि संलग्नता छ भन्ने कुरा देखाउँछ,’ उनले थपे ।

स्थलगत निरीक्षण गर्दा सामुदायिक वन र राष्ट्रिय वनको कर्मचारीको मिलेमतोसँगै आयोजना र निर्माण कम्पनीको मिलोमतो प्रष्ट देखिएको उनको भनाइ छ ।

आलिताल गाउँपालिकाको समपूरक कोषबाट निर्मित सो सडकको विस्तृत परियोजना प्रतिवेदन (डीपीआर) मा सडकको एलाईन्मेन्टमा ६ सालका रूख पर्ने उल्लेख छ । आलिताल गाँउपालिकाले डोला चक्रपथ सडक निर्माणका लागि बोलपत्र आह्वान गरेपछि इब्रिडिङमार्फत उग्रतारा कन्ट्रक्सन प्रालिको ठेक्का सदर भएको हो ।

८८ लाख ५८ हजार ७८ रुपैयाँमा डोला चक्रपथ सडक निर्माणका लागि गत २३ जेठमा निर्माण कम्पनीका तर्फबाट आधिकारिक प्रतिनिधि मानसिंह घर्ती मगरले गाउँपालिकासँग सम्झौता गरेका छन् ।