हेटौंडामा छैन लकडाउन, भित्रभित्रै खुल्छ व्यवसाय

A+ A A-

देशमा कोरोना संक्रमितको संख्या बढ्नुका साथै कोभिड–१९को संक्रमणबाट ज्यान गुमाउनेहरुको संख्या पनि उकालो लाग्दै छ ।

कोरोनाले विकराल अवस्था निम्त्याइरहेको अवस्थामा बागमती प्रदेशको राजधानी हेटौंडामा भने लकडाउन खुलेको जस्तो देखिन्छ ।

‘हेटौंडामा लकडाउन खुलेको जस्तै छ । सबै पसल खुलेका छन् । अटो मयुरी सबै चलेका छन् । गाउँबाट बजार आउनेको संख्या पनि बाक्लैछ,’ आइतबार उिद्योग वाणिज्य संघ चोकमा भेटिएका स्थानीयले भने ।

यस्तो अवस्थामा कोरोना संक्रमणबाट बच्न लकडाउन जारी रहेपनि हेटौंडाका व्यवसायीहरुले भने नियमित पसल सञ्चालन गरिरहेका छन् । हेटौंडा बजार खुल्दा यात्रु ओसारपसार गर्न अटो मयुरी पनि चलिरहेका छन् ।

आइतबारमात्रै करिब १ सयको हाराहारीमा अटो मयुरी हेटौंडामा चलिरहेका देखिन्थे । मकवानपुर प्रशासनले प्रहरी परिचालन गरेतापनि लकडाउन कार्यान्वयन गराउन चुकेको छ ।

हरेक दिन जिल्ला प्रहरी कार्यालय मकवानपुरका दर्जन बढी प्रहरीको टोली हेटौंडा बजारमा खटिन्छ । तर, बजारमा निर्वाध रुपमा अटोमयुरी, मान्छेको चहलपल र व्यवसाय सञ्चालन भइरहेको छ ।

हेटौंडाका केही व्यवसायहरु भित्रभित्रै सञ्चालन भइरहेको पाइएको छ । आधा सटर लगाएर पनि व्यापार भइरहेको छ ।

जिल्ला प्रशासन कार्यालय मकवानपुरले हरेक दिन बिहान ६ बजेदेखि ९ बजेसम्म अत्यावश्यक सेवाका पसल खोल्न अनुमती दिएको छ । तर, बजारका अत्यावश्यक सेवाका पसल मात्र नभई कपडा, जुत्ता, भाडाकुडा र होटलहरु पनि खुल्ने गरेका छन् ।

व्यवसायीहरुको साझा संस्था मकवानपुर उद्योग वाणिज्य संघले पनि व्यवसायहरु सञ्चालन भइरहेको भन्दै लकडाउनको पालना गर्न आग्रह गरेको छ ।

‘संघको पहलमा बिहान ९ बजेसम्म व्यवसाय सञ्चालन गर्न सहजता भएको छ । तर, दिउसो पनि व्यवसाय सञ्चालन भइरहेको कारण त्यसो नगर्न आग्रह गरेको छु,’ संघका अध्यक्ष कृष्ण कटुवालले भने ।

शनिवारदेखि हेटौंडामा चलहलपहल अत्यधिकरुपमा बढेको छ । दिउँसो पनि बजारमा भीड बढेको हो । स्थानीयका अनुसार प्रहरीले चेकिङ पनि फितलो बनाएको छ । नाकासहित हेटौंडाका करिब १० स्थानमा प्रहरीको चेकिङ टोली खटिएको छ ।

मकवानपुरका प्रमुख जिल्ला अधिकारी दीपक राज नेपालले लकडाउन कार्यान्वयनमा कडाई गरिएको बताए ।

‘हेटौंडामा लकडाउन खुकुलो बनाइएको हो’ भन्ने शिलापत्रको जिज्ञाशामा प्रजिअ नेपालले बजारमा चहलपहल र सञ्चालन भइरहेका व्यवसायका बारेमा आफू जानकार नभएको तर्क गरे । उनले त्यस्तो भए प्रहरी परिचालन गरेर थप कडाई गर्ने बताएका छन् ।

प्रकाशित मिति: आइतबार, जेठ २५, २०७७ १७:४१