सुदूरपश्चिमका सांसद जोशीको घरबाट काठ बरामद

A+ A A-

डडेल्धुराको आलिताल गाँउपालिका–८ मा निर्मित डोला चक्रपथ सडक निर्माणका क्रममा अन्धाधुन्ध किसिमले काटिएका सालका रूखहरू खोज्न डिभिजन वन कार्यालय डडेल्धुराले सक्रियता बढाएको छ । खोजबिनका क्रममा ठूलो परिमाणमा थप सालको काठका गोलियाहरू भेटिएका छन् ।

डिभिजन वन कार्यालय डडेल्धुराका निमित्त डिभिजन प्रमुख डबलबहादुर बोहराले मंगलबार रूख काटिएको वनक्षेत्रमा २ ओटा समूह बनाएर वनकर्मीहरूले काठ खोजबिन गरिरहेको बताए ।

सोमबार बेलुकी आलिताल गाउँपालिका–८, स्थित सुदूरपश्चिम प्रदेशसभाकी सांसद तथा सामाजिक विकास समितिकी सभापति कुन्ती जोशीको घरमा केही थान सालका गोलिया, केही थान चिरिएको सालका कडी बरामद गरिएको डिभिजन वन कार्यालय डडेल्धुराले जनाएको छ ।

‘३ फिटभन्दा बढी ८ फिट लम्बाइसम्मका सालका गोलिया अन्दाजी ६० क्युविक फिट र चिरिएको सालका कडी अन्दाजी ३ क्युविक फिटजति छन्,’ उनले भने, ‘सो परिणामको काठसँगै दाउराअन्तर्गत पर्ने किसिमका २ फिटभन्दा लम्बाइ भएका २०/२२ थान मोटा गोलिया पनि भेटिएका छन् ।’

सांसद जोशीको सो घरमा उनका स्वकीय सचिवसमेत रहेका सहोदर दाजु शर्मानन्द जोशीको परिवार बसोबास गरिरहेको स्थानीय बताउँछन् । मंगलबार खोजबिनका क्रममा जंगलमा लुकाएर राखिएको अवस्थामा थप ४२ थान सालको गोलिया काठ बरामद गरिएको र खोजबिन कार्य जारी रहेका निमित्त डिभिजन प्रमुख बोहराले बताए ।

उनले वनक्षेत्रमा भेटिएको सबै काठ संकलन गरेर आलिताल सबडिभिजन कार्यालयमा राखिने जानकारी दिए । यसअघि गत शुक्रबार १ सय १० थान सालका गोलिया बरामद गरिएको थियो । ‘बरामद गरिएको सबै काठ १ हजार क्युविक फिटभन्दा बढी परिमाणको छ,’ उनले भने, 'जंगलमा थप काठ हुन सक्ने आशंका भएकाले खोजबिन थालेका हौँ ।’

उनले सडक निर्माणका नाममा भएको वन विनाशका सन्दर्भमा विस्तृत अनुसन्धान भइरहेको जिकिर गरे । यसअघि गत आइतबार सुदूरपश्चिम प्रदेशसभाको अर्थ, विकास तथा प्राकृतिक स्राेत समितिको ५ सदस्यीय सांसदको टोलीले सो प्रकरणको स्थलगत अध्ययन गरेको थियो ।

स्थलगत अध्ययनका क्रममा आलिताल गाउँपालिकाको समपूरक कोषबाट निर्मित डोला चक्रपथ सडक रूख काटेर तस्करी गर्ने नियतबाट निर्माण गरिएको संसदीय समितिले ठहर गरेको छ ।

स्थलगत अध्ययनका क्रममा जंगलमा चक्रपथ सडक निर्माण गर्न आवश्यक नदेखिएको र रूख काटेर तस्करी गर्न नियोजित रूपमा सडक निर्माण गरिएको संसदीय समितिको नेतृत्व गरिरहेका सांसद दीर्घ सोडारी बताउँछन् ।

डोला चक्रपथ सडक निर्माणका लागि गाउँसभाबाट कुनै निर्णय भएको नपाइएको र अवैध रूपमा वन फडानी गर्ने कुत्सित मनशायका साथ काम भएको पाइएको संसदीय समितिका अर्का सदस्य महेशदत्त जोशीले बताए ।

आलिताल गाँउपालिकाअन्तर्गतको गोदाम बजारदेखि डोला गाउँ जोड्ने सडकको निर्माणका क्रममा रजनी सामुदायिक वन र राष्ट्रिय वनक्षेत्रमा रहेका रूख अवैध रूपमा काटिएका हुन् । सडक क्षेत्रमा रहेका रूखहरू वन कार्यालयको अनुमतीबिना कटानी गरी गोलिया बनाएर लुकाई राखेको अवस्थामा वनकर्मीहरूको टोलीले बरामद गरेको हो ।

सो सडक निर्माणका लागि आलिताल गाउँपालिकाले ठेक्कामार्फत उग्रतारा कन्स्ट्रक्सनसँग सम्झौता गरेर काम गरेको आलिताल गाउँपालिकाले जनाएको छ । पहिला नै ट्रयाक खोलिएको सडक भएको र समयावधि निकै कम भएकाले वातावरणीय प्रभाव मूल्यांकन नगरेरै निर्माण सुरु गरिएको आलिताल गाउँपालिकाका अध्यक्ष बलबहादुर गुरुङले बताए ।

दाउरालाई काठ भनेर चरित्रहत्या गर्न खोजियो : सांसद जोशी

दाउरालाई काठ भनेर आफ्नो चरित्र हत्या गर्न खोजिएको सांसद जोशीको आरोप छ । दाउरा प्रयोजनका लागि भाउजूले संकलन गरेको सानो परिमाणको काठ बरामद गरेर डोला चक्रपथ सडक निर्माणका नाममा काठ तस्करीको ठूलो प्रकरणलाई ओझेलमा पार्न खोजेको बताइन् ।

'सामान्य दाउरा संकलन गरेर घरमा राखिएको थियो । हामीहरूले खाना पकाउनका लागि दाउरा संकलन गर्न पनि नपाइने ?' भन्दै उनले प्रश्न गरिन् । घटनामा संलग्न ठेकेदारहरूलाई कारबाही गर्नुको साटो अरूलाई फसाउने चलखेलसमेत भइरहेको उनको आरोप छ ।

सो विषयलाई लिएर आफ्नो नामसमेत जोडिएकोमा सांसद जोशीले गम्भीर आपत्ति जनाएकी छन् । ‘काठ तस्करहरूले अनावश्यक मानिसलाई मुछेर बदनाम गर्न खाेजेको देखिएको छ,’ उनले भनिन्, ‘मेरो परिवारका सदस्यहरू दोषी देखिएमा कानुनअनुसार कारबाही हुनुपर्छ । तर, अनावश्यक बदनाम गर्ने काम हुनु हुँदैन ।’

यो पनि पढ्नुहोस् :

सडक विस्तारका नाममा रूख काटेर काठ तस्करी गर्ने नियत !

प्रकाशित मिति: मंगलबार, भदौ ९, २०७७ २०:४४