धरहरा पुनर्निर्माणका ७० कामदार क्वारेन्टाइनमा

A+ A A-

धरहरा पुनर्निर्माणका लागि बाहिरी जिल्लाबाट ल्याइएका ७० कामदारलाई क्वारेन्टाइनमा राखिएको छ ।

सरकारले गत ११ चैतदेखि लकडाउन गरेपछि नियमित रूपमा काम गरिरहेका कामदार घर गएका थिए ।

रोकिएको काम अघि बढाउन पुनर्निर्माण गर्न थप कामदार सप्तरीबाट केही दिनअघि ल्याइएको थियो । ल्याइएका ७० जना कामदारलाई क्वारेन्टाइनमा राखिएको र पीसीआर परीक्षणपछि मात्र काममा लगाइने जनाइएको छ ।

कोरोना संक्रमणका कारण पछिल्लो समय बाहिरी जिल्लाबाट ल्याइएका कामदारको कोरोना परीक्षणपछि मात्र काममा लगाउनका लागि क्वारेन्टाइनमा राखिएको राष्ट्रिय पुनर्निर्माण प्राधिकरणका सम्पदाविज्ञ राजुमान मानन्धरले बताए ।

अहिले उनीहरूको परीक्षणका लागि नमुना सङ्कलन भइरहेको छ । परीक्षणपछि काममा लगाइने सम्पदाविज्ञ मानन्धरले बताए ।

भूकम्प गएको ३ वर्ष बितेपछि निर्माणको कामले गति लिएको हो । २ वर्षको अवधिमा निर्माण सम्पन्न गर्नेगरी रमन कन्स्ट्रक्सनले धरहराको पुनर्निर्माण सुरु गरेको छ ।

निर्माणका लागि ३ अर्ब ४८ करोड रुपैयाँ लाग्ने जनाइएको छ । पहिलाको धरहरा भन्दा नयाँ बन्ने धरहराको चौडाइ ठूलो हुनेछ, जहाँ २ वटा लिफ्ट हुनेछन् । एउटा परम्परागत भर्‍याङ रहनेछ । लिफ्ट र भर्‍याङ २ वटै माध्यमबाट धरहरा चढ्न सकिनेछ ।

अब बन्ने धरहरा अत्याधुनिक र सुविधा सम्पन्न हुनेछ । कुल ४२ रोपनी क्षेत्रफलमा निर्माण सुरु गरिएको धरहरा बाहिरबाट हेर्दा ११ तल्लाको हुने भए तापनि भित्र भने २२ तल्लाको र उचाइ ७२ मिटर तथा ४८ फिटको बेस रहनेछ । नयाँ धरहरामा बगैँचा, सङ्ग्रहालय, रङ्गीन जलफोहरा, प्रदर्शनी हल, पार्किङस्थल, पसललगायत रहनेछन् ।

पहिला बनेको ११ तल्ले धरहरा १९९० सालको भूकम्पका कारण क्षतिग्रस्त भएपछि ९ तल्लामा सीमित भएको थियो । सो ऐतिहासिक धरहरा १८३२ सालमा भीमसेन थापाले निर्माण गरेका थिए ।

गोश्वारा हुलाक भएको स्थानमा उद्यान बनाइनेछ । उद्यानभित्र बस्ने ठाउँ, ढुंगेधारा, हरियाली, चमेनागृह हुनेछ । धरहरामा पढ्न चाहने, ध्यान गर्न चाहने या बस्न चाहने सबैका लागि सुविधा उपलब्ध हुनेछ ।

निर्माण हुने धरहरा बालबालिका तथा ज्येष्ठ नागरिकमैत्री हुने र त्यहाँ आउने अवलोकनकर्ताका सवारी साधनको व्यवस्थित पार्किङ गर्न सकिने गरी पुनर्निर्माण हुनेछ ।

धरहराको १८औँ तलामा अवलोकलन कक्ष हुनेछ । रासस

प्रकाशित मिति: बुधबार, असार ३१, २०७७ १२:०२