यती प्यालेसमा छचल्किएको मातृभूमि प्रेम

A+ A A-

आफ्नो देशको माटो कति प्यारो हुन्छ । म्यानमारबाट आएका २६ नेपालीको अनुहार हेरे प्रष्ट हुन्छ ।

कोरोना महामारीका बीच २६ नेपाली शुक्रबार त्रिभुवन अन्तर्राष्ट्रिय विमानस्थलमा अवतरण गरे । उनीहरूलाई म्यानमारको एयरफोर्सले ल्याएको थियो । अवतरण गरेलगत्तै उनीहरूले माटोलाई ढोगे ।

ललितपुरकाे हात्तीवनका अमर घिमिरे ३ महिनाअगाडि मात्र म्यानमार गएका थिए । पारिवारिक कार्यक्रममा गएका उनी कोरोनाले उतै अड्किए ।

कहिले घर फर्किने हो के हुने हो, अन्योल थियो । जब घर फर्किने भन्ने भयो । उनी खुसी भए ।

‘कहिले घर फर्किने हो के हुने हो भन्ने अन्योल थियो,’ उनले भने, ‘अझै २/३ महिना लाग्ला भन्ने थियो । तर अकस्मात् सूचना आयो । विमान ल्याण्ड गर्ने बेलामा सबैले ताली बजायौँ । नेपाल आइपुगेपछि त धेरै खुसी छु । मन नै शान्त भयो ।’

उनी मात्र होइन, २६ जनाकै मुहारमा चमक देखिन्थ्यो । सहयोग गरेकोमा उनीहरूले सरकारलाई धन्यवाद समेत दिए ।

त्यसपछि उनीहरूलाई नेपाली सेनाको सहयोगमा वसुन्धारास्थित यती पार्टी प्यालेसमा लगियो । पार्टी प्यालेसमा पुगेपछि उनीहरू आफन्तसँग फोनमा खुसी साटिरहेका थिए ।

पार्टी प्यालेसमा नेपाली सेनाले उनीहरूको स्वास्थ्य परीक्षण गरेको छ । केही घण्टा उनीहरूलाई त्यही पार्टी प्यालेसमा राखेर प्रदेश सरकारको समन्वयमा स्थानीय तहमा हस्तान्तरण गरिँदै छ ।

सम्बन्धित प्रतिनिधि आएपछि उनीहरूलाई आ–आफ्नो क्षेत्रमा पठाइनेछ । कोही सरकारी क्वारेन्टाइन त कोही होम क्वारेन्टाइनमा १४ दिन बस्नेछन् ।

को हुन् यती पार्टी प्यालेसका सञ्चालक ?

यति पार्टी प्यालेसका सञ्चालक शिवभक्त रञ्जित र सरोज शाक्य हुन् । प्यालेसको व्यवस्थापन रञ्जितले गरिरहेका छन् । दाजुहरूले १५ वर्षअघिदेखि नै प्यालेस चलाएको भए पनि रञ्जित ६ वर्षदेखि यो क्षेत्रका छन् । उनी काठमाडौं पार्टी प्यालेस संघ (इभा नेपाल) को उपाध्यक्ष पनि हुन् ।

बाहिरबाट आएका नेपालीलाई होल्डिङका लागि सरकारले माग गरेपछि शिवभक्त र सरोज दिन तयार भए ।

‘कोरोना उच्चस्तरीय समितिबाट प्रस्ताव आयो । क्वारेन्टाइन नै बनाउन भनिएको थियो । तर, क्वारेन्टाइन बनाउन भौतिक संरचना नभएपछि होल्डिङका लागि दिन तयार भएका हौँ’, रञ्जितले भने ।

संकटको समयमा मानवीय दायित्त्व पूरा गरेको उनले बताए । ‘देश संकटमा छ । यो समयमा मान्छे कसरी बाँच्ने र बचाउने भन्ने हो । हरेक मान्छेकोे दायित्व पनि हो,’ संचालक रञ्जितले भने, ‘हामीले पनि सहयोग गरेका हौँ ।’

विदेशबाट आएका नेपालीका लागि आफ्नो पार्टी प्यालेस प्रयोग गरेकोमा उनी खुसी देखिन्थे ।

‘देश विदेशबाट आएको रेमिट्यान्सले चलेको छ । नेपाली दाजुभाइलाई किन नराख्ने ? कतिपय देशमा अहिले नेपाली अलपत्र पर्नुभएको छ,’ उनले थपे, ‘नेपाल ल्याउनुपर्छ ।’

नेपाली सेनाले व्यवस्थापनको जिम्मा लिएको छ । यद्यपि, उनले आफ्ना ५ जना कर्मचारी पनि खटाएका छन् ।

व्यवस्थापन राम्रो बनाउन उनले सरकारलाई आग्रहसमेत गरे ।

‘व्यवस्थापनको जिम्मा सरकारको हो,’ उनले भने, ‘बाहिरबाट आउनुभएकाले तातोपानी माग्नुहुन्छ, हामीले नै दिएका छौँ ।’

विदेशबाट आएकाको व्यवस्थापनमा जुट्दाजुट्दै समय निकालेर कुराकानीमा जुटेका रञ्जित भन्दै थिए, ‘अहिले आर्थिकभन्दा पनि मानवीय कुरा ठूलो हो । फाइनान्सियल कुरा त पछि गरौँला नि ।’

प्रकाशित मिति: शुक्रबार, जेठ २३, २०७७ १७:२०