नेकपालाई १० लाख दिन नसक्दा बाहिरिएको खुलासा

A+ A A-

डडेल्धुराको आलिताल गाउँपालिका–८ मा निर्मित डोला चक्रपथ सडक निर्माणका क्रममा स्थानीयस्तरमा मिलेमतोमै वन फडानी भएको पाइएको छ ।

स्थानीयस्तरमा क्रियाशील राजनीतिक दलका नेता कार्यकर्ताहरू सामाजिक अगुवा, जनप्रतिनिधि र निर्माण व्यवसायीको मिलेमतोमा वन फडानी गरेको भए पनि काठ काटिएको लामो समयपछि रकममा कुरा नमिल्दा डिभिजन वन कार्यालय डडेल्धुरालाई जानकारी गराइएको स्थानीय बताउँछन् ।

चक्रपथ सडक निर्माण भइरहेको आलिताल गाउँपालिका–८, डोला र आसपासका बस्तीका बासिन्दाहरूको बैठक बसेर सामाजिक कार्यका लागि केही काठ उपलब्ध गराउने र बाँकी काठ बिक्री गरेर सबैले रकम बाँडफाड गर्ने सहमति भई काठ काटिएको प्रारम्भिक अनुसन्धानमा खुल्न आएको वन अधिकारीहरू बताउँछन् ।

‘अनुसन्धानका क्रममा धेरै कुरा अहिले नै भन्न मिल्दैन,’ डिभिजन वन कार्यालय डडेल्धुराका निमित्त प्रमुख डलबहादुर बोहराले भने, ‘सामाजिक रूपमा मिलेमतो गरेरै वन फडानी भएको हामीले जानकारी पाएका छौँ ।’

गत असार मसान्त नजिकिँदै जाँदा निर्माण कार्य गरिएको सो सडकखण्डआसपासका रूखहरू सोही अवधिमा काटिएका हुन् । काटिएका रूखहरू गोलिया बनाएर सडक खण्डभन्दा टाढा खोल्साखोल्सीमा लुकाइएको पाइएको छ भने केही काठ चिरेर बिक्रीसमेत गरेको स्थानीयको दाबी छ ।

काठ लुकाएर अवैध रूपमा बिक्री वितरणसमेत गरिन थालेपछि सत्तारुढ नेपाल कम्युनिस्ट पार्टीका स्थानीय केही नेता कार्यकर्ताहरूले वन फडानीका बारेमा चासो राख्दै ८ देखि १० लाख रुपैयाँ पार्टीलाई सहयोग गर्नुपर्ने माग राखेको र काठ बिक्री भइसकेपछि मात्रै रकम उपलब्ध गराउने सहमति गराउन खोज्दा कुरा नमिलेर उनीहरूले डिभिजन वन कार्यालयलाई गुहारेको सडक निर्माण गरिरहेको निर्माण कम्पनी उग्रतारा कन्स्ट्रक्सनसम्बद्ध स्रोतले जनाएको छ ।

आलिताल गाउँपालिकाको समपूरक कोषबाट निर्मित सो सडकको विस्तृत परियोजना प्रतिवेदन (डीपीआर) मा सडकको एलाइन्मेन्टमा ६ वटा सालका रूखहरू पर्ने उल्लेख छ । तस्करी गर्ने उद्देश्यले सडकको एलाइन्मेन्टभित्र नपर्ने सालका रूखहरू समेत काटिएको स्थानीय बताउँछन् ।

आलिताल गाउँपालिकाले डोला चक्रपथ सडक निर्माणका लागि बोलपत्र आह्वान गरेपछि इब्रिडिङमार्फत उग्रतारा कन्स्ट्रक्सन प्रालिको ठेक्का सदर भएको हो । ८८ लाख ५८ हजार ७८ रुपैयाँमा डोला चक्रपथ सडक निर्माणका लागि गत ३२ जेठमा निर्माण कम्पनीका तर्फबाट आधिकारिक प्रतिनिधि मानसिंह घर्ती मगरले गाउँपालिकासँग सम्झौता गरेका छन् ।

सुदूरपश्चिम प्रदेशको अग्रणी निर्माण कम्पनी राजेन्द्र निर्माण सेवा प्रालिकै सहयोगी कम्पनीका रूपमा रहेको उग्रतारा कन्स्ट्रक्सन प्रालि सुरेन्द्र साउदको नाममा दर्ता छ । सम्बद्ध स्रोतका अनुसार ठेक्का सदर भएको उग्रतारा कन्स्ट्रक्सनले निर्माण व्यवसायीहरू मानसिंह घर्तीमगर, मोहन कठायत र वीरेन्द्रबहादुर शाहीसँग सम्झौता गरेर पेटी ठेक्का दिएको हो ।

परशुराम नगरपालिकाका नगर प्रमुख भीमबहादुर साउदको स्वामित्वमा रहेको राजेन्द्र निर्माण सेवा प्रालिद्वारा आलिताल गाउँपालिकाको रंगुन नदीमा निर्माणाधीन पक्की पुलमा समेत घर्तीमगर, कठायत र शाहीले पेटी ठेकेदारका रूपमा काम गर्दै आएका थिए ।

निर्माणाधीन सो पुलमा प्रयोग गरिएका हेभी इक्विपमेन्ट र उपकरणहरू प्रयोग गरेर डोला चक्रपथ सडक निर्माण गरिएको स्थानीय बताउँछन् । पेटी ठेकेदारहरूले स्थानीयस्तरमा क्रियाशील सत्तारुढ दल सम्बद्ध नेताकार्यकर्ताहरूलाई माग गरिएअनुसार रकम दिन नसकेपछि सो प्रकरणको खुलासा भएको हो ।

स्थानीयबाट प्राप्त सूचनाका आधारमा डिभिजन वन कार्यालय डडेल्धुराले सशस्त्र वनकर्मीहरूको टोलीसहित सो सडक खण्डको निरीक्षण गर्दा गत शुक्रबार पहिलोपटक १ सय १० थान गोलिया सालका काठ बरामद गरेको थियो ।

‘कुरा नमिलेपछि वन कार्यालयलाई जानकारी गराइएको पाइएको छ,’ स्थानीय एक अगुवाले नाम नछाप्ने सर्तमा भने, ‘सहमतिमै काठ काटिएपछि केही काठ आमा समूहको भवन निर्माणका लागि र केही अन्य सामाजिक कामका लागि छुट्याइएको थियो ।’

सहमतिअनुसार नै केही स्थानीयलाई दाउरा र काठ उपलब्ध गराइएको स्थानीय बताउँछन् । प्रदेशसभा सदस्य कुन्ती जोशीको घरनजिकै ढालिएको रूखबाट उनका स्वकीय सचिवसमेत रहेका सहोदर भाइ शर्मानन्द जोशी र अन्य सामाजिक अगुवाहरूलाई पनि सहमतिमै काठ उपलब्ध गराइएको निर्माण व्यवसायी सम्बद्ध स्रोतको दाबी छ ।

पोल खोल्ने क्रम सुरु भएपछि जोशीको घरमा लुकाएर राखिएको काठ बरामद गर्न केही स्थानीयले वनकर्मीलाई दबाब दिएका थिए भने स्थानीयकै सूचनाका आधारमा डिभिजन वन कार्यालयको टोलीले दोस्रोपटक निरीक्षण गर्दा जंगल क्षेत्रबाट थप ४२ थान गोलिया सालको काठ बरामद गरेको थियो । जंगलमा बरामद गरिएको काठ संकलन गरेर आलिताल वन सब डिभिजन कार्यालयमा राखिएको छ ।

सांसद जोशीको घरमा बरामद गरिएको काठ भने उठाइएको छैन । सुदूरपश्चिम प्रदेश सभामा सामाजिक समितिकी सभापतिसमेत रहेकी सांसद जोशीको घरमा गोलिया सालको काठ अन्दाजी ६० क्युफिट र चिरान गरिएको सालको काठ ३ क्युफिट बरामद गरिएको छ भने २०/२२ थान गोलिया २ फिट लम्बाइभित्र पर्ने दाउरासमेत बरामद गरिएको डिभिजन वन कार्यालय डडेल्धुराले जनाएको छ ।

जंगल क्षेत्रमा अझै काठ लुकाइएको हुन सक्ने आशंकामा खोजबिन कार्य जारी रहेको र सो प्रकरणको गम्भीर किसिमले अनुसन्धान भइरहेको डिभिजन वन कार्यालय डडेल्धुराका निमित्त प्रमुख बोहरा बताउँछन् ।

गाउँपालिकाको कार्यालयबाट सो सडक योजनासम्बन्धी सम्पूर्ण कागजातहरू झिकाइएको र सरकारी वकिलकाे कार्यालयसँग नियमित परामर्श भइरहेको उनले जानकारी दिए ।

सो घटनाको थप अनुसन्धानपछि सबुत प्रमाणका आधारमा दोषीउपर कारबाही माग गर्दै मुद्दा लगाइने डिभिजन वन कार्यालय डडेल्धुराले जनाएको छ ।

यसअघि गत आइतबार सुदूरपश्चिम प्रदेशसभाको अर्थ, विकास तथा प्राकृतिक स्रोत समितिको ५ सदस्यीय टोलीले सो प्रकरणको स्थलगत अध्ययन गरेको थियो । स्थलगत अध्ययनका क्रममा डोला चक्रपथ सडक रूख काटेर तस्करी गर्ने नियतबाट निर्माण गरिएको संसदीय समितिले ठहर गरेको छ ।

आलिताल गाउँपालिकाअन्तर्गतकाे गोदाम बजारदेखि डोलागाउँ जोड्ने सडकको निर्माणका क्रममा रजनी सामुदायिक वन र राष्ट्रिय वन क्षेत्रमा रहेका रूखहरू अवैध रूपमा काटिएका हुन् ।

सडक क्षेत्रमा रहेका रूखहरू वनकार्यालयको अनुमतिबिना कटानी गरी गोलिया बनाएर लुकाई राखेको अवस्थामा वनकर्मीहरूको टोलीले बरामद गरेको हो । हालसम्म झण्डै १ हजार १ सयभन्दा बढी क्युफिट सालको काठ बरामद भइसकेको वनकर्मीहरू बताउँछन् ।

यो पनि पढ्नुहोस्

सुदूरपश्चिमका सांसद जोशीको घरबाट काठ बरामद

सडक विस्तारका नाममा रूख काटेर काठ तस्करी गर्ने नियत !

प्रकाशित मिति: शुक्रबार, भदौ १२, २०७७ १६:२७