जनकपुरका मस्जिदमा रहेका भारतीयमा देखिएन कोरोना संक्रमण

A+ A A-

उदयपुर र पर्सामा भारतबाट फर्किएका जमातीमा कोरोना संक्रमण भेटिएपछि सचेतना स्वरुप प्रदेश–२ को अस्थायी राजधानी जनकपुरधामस्थित एक मस्जिदमा रहेका भारतीयको कोरोना परिक्षण गरिएको छ ।

कोभिड–१९ क्राइसीस म्यानेजमेन्ट सेन्टरको निर्णय बमोजिम सचेतना स्वरुप जनकपुरधाम उपमहानगरपालिका–२५ लोहनास्थित जामिया बरकातुन्न नबि मस्जिदमा रहेका ९ जनाको मौलानाको सहमतिमै कोरोना परिक्षण गरिएको बताइएको छ ।

लोहनास्थित सो मस्जिदमा भारतका शिक्षक बस्दै आएको सूचना प्रहरीले पाएपछि उनीहरुलाई त्यहाँबाट प्रादेशिक अस्पतालमा ल्याएर आरडीटी गरिएको थियो । आरडीटीमा सबैको नतिजा नेगेटिभ आएपछि उनीहरुलाई फेरि मस्जिदमै पुर्‍याइएको बताइएको छ ।

प्रशासनले कोरोना परीक्षणसँगै धनुषाका सबै मस्जिद लगायत अन्य सबै धार्मिक स्थलहरुमा समेत सामूहिक धार्मिक गतिविधिमा पूर्णरुपमा रोक लगाउने निर्णय गरिसकेको छ । कोरोना संक्रमित मस्जिद र मदरसामा लुकेको चर्चा चलिरहेको बेला जनकपुरधाम नगरभित्रका दर्जन बढी मस्जिदमा शुक्रबार अनुगमन पनि गरिएको थियो ।

धनुषाका प्रमुख जिल्ला अधिकारी कोशहरि निरौलाको नेतृत्वमा जिल्लाको संयुक्त सुरक्षा समूहले मुस्लिम समुदायका अगुवासँगको समन्वयमा अनुगमन गरिएको हो । मुस्लिम समुदायको अवस्था अध्ययन गर्न आग्रह भएबमोजिम मस्जिदमा अनुगमन गरिएको प्रजिअ निरौलाले जानकारी दिए ।

अनुगमन टोलीले जनकपुरधाम उपमहानगरपालिका–२३ लादो बेलास्थित नूरी मस्जिद, दारुल उलूम अताये मुस्तफा मस्जिद, रेजा जामा मस्जिद, वडा नम्बर ४ स्थित अल्जामी अतुल कादिया मदिना तूल उलूम मस्जिद, वडा नम्बर २० रुपैठास्थित जामिया इमाम अहमद रेजा मदरसाको अनुगमन गरेको हो ।

त्यस्तै, टोलीले नूरी जामे मस्जिद, मस्जिद कादरिया, वडा नम्बर २४ बसहियास्थित कादरी बरकाती जामे मस्जिद, मदरसा फैजुल इस्लाम दायमी मदरसा, वडा नम्बर ६ स्थित मदरसा र मस्जिदमा पनि अनुगमन गरेको प्रजिअ निरौलाले जानकारी दिए ।

प्रकाशित मिति: शनिबार, वैशाख १३, २०७७ ०८:२०