बागमती प्रदेशसभाको अधिवेशन अन्त्य, कांग्रेसको आपत्ति

A+ A A-

बागमती प्रदेशसभाको वर्षे अधिवेशन अन्त्य भएको छ । प्रदेशसभा सचिवालयका अनुसार बिहीबार मध्यरातिदेखि अधिवेशन अन्त्य हुने भएको हो ।

प्रदेश सरकारको बिहीबार बसेको मन्त्रिपरिषद् बैठकले बजेट अधिवेशन अन्त्य गर्नेबारे प्रदेश प्रमुखसमक्ष सिफारिस गर्ने निर्णय गरेको हो ।

प्रदेश प्रमुख विष्णु प्रसाईंले अधिवेशन अन्त्य गरेपछि प्रदेशसभा सचिवालयले प्रदेशसभा सदस्यहरूलाई अधिवेशन अन्त्य भएको जानकारी गराएको छ । प्रदेशसभा सचिव कृष्णहरि खड्काले ८ साउन बिहीबार राति १२ बजेपछि अधिवेशन अन्त्य हुने जानकारी दिए ।

प्रदेश सरकारले विनाजानकारी एक्कासि वर्षे अधिवेशन अन्त्य गरेको भन्दै प्रदेशको प्रमुख प्रतिपक्षी दल नेपाली कांग्रेसले आपत्ति जनाएको छ ।

कांग्रेस संसदीय दलका नेता ईन्द्रबहादुर बानियाँले विनाजानकारी अधिवेशन अन्त्य गरेको भन्दै आपत्ति जनाए । उनले विपक्षी दल तथा सभामुखसँग कुनै छलफल नगरी अधिवेशन अन्त्य गरेको बताए ।

बागमती प्रदेशको वर्षे अधिवेशन १२ जेठबाट सुरु भएको थियो । अधिवेशनले प्रदेशको नीति तथा कार्यक्रम र बजेट पारित गरिसकेको छ ।

बैठकले ९ वटा विधेयक पारित गरेको छ । प्रदेशसभाले प्रदेश प्रहरीसम्बन्धी ऐन तयार गर्दै दुईवटा अध्यादेश पनि पारित गरेको छ ।

प्रदेशसभाले प्रदेश सूचनाको हकसम्बन्धी ऐन, आर्थिक ऐन, अन्तरप्रदेश बासिन्दाको समान सुरक्षा र व्यवहार र सुविधासम्बन्धमा व्यवस्था गर्न बनेको विधेयक, वातावरणसम्बन्धमा व्यवस्था गर्न बनेको विधेयक, विनियोजन ऐन, प्रदेश ऐनलाई संशोधन गर्न बनेको विधेयक, आर्थिक कार्यविधि ऐन संशोधन गर्न बनेको विधेयक पारित गरेको छ ।

प्रकाशित मिति: बिहीबार, साउन ८, २०७७ १८:२७