जनकपुरधाम नगरभित्रका दर्जनभन्दा बढी मस्जिदमा अनुगमन

A+ A A-

कोरोना भाइरस संक्रमितहरू मस्जिद र मदरसामा लुकेको चर्चा चलिरहेको बेला जनकपुरधाम नगरभित्रका दर्जनभन्दा बढी मस्जिदमा शुक्रबार अनुगमन गरिएको छ ।

धनुषाका प्रमुख जिल्ला अधिकारी कोशहरि निरौलाको नेतृत्वमा जिल्लाको संयुक्त सुरक्षा समूहले मुस्लिम समुदायका अगुवासँगको समन्वयमा अनुगमन गरेका हुन् । मुस्लिम समुदायको अवस्था अध्ययन गर्न आग्रह भएबमोजिम मस्जिदमा अनुगमन गरिएको प्रजिअ निरौलाले जानकारी दिए ।

टोलीले नगर क्षेत्रभित्रका मस्जिदको अवस्था र त्यसभित्र बसेका व्यक्तिको स्वास्थ्य अवस्थाबारे समेत सोधखोज गरेको बताइएको छ । अनुगमनका क्रममा मस्जिदमा नमाज पढ्दा पनि सामाजिक दूरी कायम गरिएको प्रजिअ निरौलाले बताए ।

‘अनुगमनका क्रममा मुस्लिम अगुवा तथा धर्मगुरुहरू सचेत हुनुका साथै सहयोगी भूमिका समेत निर्वाह गरेका थिए, उनले भने, यहाँका मस्जिदहरूमा अहिलेसम्म अवस्था सामान्य छ ।

अनुगमन टोलीले जनकपुरधाम उपमहानगरपालिका– २३, लादो बेलास्थित नूरी मस्जिद, दारुल उलूम अताये मुस्तफा मस्जिद, रेजा जामा मस्जिद, वडा नम्बर ४ स्थित अल्जामी अतुल कादिया मदिना तूल उलूम मस्जिद, वडा नम्बर २० रुपैठास्थित जामिया इमाम अहमद रेजा मदरसा, नूरी जामे मस्जिद, मस्जिद कादरिया, वडा नम्बर २४ बसहियास्थित कादरी बरकाती जामे मस्जिद, मदरसा फैजुल इस्लाम दायमी मदरसा, वडा नम्बर ६ स्थित मदरसा र मस्जिदमा अनुगमन गरेको हो ।

मुस्लिम धर्मावलम्बी पनि सर्तक

उदयपुरको मस्जिदमा रहेकाहरूमा कारोना पोजिटिभ देखिएपछि अहिले देशभरका मस्जिद र मदरसामा अनुगमन थालिएको छ । मस्जिद र मदरसाहरूमा रहेका धर्मगुरुहरूलाई लिएर मुस्लिम आयोग समेत सतर्क रहेको छ ।

वैशाख ७ गते मुस्लिम आयोगको सर्वपक्षीय छलफलले मस्जिद र मदरसाहरूमा जिल्ला स्तरीय अनुगमन समिति बनाउने निर्णय पनि गरेको थियो ।

जिल्लास्तरीय समितिले मदरसा र मस्जिदमा हुने अनुगमनमा जिल्ला प्रशासन कार्यालयसँग समन्वय गरी अनुगमन समितिसँगै रहने स्वास्थ्यकर्मीले मस्जिद मदरसाहरूमा रहेका मौलानाहरूको स्वास्थ्य जाँच पनि गर्ने आयोगका अध्यक्ष समिम मियाँ अन्सारीले जानकारी दिएका छन् । त्यसका लागि विभिन्न जिल्लामा समिति पनि गठन गरिएको छ ।

रौतहटको संयोजकमा अब्दुल वाहिद सदस्यमा मेघ मोहम्मद,शेख जमशेद, हक्कुल्लाह फर्र्माहिन, मोहम्मद मोजबुल्लाह, इस्तियाक अहमद,मौलाना वकील अहमद, सर्लाहीको संयोजकमा शेख महमूद सदस्यमा नसीम नूरानी,जुलफकार मिकरानी, शेख शाहदुल्लाह,अबू हसन नूरी, समीम बाबू खान, धनुषाको संयोजकमा मो. कैश, सदस्यमा हाकमी राईन, शोएब रजा, हबीब मन्सूरी,ईद मोहम्मद साफी (जानी खान), हलीम रैना, सिरहा र उदयपुरको संयोजकमा मुख्तार अहमद सदस्यमा नजबुल खान, रियासत अली, कासिम अली, सप्तरीको संयोजकमा युसुफ अली, सदस्यमा मौलाना कलीम, मो. युसुफ, कलाम खान रहेका छन् ।

प्रकाशित मिति: शुक्रबार, वैशाख १२, २०७७ १८:३१