बागमतीको प्रादेशिक स्वास्थ्य विज्ञान प्रतिष्ठानको उपकुलपतिमा जोशी

A+ A A-

बागमती प्रदेश सरकारले प्रादेशिक स्वास्थ्य विज्ञान प्रतिष्ठानको उपकुलपतिमा डा. विश्वराज जोशीलाई नियुक्त गरेको छ । प्रदेशको मन्त्रिपरिषद् बैठकले बुधबार जोशीलाई मदन भण्डारी स्वास्थ्य विज्ञान प्रतिष्ठानको उपकुलपतिमा नियुक्त गर्ने निर्णय गरेको हो ।

जोशीको कार्यकाल ४ वर्षको रहनेछ । जोशी यसअघि वीर अस्पतालमा नेसनल एकेडेमी अफ मेडिकल साइन्सेसको रजिस्ट्रार, अस्पतालकै युरोलोजिष्ट प्रमुख थिए । उनले सन् १९७४ मा एमडी (विशेषज्ञता सेवा) र १९८३ मा डाक्टर उपाधि हासिल गरेका छन् । उपकुलपति नियुक्तिसँगै प्रतिष्ठान सञ्चालनका कार्यहरू अगाडि बढ्ने प्रदेश सरकारका प्रवक्ता तथा आर्थिक मामिला तथा योजनामन्त्री कैलाश ढुंगेलले जानकारी दिए ।

प्रदेश सरकारले हेटौँडामा रहेको जिल्ला अस्पताललाई प्रतिष्ठानको रूपमा स्तराेन्नति गर्दै छ । प्रतिष्ठानको अध्यापन र कार्यालय हेटौँडा उपमहानगरपालिका- ८, कमानेमा राख्ने तयारी छ । कमानेस्थित ऐतिहासिक लोकतान्त्रिक पार्कमा निर्माणाधीन भवनमा अध्यापनसहित प्रतिष्ठानको कार्यालय राख्ने तयारी सरकारले गरेको हो ।

पार्कको ५ विगाह ७ कट्ठा ८ धुर क्षेत्रफलमा पक्की भवन निर्माण भइरहेको छ । निर्माण जारी रहेको १ तल्ले भवनमा प्रतिष्ठानका लागि आवश्यक अध्यापनसहित कार्यालयको व्यवस्थापन गर्न थप एक तला उठाउने तयारी सरकारले गरिरहेको छ ।

प्रदेश सरकारले कार्यालय स्थापनाका लागि चालू आर्थिक वर्षमा २०७७/०७८ का लागि ६ करोड रुपैयाँ विनियोजन गरेको छ । आउँदो आर्थिक वर्षबाट स्वास्थ्य क्षेत्रका लागि चिकित्सक उत्पादन गर्ने उद्देश्यसहित अध्यापनसहितको काम थालिने भएको मुख्यमन्त्री डोरमणि पौडेलले जानकारी दिए ।

यसैगरी, मन्त्रिपरिषद् बैठकले प्रदेश बालअधिकार समितिमा सदस्य नियुक्त गरेको छ । समिति सदस्यमा झवीन्द्र ज्ञवाली, शान्ता बराल, शान्ति श्रेष्ठ, मीना थापा र लक्ष्मी ढकाललाई मनोनीत गरिएको प्रवक्ता तथा आर्थिक मामिलामन्त्री ढकालले जानकारी दिए । समिति सदस्यहरूको कार्यकाल ४ वर्षको हुनेछ ।

मन्त्रिपरिषद् बैठकले प्रदेश युवा परिषद नियमावली २०७७ स्वीकृत गर्ने निर्णय गरेको छ । वैदेशिक सहयोग प्राप्ति र कर छुटका लागि संघीय सरकारलाई सिफारिस गर्ने निर्णय गरेको प्रवक्ता ढकालले बताए ।

प्रकाशित मिति: बुधबार, साउन १४, २०७७ २३:२५